ਗੁਰਦਵਾਰੇ 'ਤੇ ਕਬਜ਼ਾ ਲੈਣ ਲਈ ਚੱਲੀ ਗੋਲੀ, ਕਈ ਜ਼ਖ਼ਮੀ

guradavare-te-kabaza-laina-la-i-cali-goli-ka-i-zakhami

ਮਾਨੋਚਾਹਲ ਦੇ ਗੁਰਦਵਾਰਾ ਜੋਗੀ ਪੀਰ ਵਿਖੇ ਵਾਪਰੀ ਘਟਨਾ ਗੁਰਦਵਾਰੇ ਵਿਚ ਖੜੀਆਂ ਗੱਡੀਆਂ ਨੂੰ ਲਾਈ ਅੱਗ

ਤਰਨਤਾਰਨ, 13 ਮਾਰਚ (ਚਰਨਜੀਤ ਸਿੰਘ): ਗੁਰਦਵਾਰੇ 'ਤੇ ਕਬਜ਼ੇ ਨੂੰ ਲੈ ਕੇ ਅੱਜ ਦੋ ਧਿਰਾਂ ਵਿਚਾਲੇ ਹੋਈ ਗੋਲੀਬਾਰੀ ਕਾਰਨ ਦੋ ਦਰਜਨ ਵਿਅਕਤੀ ਜ਼ਖ਼ਮੀ ਹੋ ਗਏ ਜਿਨ੍ਹਾਂ ਵਿਚੋਂ ਛੇ ਦੀ ਹਾਲਤ ਗੰਭੀਰ ਬਣੀ ਹੋਈ ਹੈ। ਇਸ ਲੜਾਈ ਵਿਚ ਕੁੱਝ ਵਿਅਕਤੀਆਂ ਨੇ ਗੁਰਦਵਾਰੇ ਵਿਚ ਖੜੇ ਵਾਹਨਾਂ ਨੂੰ ਵੀ ਅੱਗ ਲਗਾ ਦਿਤੀ। ਮੌਕੇ 'ਤੇ ਪੁੱਜੀ ਪੁਲਿਸ ਨੇ ਸਥਿਤੀ ਨੂੰ ਕੰਟਰੋਲ ਕਰ ਲਿਆ ਅਤੇ ਵੱਡੀ ਗਿਣਤੀ ਵਿਚ ਪੁਲਿਸ ਜਵਾਨ ਤੈਨਾਤ ਕਰ ਦਿਤੇ।  ਪੁਲਿਸ ਨੇ ਗੁਰਦਵਾਰੇ 'ਤੇ ਕਬਜ਼ਾ ਕਰਨ ਆਏ ਇਕ ਧੜੇ ਦੇ ਮੁਖੀ ਜੋਧਾ ਸਿੰਘ ਅਤੇ ਕਈ ਹੋਰਾਂ ਵਿਰੁਧ ਮਾਮਲਾ ਦਰਜ ਕਰ ਲਿਆ ਹੈ। ਜਾਣਕਾਰੀ ਅਨੁਸਾਰ ਪਿੰਡ ਮਾਨੋਚਾਹਲ ਦੇ ਚਾਹਲ ਗੋਤ ਦੇ ਜਠੇਰਿਆਂ ਨਾਲ ਸਬੰਧਤ ਇਹ ਗੁਰਦਵਾਰਾ ਜੋਗੀ ਪੀਰ ਕਈ ਦਹਾਕੇ ਪੁਰਾਣਾ ਹੈ ਅਤੇ ਅੰਮ੍ਰਿਤ ਵੇਲੇ ਹੀ ਗ੍ਰੰਥੀ ਸਿੰਘਾਂ ਵਲੋਂ ਇਥੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦਾ ਪ੍ਰਕਾਸ਼ ਕਰ ਦਿਤਾ ਜਾਂਦਾ ਹੈ। ਦਸਿਆ ਜਾਂਦਾ ਹੈ ਕਿ ਕੁੱਝ ਸਮਾਂ ਪਹਿਲਾਂ ਗੁਰਦਵਾਰੇ ਦੀ ਪ੍ਰਬੰਧਕ ਕਮੇਟੀ ਦੇ ਮੈਂਬਰ ਜੋਧਾ ਸਿੰਘ ਜੋ ਨਸ਼ੇ ਕਰਨ ਦਾ ਆਦੀ ਦਸਿਆ ਜਾਂਦਾ ਹੈ ਅਤੇ ਇਕ ਸੇਵਾਦਾਰ ਦੇ ਕਤਲ ਕੇਸ ਵਿਚ ਉਸ ਨੂੰ ਸਜ਼ਾ ਵੀ ਹੋ ਚੁੱਕੀ ਹੈ ਜਿਸ ਕਰ ਕੇ ਉਸ ਨੂੰ ਪ੍ਰਬੰਧਕ ਕਮੇਟੀ ਵਿਚੋਂ ਕੱਢ ਦਿਤਾ ਗਿਆ ਸੀ ਅਤੇ ਜੋਧਾ ਸਿੰਘ ਇਸ ਸਮੇਂ ਗੁਰਦਵਾਰੇ ਨੇੜੇ ਹੀ ਰਹਿ ਰਿਹਾ ਸੀ ਅਤੇ ਅੱਜ ਜੋਧਾ ਸਿੰਘ ਨੇ ਗੁਰਦਵਾਰੇ 'ਤੇ ਕਰਜ਼ਾ ਕਰਨ ਦੀ ਨੀਯਤ ਨਾਲ 5 ਦਰਜਨ ਦੇ ਕਰੀਬ ਹਥਿਆਰਬੰਦ ਵਿਅਕਤੀ ਅਪਣੇ ਮਕਾਨ ਵਿਚ ਇਕੱਠੇ ਕਰ ਲਏ ਅਤੇ ਜਦ ਅੰਮ੍ਰਿਤ ਵੇਲੇ ਸੰਗਤ ਗੁਰਦਵਾਰੇ ਆਉਣੀ ਸ਼ੁਰੂ ਹੋਈ ਤਾਂ ਜੋਧਾ ਸਿੰਘ ਅਤੇ ਉਸ ਦੇ ਸਾਥੀਆਂ ਨੇ ਸੰਗਤ ਅਤੇ ਪ੍ਰਬੰਧਕ ਕਮੇਟੀ 'ਤੇ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕਰ ਦਿਤੀਆਂ।