ਪਾਕਿਸਤਾਨ ਵਿਚ ਗੁਰਧਾਮਾਂ ਬਾਰੇ ਤਸਵੀਰਾਂ ਵਾਲੀ ਕਿਤਾਬ ਜਾਰੀ
ਲੇਖਕ ਡਾ. ਦਲਵੀਰ ਪੰਨੂ ਨੇ ਦਿਤਾ ਵੇਰਵਾ ਕਿਹਾ, ਸਿੱਖ ਵਿਰਾਸਤੀ ਯਾਦਗਾਰਾਂ ਨਾਲ ਆਪਸੀ ਪਿਆਰ ਵਧੇਗਾ
ਚੰਡੀਗੜ੍ਹ (ਜੀ.ਸੀ. ਭਾਰਦਵਾਜ) : ਦੇਸ਼ ਦੀ ਵੰਡ ਸਮੇਂ, ਪੱਛਮੀ ਪੰਜਾਬ ਯਾਨੀ ਪਾਕਿਸਤਾਨ ਵਿਚ ਰਹਿ ਗਏ ਗੁਰਧਾਮ ਅਤੇ ਹੋਰ ਸਾਂਝੀਆਂ ਸਿਆਸੀ ਤੇ ਧਾਰਮਕ, ਸਭਿਆਚਾਰਕ ਤੇ ਇਤਿਹਾਸਕ ਯਾਦਗਾਰਾਂ ਤੇ ਵਿਰਾਸਤੀ ਇਮਾਰਤਾਂ ਤੇ ਭਵਨਾਂ ਤੋਂ ਝਲਕਦੀ ਸਾਂਝ ਬਾਰੇ ਦਸਦੇ ਹੋਏ ਡਾ. ਦਲਵੀਰ ਸਿੰਘ ਪੰਨੂ ਨੇ ਕਿਹਾ ਕਿ ਅਜੇ ਵੀ ਪਾਕਿਸਤਾਨ ਦੇ ਲੋਕਾਂ ਵਿਚ ਪੁਰਾਣੇ ਦੋਸਤਾਂ ਤੇ ਉਨ੍ਹਾਂ ਦੇ ਪਰਵਾਰਾਂ ਨੂੰ ਇਧਰ ਆਉਣ ਦੀ ਤਾਂਘ ਹੈ।
ਕੈਲੇਫ਼ੋਰਨੀਆ ਦੇ ਸ਼ਹਿਰ ਵਿਚ ਦੰਦਾਂ ਦਾ ਕਲੀਨਿਕ ਚਲਾਉਣ ਵਾਲੇ ਸੈਨਹੋਜ਼ੇ ਦੇ ਡਾ. ਪੰਨੂ ਨੇ ਪਿਛਲੇ 12 ਸਾਲਾਂ ਦੀ ਮਿਹਨਤ ਉਪਰੰਤ 450 ਸਫ਼ਿਆਂ ਦੀ ਤਸਵੀਰਾਂ ਵਾਲੀ ਕਿਤਾਬ ਲਿਖੀ ਹੈ ਜਿਸ ਵਿਚ ਪਾਕਿਸਤਾਨ ਦੇ 6 ਜ਼ਿਲ੍ਹਿਆਂ ਨਨਕਾਣਾ ਸਾਹਿਬ, ਸ਼ੇਖੂਪੁਰਾ, ਸਿਆਲਕੋਟ, ਕਸੂਰ, ਲਾਹੌਰ ਤੇ ਨਾਰੋਵਾਲ ਵਿਚ ਸਥਿਤ ਪੁਰਾਣੇ 84 ਧਾਰਮਕ ਸਥਾਨਾ, ਗੁਰਦਵਾਰਿਆ ਤੇ ਹੋਰ ਸਥਾਨਾਂ ਦਾ ਵੇਰਵਾ ਹੈ।
ਕਿਤਾਬ ਦਾ ਨਾਮ ਤਾਂ ਸਿੱਖ ਵਿਰਾਸਤ (ਹੈਰੀਟੇਜ) ਸਰਹੱਦੋਂ ਪਾਰ (ਬੀਯੌਂਡ ਬਾਰਡਰਜ਼) ਹੈ ਪਰ ਲਿਖੇ ਵਿਰਤਾਂਤ ਵਿਚ ਲਿਖਾਰੀ ਬਣੇ ਇਸ ਡੈਂਟਲ ਡਾਕਟਰ ਨੇ ਕਈ ਪੁਰਾਣੇ ਇਤਿਹਾਸਕਾਰਾਂ ਦੀਆਂ ਕਿਤਾਬਾਂ ਦਾ ਵਰਣਨ ਕੀਤਾ ਹੈ। ਗੁਰੂ ਨਾਨਕ ਦੇਵ ਜੀ ਦੇ 550ਵੇਂ ਪ੍ਰਕਾਸ਼ ਪੁਰਬ ਨੂੰ ਸਮਰਪਿਤ ਇਸ ਕਿਤਾਬ ਨੂੰ ਲਿਖਣ ਵਾਸਤੇ ਇਹ 46 ਸਾਲਾ ਡਾਕਟਰ ਬਨਾਮ ਲਿਖਾਰੀ ਨੇ 2 ਵਾਰ 2008 ਤੇ 2016 ਵਿਚ ਪਾਕਿਸਤਾਨ ਜਾ ਕੇ ਸਿੱਖਾਂ,
ਮੁਸਲਮਾਨਾਂ, ਹਿੰਦੂਆਂ ਤੇ ਹੋਰ ਬਰਾਦਰੀਆਂ ਦਾ ਧਾਰਮਕ, ਸਭਿਆਚਾਰਕ, ਵਤੀਰਾ, ਰਸਮ ਰਿਵਾਜ, ਰਹਿਣ ਸਹਿਣ ਸਟੱਡੀ ਕੀਤਾ, ਉਰਦੂ ਫ਼ਾਰਸੀ, ਸ਼ਾਹਮੁਖੀ ਦੀਆਂ ਕਿਤਾਬਾਂ ਦੀ ਪੜਚੋਲ ਕੀਤੀ ਅਤੇ ਸਿੱਖ ਗੁਰੂਆਂ ਬਾਰੇ ਪੁਰਾਣੇ ਗੰ੍ਰਥਾਂ ਦੀ ਸਟੱਡੀ ਕੀਤੀ। ਕਈ ਸਵਾਲਾਂ ਦੇ ਜਵਾਬ ਦਿੰਦੇ ਹੋਏ ਡਾ. ਪੰਨੂ ਨੇ ਮੰਨਿਆ ਕਿ 1947 ਤੋਂ ਪਹਿਲਾਂ ਆਪਸੀ ਸਾਂਝ, ਦੋਸਤੀ ਪਿਆਰ, ਭਾਈਚਾਰਾ ਬਹੁਤ ਪਾਏਦਾਰ ਸੀ, ਮਗਰੋਂ ਕੁੜੱਤਣ ਹੋਰ ਵਧਦੀ ਗਈ।
ਉਨ੍ਹਾਂ ਇਹ ਵੀ ਕਿਹਾ ਕਿ ਸਿੱਖ ਗੁਰੂਆਂ ਦੀ ਬਾਣੀ ਕੀਤੇ ਗਏ ਪ੍ਰਵਚਨਾਂ ਤੇ ਦਸੇ ਗਏ ਸਾਦਾ ਰਸਤਿਆਂ ਤੇ ਜੀਵਨ ਜਾਚ ਵਿਚ ਕੋਈ ਵੀ ਥਾਂ, ਕਿਰਿਆ ਕਾਂਡ ਜਾਂ ਵਹਿਮਾ ਭਰਮਾਂ ਦੀ ਨਹੀਂ ਸੀ ਅਤੇ ਨਾ ਹੀ ਕੋਈ ਚਮਤਕਾਰ ਦਿਖਾਉਣ ਵਿਚ ਗੁਰੂ ਸਾਹਿਬਾਨ ਦੀ ਭੂਮਿਕਾ ਸੀ। ਡਾ. ਪੰਨੂ ਨੇ ਸਪਸ਼ਟ ਕੀਤਾ ਕਿ ਸਿੱਖ ਰੈਫ਼ਰੈਂਡਮ 2020 ਦਾ ਵਿਚਾਰ ਦੇਣ ਵਾਲੇ ਗੁਰਵੰਤ ਪੰਨੂ ਨਾਲ ਉਨ੍ਹਾਂ ਦਾ ਕੋਈ ਸਬੰਧ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਸਿੱਖ ਰੈਫ਼ਰੈਂਡਮ 2020 ਵਾਲਾ ਪੰਨੂ ਰਹਿੰਦਾ ਤਾਂ ਕੈਲੇਫ਼ੋਰਨੀਆ ਵਿਚ ਹੀ ਹੈ ਪਰ ਉਸ ਦੇ ਵਿਚਾਰਾਂ ਨਾਲ ਨੇੜਤਾ ਜਾਂ ਮੇਲ, ਜ਼ਰਾ ਵੀ ਨਹੀਂ ਹੈ। ਡਾ. ਦਲਵੀਰ ਸਿੰਘ ਪੰਨੂ ਨੇ ਸ਼੍ਰੋਮਣੀ ਕਮੇਟੀ ਨੂੰ ਅਪੀਲ ਵੀ ਕੀਤੀ ਕਿ ਇਸ ਕਿਤਾਬ ਨੂੰ ਸਿੱਖ ਲਾਇਬ੍ਰੇਰੀਆਂ ਵਿਚ ਰੱਖਿਆ ਜਾਵੇ।