'ਸਪੋਕਸਮੈਨ ਟੀਵੀ' 'ਤੇ ਬੋਲੇ ਖ਼ਜ਼ਾਨਾ ਮੰਤਰੀ

ਕੇਂਦਰੀ ਬਜਟ ਵਿਚ ਮਹਾਤਮਾ ਗਾਂਧੀ ਦੇ ਸਮਾਗਮਾਂ ਲਈ 150 ਕਰੋੜ ਰੁਪਏ ਪਰ ਬਾਬੇ ਨਾਨਕ ਦੇ ਸਮਾਗਮਾਂ ਲਈ ਠੂਠ : ਮਨਪ੍ਰੀਤ

ਕੇਂਦਰੀ ਬਜਟ ਵਿਚ ਮਹਾਤਮਾ ਗਾਂਧੀ ਦੇ ਸਮਾਗਮਾਂ ਲਈ 150 ਕਰੋੜ ਰੁਪਏ ਪਰ ਬਾਬੇ ਨਾਨਕ ਦੇ ਸਮਾਗਮਾਂ ਲਈ ਠੂਠ : ਮਨਪ੍ਰੀਤ
ਚੰਡੀਗੜ੍ਹ, 5 ਫ਼ਰਵਰੀ (ਨੀਲ ਭਲਿੰਦਰ ਸਿੰਘ) : ਪੰਜਾਬ ਦੀ 'ਪੰਥ ਹਿਤੈਸ਼ੀ' ਪਾਰਟੀ ਅਕਾਲੀ ਦਲ ਦੀ ਕੇਂਦਰ ਸਰਕਾਰ 'ਚ ਸਰਗਰਮ ਭਾਈਵਾਲੀ ਦੇ ਬਾਵਜੂਦ ਕੇਂਦਰ ਨੇ ਨਾਨਕ ਦੇਵ ਜੀ ਦੇ 550ਵੇਂ ਪ੍ਰਕਾਸ਼ ਪੁਰਬ ਦਾ ਜਸ਼ਨ ਮਨਾਉਣ ਲਈ ਫ਼ੰਡ ਦੇਣ ਬਾਬਤ ਆਮ ਬਜਟ ਵਿਚ ਜ਼ਿਕਰ ਤਕ ਨਹੀਂ ਕੀਤਾ ਹਾਲਾਂਕਿ ਪੰਜਾਬ ਸਰਕਾਰ ਨੇ ਕੇਂਦਰ ਕੋਲੋਂ ਵਿਸ਼ੇਸ਼ ਪੈਕੇਜ ਦੀ ਮੰਗ ਕੀਤੀ ਸੀ। ਪੰਜਾਬ ਦੇ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਕੋਲੋਂ ਇਸ ਬਾਬਤ ਪੁੱਛੇ ਜਾਣ 'ਤੇ ਉਨ੍ਹਾਂ ਪੁਸ਼ਟੀ ਕੀਤੀ ਕਿ ਉਹ ਖ਼ੁਦ ਇਹ ਮੰਗ ਲੈ ਕੇ ਕੇਂਦਰ ਦੀ ਨਰਿੰਦਰ ਮੋਦੀ ਸਰਕਾਰ ਕੋਲ ਗਏ ਸਨ। ਉਨ੍ਹਾਂ ਕੇਂਦਰੀ ਬਜਟ ਨੂੰ ਰਾਜਾਂ ਲਈ ਬੇਹੱਦ ਖੋਖਲਾ ਅਤੇ ਨੁਕਸਾਨਦਾਇਕ ਕਰਾਰ ਦਿੰਦਿਆਂ ਕਿਹਾ ਕਿ 'ਅਸੀਂ ਕੇਂਦਰ ਸਰਕਾਰ ਕੋਲੋਂ ਘੱਟੋ ਘੱਟ 200 ਕਰੋੜ ਰੁਪਏ ਦੀ ਵਿਸ਼ੇਸ਼ ਗ੍ਰਾਂਟ ਦੀ ਮੰਗ ਕੀਤੀ ਸੀ। ਇਸ ਤੋਂ ਇਲਾਵਾ ਸਾਲ 2019 ਵਿਚ 13 ਅਪ੍ਰੈਲ, 1919 (ਵਿਸਾਖੀ ਮੌਕੇ) ਜਲਿਆਂਵਾਲੇ ਬਾਗ਼ ਦੇ ਖ਼ੂਨੀ ਸਾਕੇ ਦੇ ਸੌ ਸਾਲ ਪੂਰੇ ਹੋਣ ਮੌਕੇ ਵੀ ਅਕਾਦਮਿਕ, ਖੋਜ ਅਤੇ ਅਜਾਇਬ ਘਰ ਪ੍ਰਾਜੈਕਟਾਂ ਲਈ 100 ਕਰੋੜ ਰੁਪਏ ਦੇ ਪੈਕੇਜ ਦੀ ਮੰਗ ਰੱਖੀ ਗਈ ਸੀ ਪਰ ਕੇਂਦਰ ਨੇ ਇਸ ਬਾਬਤ ਵੀ ਚੁੱਪ ਹੀ ਧਾਰ ਲਈ।