ਚੀਫ਼ ਖ਼ਾਲਸਾ ਦੀਵਾਨ ਦੇ ਮੈਂਬਰ ਵੀ ਡੇਰਾਵਾਦ ਦੇ ਉਪਾਸਕ?

cifa-khalasa-divana-de-maimbara-vi-deravada-de-upasaka

ਤਰਨਤਾਰਨ, 14 ਮਾਰਚ (ਚਰਨਜੀਤ ਸਿੰਘ): ਚੀਫ਼ ਖ਼ਾਲਸਾ ਦੀਵਾਨ ਦੀ ਨਿਘਰ ਰਹੀ ਹਾਲਤ ਪਿੱਛੇ ਦੀਵਾਨ ਦੇ ਮੈਂਬਰਾਂ ਦੀ ਚੋਣ ਕਰਨ ਵਾਲੀਆਂ ਧਿਰਾਂ ਦੀ ਭੂਮਿਕਾ ਨੂੰ ਵੀ ਅਖੋ ਪਰੋਖੇ ਨਹੀਂ ਕੀਤਾ ਜਾ ਸਕਦਾ।    ਜਾਣਕਾਰੀ ਮੁਤਾਬਕ ਦੀਵਾਨ ਦੇ 520 ਮੈਂਬਰਾਂ ਵਿਚੋਂ ਬਹੁਗਿਣਤੀ ਮੈਂਬਰ ਸ਼ਰਾਬ ਆਦਿ ਦੀ ਵਰਤੋ ਤਾਂ ਕਰਦੇ ਹੀ ਹਨ, ਦਾਹੜੀ ਰੰਗਣ ਅਤੇ ਰੋਮਾਂ ਦੀ ਬੇਅਦਬੀ ਜਿਹੀ ਕੁਰਹਿਤ ਕਰਨ ਵਿਚ ਵੀ ਪਿੱਛੇ ਨਹੀਂ ਹਨ। ਇਥੇ ਹੀ ਬੱਸ ਨਹੀਂ, ਪਤਾ ਲਗਾ ਹੈ ਕਿ ਦੀਵਾਨ ਦੇ ਕੁੱਝ ਮੈਂਬਰ ਡੇਰਾਵਾਦ ਦੇ ਵੀ ਉਪਾਸਕ ਹਨ। ਦੀਵਾਨ ਦੇ ਮੂਲ ਸੂਤ੍ਰ ਭਾਵ ਵਿਧਾਨ ਮੁਤਾਬਕ ਮੈਂਬਰ ਬਣਨ ਦੀ ਸ਼ਰਤ ਤੇ ਗੌਰ ਕੀਤਾ ਜਾਵੇ ਤਾਂ ਸਪੱਸ਼ਟ ਤੌਰ 'ਤੇ ਅਕਿੰਤ ਹੈ ਕਿ ਦੀਵਾਨ ਦਾ ਮੈਂਬਰ ਸਿਰਫ਼ ਉਹ ਹੀ ਵਿਅਕਤੀ ਬਣ ਸਕਦਾ ਹੈ ਜੋ ਸਾਬਤ ਸੂਰਤ, ਅੰਮ੍ਰਿਤਧਾਰੀ ਹੈ। ਅੱਜ ਹਾਲਾਤ ਇਹ ਹਨ ਕਿ ਦੀਵਾਨ ਵਿਚ ਸਿੱਖ ਰਹਿਤ ਮਰਿਆਦਾ ਦੇ ਉਲਟ ਜਾ ਕੇ ਕੰਮ 

ਕਰਨ ਵਾਲੇ ਮੈਂਬਰ ਵੀ ਸ਼ਾਮਲ ਹਨ। ਦੀਵਾਨ ਦੇ ਅਹੁਦੇਦਾਰਾਂ ਦੀ ਚੋਣ ਲੜ ਰਹੇ ਮੈਂਬਰਾਂ ਵਿਚੋ ਇਕ ਮੈਂਬਰ 'ਤੇ ਦੋਸ਼ ਲਗਦਾ ਆ ਰਿਹਾ ਹੈ ਕਿ ਉਹ ਨਿਰੰਕਾਰੀ ਦਰਬਾਰ ਦਿੱਲੀ ਨਾਲ ਜੁੜਿਆ ਹੋਇਆ ਹੈ ਤੇ ਨਿਰੰਕਾਰੀ ਦਰਬਾਰ ਵਲੋਂ ਹਰ ਸਾਲ ਕਰਵਾਏ ਜਾਣ ਵਾਲੇ ਮੁੱਖ ਸਮਾਗਮ ਵਿਚ ਹਿੱਸਾ ਲੈਣ ਲਈ ਜਾਂਦਾ ਹੈ। ਜੇ ਅਜਿਹਾ ਹੈ ਤਾਂ ਇਹ ਸਿੱਧੇ ਤੌਰ ਤੇ ਅਕਾਲ ਤਖ਼ਤ ਤੋਂ ਜਾਰੀ 10 ਜੂਨ 1978 ਦੇ ਹੁਕਮਨਾਮੇ ਦੀ ਉਲੰਘਣਾ ਹੈ।  ਦਸਿਆ ਜਾਂਦਾ ਹੈ ਕਿ ਉਕਤ ਪਿਛਲੇ ਕਰੀਬ 20 ਸਾਲ ਤੋਂ ਮੈਂਬਰ ਹਨ।  ਕੀ ਕਿਸੇ ਵੀ ਮੈਂਬਰ ਨੇ ਉਨ੍ਹਾਂ ਨੂੰ ਪੰਥ ਕਦੀ ਮੁੱਖ ਧਾਰਾ ਵਿਚ ਸ਼ਾਮਲ ਹੋਣ ਲਈ ਪ੍ਰੇਰਿਤ ਨਹੀਂ ਕੀਤਾ? ਇਹ ਸਵਾਲ ਪੂਰੇ ਦੀਵਾਨ ਦੇ ਮੈਂਬਰਾਂ ਵਲ ਹੈ।