Er. Manvinder Singh Giaspura Honored

ਲੁਧਿਆਣਾ: ਹੋਂਦ ਚਿੱਲੜ ਤਾਲਮੇਲ ਕਮੇਟੀ ਦੇ ਪ੍ਰਧਾਨ ਇੰਜੀ. ਮਨਵਿੰਦਰ ਸਿੰਘ ਗਿਆਸਪੁਰਾ ਨੇ ਕਿਹਾ ਕਿ ਉਨ੍ਹਾਂ ਦੀ ਦੀ ਜ਼ਿੰਦਗੀ ਦਾ ਮਕਸਦ ਹੋਂਦ ਚਿੱਲਣ ਕਾਂਡ ਦੇ ਦੋਸ਼ੀਆਂ ਨੂੰ ਸਜ਼ਾ ਦਿਵਾਉਣਾ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਵਿਚ ਕਾਗਰਸ ਦੀ ਸਰਕਾਰ ਹੈ ਅਤੇ ਲੁਧਿਆਣਾ ਦੀ ਪੁਲਿਸ ਉਸ 'ਤੇ ਕੇਸ ਵਾਪਸ ਲੈਣ ਦਾ ਦਬਾਅ ਬਣਾ ਕੇ ਡਰਾ ਧਮਕਾ ਰਹੀ ਹੈ ਪਰ ਉਹ ਧਮਕੀਆਂ ਦੀ ਪਰਵਾਹ ਕੀਤੇ ਬਿਨਾਂ ਅਪਣੇ ਮਿਸ਼ਨ 'ਤੇ ਡਟੇ ਹੋਏ ਹਨ । 

ਇਸ ਦੌਰਾਨ ਅੱਜ ਗੁਰਦਵਾਰਾ ਸਿੰਘ ਸਭਾ ਗੁੜਗਾਉਂ ਦੇ ਪ੍ਰਬੰਧਕ ਕਮੇਟੀ ਦੇ ਆਗੂਆ ਵਲੋਂ 'ਹੋਦ ਚਿੱਲੜ ਗੁੜਗਾਉਂ, ਪਟੌਦੀ' ਵਿਚ ਕਤਲ ਕੀਤੇ 79 ਸਿੱਖਾਂ ਦੀ ਲੜਾਈ ਲੜਨ ਵਾਲੇ 'ਹੋਦ ਚਿੱਲੜ ਤਾਲਮੇਲ ਕਮੇਟੀ' ਦੇ ਪ੍ਰਧਾਨ ਇੰਜੀ. ਮਨਵਿੰਦਰ ਸਿੰਘ ਗਿਆਸਪੁਰਾ ਨੂੰ ਕ੍ਰਿਪਾਨ ਭੇਂਟ ਕਰ ਕੇ ਸਨਮਾਨਤ ਕੀਤਾ ਗਿਆ। ਗੁਰਦਵਾਰਾ ਕਮੇਟੀ ਦੇ ਆਗੂ ਇੰਜੀ. ਕੁਲਵਿੰਦਰ ਸਿੰਘ ਚੀਮਾਂ ਨੇ ਦਸਿਆ ਕਿ 2011 ਵਿਚ ਇੰਜੀ. ਗਿਆਸਪੁਰਾ ਨੇ ਅਪਣੀ ਇਕ ਲੱਖ ਰੁਪਏ ਮਹੀਨੇ ਦੀ ਨੌਕਰੀ ਛੱਡ ਕੇ 79 ਸਿੱਖਾਂ ਦੇ ਸਮੂਹਕ ਕਤਲੇਆਮ ਦੇ ਕੇਸਾਂ ਦੀ ਪੈਰਵਾਈ ਸੁਰੂ ਕੀਤੀ ਸੀ।

ਉਨ੍ਹਾਂ ਦੀ ਲਗਾਤਾਰ ਮਿਹਨਤ ਸਦਕਾ 34 ਸਾਲਾਂ ਬਾਅਦ ਪੀੜਤ ਪਰਵਾਰਾਂ ਨੂੰ 22.6 ਕਰੋੜ ਰੁਪਏ ਮਿਲੇ ਹਨ ਅਤੇ 34 ਸਾਲਾਂ ਤੋਂ ਭਟਕ ਰਹੇ ਪੀੜਤਾਂ ਨੂੰ ਕੁੱਝ 'ਰਾਹਤ ਦੀ ਆਸ' ਮਿਲੀ ਹੈ । ਉਨ੍ਹਾਂ ਕਿਹਾ ਕਿ ਹੁਣ ਇੰਜੀ. ਗਿਆਸਪੁਰਾ ਵਲੋਂ ਦੋਸ਼ੀ ਪੁਲਿਸ ਅਫ਼ਸਰਾਂ ਵਿਰੁਧ ਵੀ ਪੰਜਾਬ ਹਰਿਆਣਾ ਹਾਈ ਕੋਰਟ ਵਿਚ ਪਟੀਸ਼ਨ ਦਾਖ਼ਲ ਕੀਤੀ ਹੋਈ ਹੋਈ ਹੈ ਜਿਸ ਦੀ ਉਹ ਇਕੱਲੇ ਹੀ ਪੈਰਵਾਈ ਕਰਦੇ ਹਨ ਅਤੇ ਕਾਤਲਾਂ ਨੂੰ ਸਜ਼ਾਵਾਂ ਦਿਵਾਉਣ ਲਈ ਯਤਨ ਕਰ ਰਹੇ ਹਨ। ਇਸ ਮੌਕੇ ਗੁੜਗਾਉਂ ਤੋਂ ਸੰਤੋਖ ਸਿੰਘ ਸਾਹਨੀ, ਹੋਂਦ ਚਿੱਲੜ ਤਾਲਮੇਲ ਕਮੇਟੀ ਦੇ ਜਨਰਲ ਸਕੱਤਰ ਗਿਆਨ ਸਿੰਘ, ਹਰਜੀਤ ਸਿੰਘ ਆਦਿ ਹਾਜ਼ਰ ਸਨ ।