ਭਾਜਪਾ ਤੇ ਆਰ.ਐਸ.ਐਸ. ਨੇ ਸਿੱਖਾਂ ਦੇ ਮੱਥੇ ਇਕ ਹੋਰ ਅਖੌਤੀ ਸਾਧ ਮਾਰਿਆ : ਭੋਮਾ

Bhai Manjeet Singh Bhoma

ਅੰਮ੍ਰਿਤਸਰ : ਆਲ ਇੰਡੀਆ ਸਿੱਖ ਸਟੂਡੈਂਟਸ ਫ਼ੈਡਰੇਸ਼ਨ ਦੇ ਪ੍ਰਧਾਨ ਮਨਜੀਤ ਸਿੰਘ ਭੋਮਾ ਮੁੱਖ ਸਲਾਹਕਾਰ ਸ. ਸਰਬਜੀਤ ਸਿੰਘ ਜੰਮੂ, ਸ੍ਰੀ ਸਤਨਾਮ ਸਿੰਘ ਕੰਡਾ ਅਤੇ ਸ. ਬਲਵਿੰਦਰ ਸਿੰਘ ਖੋਜਕੀਪੁਰ ਨੇ ਇਕ ਸਾਂਝੇ ਬਿਆਨ ਵਿਚ ਪਿਪਲੀ ਵਾਲੇ ਨਾਮਧਾਰੀ ਸਤਨਾਮ ਸਿੰਘ ਵਲੋਂ ਥਾਈਲੈਂਡ ਦੇ ਸ਼ਹਿਰ ਬੈਂਕਾਕ ਵਿਚ ਗੁਰੂ ਗ੍ਰੰਥ ਸਾਹਿਬ ਦੀ ਬਰਾਬਰੀ ਕਰਨ ਦਾ ਢੌਂਗ ਰਚਾਉਣ ਦਾ ਗੰਭੀਰ ਨੋਟਿਸ ਲੈਂਦਿਆਂ ਕਿਹਾ ਕਿ ਇਸ ਸਤਨਾਮ ਸਿੰਘ ਨੇ ਡੇਰਾ ਸਿਰਸਾ ਮੁਖੀ ਗੁਰਮੀਤ ਰਾਮ ਰਹੀਮ ਵਾਲੀ ਸਲਾਬਤਪੁਰੇ ਵਾਲੀ ਘਟਨਾ ਨੂੰ ਦੁਹਰਾ ਕੇ ਸਿੱਖ ਕੌਮ ਨੂੰ ਇਕ ਵੱਡਾ ਚੈਲੰਜ ਕਰ ਕੇ ਸਾਬਤ ਕੀਤਾ ਹੈ ਕਿ ਆਰ.ਐਸ.ਐਸ ਤੇ ਭਾਜਪਾ ਸਿੱਖਾਂ ਨੂੰ

ਹਰ ਹੀਲੇ ਵਸੀਲੇ ਵਰਤ ਕੇ ਨੀਵਾਂ ਦਿਖਾਉਣ ਲਈ ਪੰਥ ਵਿਰੋਧੀ ਸ਼ਕਤੀਆਂ ਨੂੰ ਸ਼ਹਿ ਦੇਣ ਲਈ ਕੋਈ ਕਸਰ ਬਾਕੀ ਨਹੀਂ ਛੱਡ ਰਹੀ। ਭਾਜਪਾ ਤੇ ਆਰ.ਐਸ. ਐਸ ਨੇ ਸਿੱਖਾਂ ਦੇ ਮੱਥੇ ਇਕ ਹੋਰ ਗੁਰਮੀਤ ਰਾਮ ਰਹੀਮ ਮਾਰਿਆ ਹੈ। ਉਕਤ ਵਿਚਾਰਾਂ ਦਾ ਪ੍ਰਗਟਾਵਾ ਕਰਦਿਆਂ ਫ਼ੈਡਰੇਸ਼ਨ ਆਗੂਆਂ ਨੇ ਜ਼ੋਰ ਦਿੰਦਿਆਂ ਕਿਹਾ ਕਿ ਅਜਿਹਾ ਸਰਕਾਰ ਦੀ ਸ਼ਹਿ ਤੋਂ ਬਗ਼ੈਰ ਨਹੀਂ ਹੋ ਸਕਦਾ। ਫ਼ੈਡਰੇਸ਼ਨ ਨੇਤਾਵਾਂ ਨੇ ਦਸਿਆ ਕਿ ਸਤਨਾਮ ਸਿੰਘ ਨੂੰ ਨਾਮਧਾਰੀ ਸੰਪਰਦਾ ਨੋਸ਼ਿਹਰਾ ਮੱਝਾ ਸਿੰਘ ਬਹੁਤ ਦੇਰ ਪਹਿਲਾਂ ਹੀ ਖ਼ਾਰਜ ਕਰ ਚੁਕੀ ਹੈ। ਦੋ ਸਾਲ ਪਹਿਲਾਂ ਸਰਬੱਤ ਖ਼ਾਲਸਾ ਦੇ ਜਥੇਦਾਰ ਵੀ ਇਸ ਦੀਆਂ ਪੰਥ ਵਿਰੋਧੀ ਫ਼ੈਸਲਿਆਂ ਕਾਰਨ ਪੰਥ  

ਵਿਚੋਂ ਛੇਕ ਚੁਕੇ ਹਨ। ਇਹ ਹੀਰਿਆਂ ਦਾ ਵਪਾਰੀ ਬੈਂਕਾਕ ਵਿਚ ਸਾਹੀ ਠਾਠ ਬਾਠ ਨਾਲ ਰਹਿੰਦਾ ਹੈ। ਉਥੇ ਇਸ ਨੇ ਨਿਰਮਲ ਸੀਸ ਮਹੱਲ ਬਣਾਇਆ ਹੈ। ਇਸ ਨੂੰ 8 ਸਾਲ ਪਹਿਲਾਂ ਪੰਥਕ ਆਗੂਆਂ ਨੇ ਪ੍ਰੇਰਕੇ ਅੰਮ੍ਰਿਤਪਾਨ ਕਰਵਾਇਆ ਸੀ ਪਰ ਬਾਅਦ ਵਿਚ ਇਹ ਫਿਰ ਭਾਜਪਾ  ਤੇ ਆਰ ਐਸ ਐਸ ਦੀ ਸ਼ਹਿ ਤੇ ਫਿਰ ਪੰਥ ਵਿਰੋਧੀ ਕਾਰਵਾਈਆਂ ਵਿਚ ਰੁਝ ਗਿਆ।