ਜ਼ੀਰਕਪੁਰ, 25 ਦਸੰਬਰ (ਐੱਸ ਅਗਨੀਹੋਤਰੀ) : ਪਿਲਸ ਨੇ ਭਬਾਤ ਖੇਤਰ ਵਿਚ ਨਕਲੀ ਸ਼ਰਾਬ ਬਣਾਉਣ ਵਾਲੀ ਇਕ ਫ਼ੈਕਟਰੀ ਫੜੀ ਹੈ। ਭਬਾਤ ਖੇਤਰ ਵਿਚ ਇਕ ਗੁਦਾਮ ਵਿਚ ਚੱਲ ਰਹੀ ਇਹ ਫ਼ੈਕਟਰੀ ਨਾਮੀ ਬ੍ਰਾਡਾਂ ਦੀਆਂ ਬੋਤਲਾਂ ਵਿਚ ਨਕਲੀ ਸ਼ਰਾਬ ਭਰੀ ਹੋਈ ਸੀ। ਪੁਲਿਸ ਨੇ ਮੌਕੇ ਤੇ ਨਕਲੀ ਸ਼ਰਾਬ ਭਰਦੇ ਪੰਜ ਜਣਿਆਂ ਨੂੰ ਰੰਗੇ ਹੱਥੀ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਨੇ ਮੌਕੇ ਤੇ ਹਜ਼ਾਰਾਂ ਲੀਟਰ ਨਕਲੀ ਸ਼ਰਾਬ, ਸੈਂਕੜੇ ਲੀਟਰ ਸਪਿਰਿਟ, ਵਿਸਕੀ ਅਤੇ ਰੰਮ ਬਣਾਉਣ ਲਈ ਫਲੇਵਰ ਸਮੇਤ ਹੋਰ ਸਾਮਾਨ ਬਰਾਮਦ ਕੀਤਾ ਹੈ। ਮੌਕੇ ਤੋਂ ਫੜੇ ਗਏ ਮੁਲਜ਼ਮਾਂ ਦੀ ਪਛਾਣ ਅਜੈ ਗਰੋਵਰ ਅਤੇ ਮਨੀਸ਼ ਕੁਮਾਰ ਵਾਸੀਆਨ ਮਨੀਮਾਜਰਾ, ਹਰਦੇਵ ਸਿੰਘ ਅਤੇ ਮਨਦੀਪ ਸਿੰਘ ਵਾਸੀਆਨ ਖਰੜ, ਗੁਰਪ੍ਰੀਤ ਸਿੰਘ ਉਰਫ਼ ਹੈਪੀ ਵਾਸੀ ਜ਼ੀਰਕਪੁਰ ਦੇ ਰੂਪ ਵਿਚ ਹੋਈ ਹੈ। ਇਨਾਂ ਖ਼ਿਲਾਫ਼ ਪੁਲਿਸ ਨੇ ਵੱਖ ਵੱਖ ਧਾਰਾਵਾਂ ਤਹਿਤ ਕੇਸ ਦਰਜ ਕਰ ਅਗਲੀ ਕਾਰਵਾਈ ਆਰੰਭ ਕਰ ਦਿੱਤੀ ਹੈ।