ਗੁਰਦਵਾਰੇ ਦੀ ਉਸਾਰੀ ਅਧੀਨ ਇਮਾਰਤ ਡਿੱਗਣ ਕਾਰਨ ਛੇ ਲੋਕ ਦਬੇ

ਨੌਹਰ : ਹਨੂੰਮਾਨਗੜ੍ਹ ਦੇ ਨੇੜਲੇ ਪਿੰਡ ਚੱਕ ਦੇਈਦਾਸ ਪੁਰਾ ਵਿਚ ਉਸਾਰੀ ਅਧੀਨ ਗੁਰਦਵਾਰੇ ਦਾ ਇਕ ਹਿੱਸਾ ਢਹਿ ਜਾਣ ਕਾਰਨ ਛੇ ਲੋਕਾਂ ਦੇ ਦਬੇ ਜਾਣ ਦੀ ਖ਼ਬਰ ਹੈ। ਇਹ ਹਾਦਸਾ ਰਾਤ ਤਕਰੀਬਨ ਪੌਣੇ ਤਿੰਨ ਵਜੇ ਵਾਪਰਿਆ। ਹਾਦਸੇ ਦੇ ਕਾਰਨਾਂ ਦਾ ਹਾਲੇ ਤਕ ਪਤਾ ਨਹੀਂ ਲੱਗ ਸਕਿਆ। ਮਲਬੇ ਹੇਠ ਦੱਬਣ ਵਾਲੇ ਲੋਕ ਉਸਾਰੀ ਅਧੀਨ ਇਮਾਰਤ ਵਿਚ ਹੀ ਸੌਂ ਰਹੇ ਸਨ। ਮੌਕੇ 'ਤੇ ਪਹੁੰਚੇ ਪਿੰਡ ਵਾਲਿਆਂ ਨੇ ਤਿੰਨ ਵਿਅਕਤੀਆਂ ਨੂੰ ਮਲਬੇ ਹੇਠੋਂ ਕੱਢ ਲਿਆ। ਹਾਲੇ ਵੀ ਤਿੰਨ ਜਣੇ ਮਲਬੇ ਹੇਠ ਦਬੇ ਹੋਏ ਹਨ।

ਉਸਾਰੀ ਅਧੀਨ ਗੁਰਦੁਆਰਾ ਸ੍ਰੀ ਲੰਗਰ ਸਾਹਿਬ ਦੇ ਇਕ ਹਿੱਸੇ ਦੇ ਡਿੱਗ ਜਾਣ ਤੋਂ ਬਾਅਦ ਸਥਾਕ ਐਸਡੀਐਮ ਸਈਅਦ ਸਿਰਾਜ ਅਲੀ ਜ਼ੈਦੀ, ਪੁਲਿਸ ਕਮਿਸ਼ਨਰ ਅਤਰ ਸਿੰਘ ਪੂਨੀਆ, ਤਹਿਸੀਲਦਾਰ ਜੈ ਕੌਸ਼ਿਕ ਸਮੇਤ ਹੋਰ ਕਈ ਪ੍ਰਸ਼ਾਸਨਿਕ ਅਧਿਕਾਰੀ ਮੌਕੇ 'ਤੇ ਪਹੁੰਚੇ। ਮੌਕੇ 'ਤੇ ਰਾਹਤ ਅਤੇ ਬਚਾਅ ਕਾਰਜ ਜਾਰੀ ਹੈ। ਸਿਵਲ ਡਿਫ਼ੈਂਸ ਦੀ ਟੀਮ ਵੀ ਬਚਾਅ ਕਾਰਜ ਵਿਚ ਜੁਟੀ ਹੋਈ ਹੈ। ਦਬੇ ਹੋਏ ਲੋਕਾਂ ਨੂੰ ਕਢਣ ਲਈ ਪੰਜ ਜੇਸੀਬੀ ਮਸ਼ੀਨਾਂ ਦੀ ਮਦਦ ਲਈ ਜਾ ਰਹੀ ਹੈ।    (ਪੀ.ਟੀ.ਆਈ)