ਭੋਗਲ ਵਲੋਂ ਯੂਪੀ ਦੇ ਮੁੱਖ ਸਕੱਤਰ ਨਾਲ ਮੁਲਾਕਾਤ

Kuldeep Singh Bhogal met the UP Chief Secretary

ਨਵੀਂ ਦਿੱਲੀ : ਯੂਪੀ ਸਰਕਾਰ ਵਲੋਂ ਨਵੰਬਰ 1984 ਵਿਚ ਕਾਨਪੁਰ ਵਿਖੇ ਕਤਲ ਕੀਤੇ ਗਏ 127 ਸਿੱਖਾਂ ਦੇ ਮਾਮਲਿਆਂ ਦੀ ਪੜਤਾਲ ਵਾਸਤੇ ਵਿਸ਼ੇਸ਼ ਜਾਂਚ ਟੀਮ (ਐਸਆਈਟੀ) ਕਾਇਮ ਕਰਨ ਪਿਛੋਂ ਆਲ ਇੰਡੀਆ ਦੰਗਾ ਪੀੜਤ ਰਾਹਤ ਕਮੇਟੀ ਨੇ ਯੂਪੀ ਸਰਕਾਰ ਨੂੰ ਮਿਥੀ ਹੱਦ ਵਿਚ ਦੋਸ਼ੀਆਂ ਦੀ ਪਛਾਣ ਕਰ ਕੇ, ਤੁਰਤ ਗ੍ਰਿਫ਼ਤਾਰ ਕਰਨ ਤੇ ਗਵਾਹਾਂ ਨੂੰ ਸੁਰੱਖਿਆ ਦੇਣ ਦੀ ਮੰਗ ਕੀਤੀ ਹੈ। ਸੁਸਾਇਟੀ ਦੇ ਪ੍ਰਧਾਨ ਤੇ ਪੁਰਾਣੇ ਅਕਾਲੀ ਅਹੁਦੇਦਾਰ ਸ.ਕੁਲਦੀਪ ਸਿੰਘ ਭੋਗਲ ਦੀ ਅਗਵਾਈ ਹੇਠ ਬੀਤੇ ਦਿਨੀਂ ਇਕ ਵਫ਼ਦ ਜਿਸ ਵਿਚ ਵਕੀਲ ਪ੍ਰਸੁਨ ਕੁਮਾਰ, ਸ.ਇਕਬਾਲ ਸਿੰਘ ਦੂਆ, ਸ.ਗੁਰਦੇਵ ਸਿੰਘ ਤੇ ਸ.ਸੁਰਜੀਤ ਸਿੰਘ ਉਬਰਾਏ ਸ਼ਾਮਲ ਸਨ,

ਨੇ ਯੂਪੀ ਦੇ ਮੁੱਖ ਸਕੱਤਰ ਅਨੂਪ ਚੰਦਰ ਪਾਂਡੇ ਤੇ ਗ੍ਰਹਿ ਸਕੱਤਰ ਅਰਵਿੰਦ ਕੁਮਾਰ ਨਾਲ ਮੁਲਾਕਾਤ ਕਰਦਿਆਂ 84 ਦੇ ਚਸ਼ਮਦੀਦ ਗਵਾਹਾਂ ਦੀ ਸੁਰੱਖਿਆ ਦਾ ਮੁੱਦਾ ਚੁਕਿਆ ਤੇ ਇਹ ਮੰਗ ਕੀਤੀ ਕਿ ਜਿਨ੍ਹਾਂ ਅਪਰਾਧੀਆਂ ਵਿਰੁਧ ਪਹਿਲਾਂ ਹੀ ਐਫ਼ਆਈਆਰ ਦਰਜ ਹੈ,  ਉਨ੍ਹਾਂ ਨੂੰ ਤੁਰਤ ਗ੍ਰਿਫ਼ਤਾਰ ਕੀਤਾ ਜਾਵੇ। ਕਾਨਪੁਰ ਦੌਰੇ ਤੋਂ ਵਾਪਸ ਪਰਤਣ ਪਿਛੋਂ ਇਥੇ 'ਸਪੋਕਸਮੈਨ' ਨਾਲ ਗੱਲਬਾਤ ਕਰਦਿਆਂ ਸ.ਭੋਗਲ ਨੇ ਦਸਿਆ ਕਿ ਮੁੱਖ ਸਕੱਤਰ ਤੋਂ ਇਹ ਵੀ ਮੰਗ ਕੀਤੀ ਗਈ ਹੈ ਕਿ ਐਸਆਈਟੀ ਦਾ ਦਫ਼ਤਰ ਲਖਨਊ ਦੀ ਬਜਾਏ ਕਾਨਪੁਰ ਵਿਖੇ ਹੀ ਕਾਇਮ ਕੀਤਾ ਜਾਵੇ, ਇਸ ਨਾਲ ਪੀੜਤਾਂ ਦੀ ਖੱਜਲ ਖੁਆਰੀ ਨਹੀਂ ਹੋਵੇਗੀ।

ਇਹ ਵੀ ਮੰਗ ਕੀਤੀ ਗਈ ਹੈ ਕਿ ਐਸਆਈਟੀ ਦੀ ਸਮਾਂ ਹੱਦ ਛੇ ਮਹੀਨੇ ਮਿਥੀ ਗਈ ਹੈ ਤੇ ਇਸੇ ਹੱਦ ਵਿਚ ਹੀ ਫੁਰਤੀ ਨਾਲ ਮਾਮਲਿਆਂ ਦਾ ਨਿਪਟਾਰਾ ਕੀਤਾ ਜਾਵੇ ਕਿਉਂਕਿ ਪਹਿਲਾਂ ਹੀ ਕਤਲੇਆਮ ਨੂੰ 34 ਸਾਲ ਬੀਤ ਚੁਕੇ ਹਨ ਅਤੇ ਦੋਸ਼ੀ ਅਜੇ ਵੀ ਖੁਲ੍ਹੇਆਮ ਘੁੰਮ ਰਹੇ ਹਨ। ਉਨ੍ਹਾਂ ਦਸਿਆ ਕਿ ਗ੍ਰਹਿ ਸਕੱਤਰ ਅਰਵਿੰਦ ਕੁਮਾਰ ਨੇ ਭਰੋਸਾ ਦਿਤਾ ਹੈ ਕਿ ਐਸਆਈਟੀ ਦਾ ਦਫ਼ਤਰ ਇਕ ਹਫ਼ਤੇ ਤਕ ਬਣਾ ਦਿਤਾ ਜਾਵੇਗਾ ਤੇ ਇਹ ਕਾਨਪੁਰ ਵਿਖੇ ਹੀ ਰੱਖਿਆ ਜਾਵੇਗਾ।