ਨਵੀਂ ਦਿੱਲੀ: ਬਾਲੀਵੁਡ ਅਦਾਕਾਰਾ ਸ਼੍ਰੀਦੇਵੀ ਦਾ ਮ੍ਰਿਤਕ ਸਰੀਰ ਅਜੇ ਵੀ ਭਾਰਤ ਨਹੀਂ ਆਇਆ ਹੈ। ਸ਼੍ਰੀਦੇਵੀ ਦੀ ਮ੍ਰਿਤਕ ਦੇਹ ਨੂੰ ਭਾਰਤ ਲਿਆਉਣ ‘ਚ ਅਜੇ ਤੱਕ ਸਫਲਤਾ ਨਹੀਂ ਮਿਲ ਸਕੀ ਹੈ। ਹੁਣ ਤੱਕ ਸ਼੍ਰੀਦੇਵੀ ਦੀ ਮੌਤ ਨਾਲ ਜੁੜੀਆਂ ਕਈ ਥਿਓਰੀਆਂ ਸਾਹਮਣੇ ਆ ਚੁੱਕੀਆਂ ਹਨ।
ਦੁਬਈ ਫੋਰੈਂਸਿਕ ਡਿਪਾਰਟਮੈਂਟ ਕਿਸੇ ਵੀ ਤਰ੍ਹਾਂ ਦੀ ਅਪਰਾਧਿਕ ਸਾਜ਼ਿਸ਼ ਦੇ ਐਂਗਲ ਨੂੰ ਵੀ ਨਕਾਰ ਚੁੱਕਾ ਹੈ ਪਰ ਪਬਲਿਕ ਪ੍ਰਾਸੀਕਿਊਸ਼ਨ ਆਟੋਪਸੀ ਰਿਪੋਰਟ ਤੋਂ ਸੰਤੁਸ਼ਟ ਨਹੀਂ ਦੱਸਿਆ ਜਾ ਰਿਹਾ ਹੈ। ਪਬਲਿਕ ਪ੍ਰਾਸੀਕਿਊਸ਼ਨ ਨੇ ਉਸ ਹੋਟਲ ਦੀ ਸੀ.ਸੀ.ਟੀ.ਵੀ. ਫੁਟੇਜ ਮੰਗਵਾਈ ਹੈ, ਜਿਸ ‘ਚ ਸ਼੍ਰੀਦੇਵੀ ਦੀ ਮੌਤ ਹੋਈ ਹੈ।
ਦਰਅਸਲ, ਸ਼੍ਰੀਦੇਵੀ ਦਾ ਪੋਸਟਮਾਰਟਮ ਐਤਵਾਰ ਨੂੰ ਹੀ ਹੋ ਚੁੱਕਿਆ ਸੀ, ਪਰ ਰਿਪੋਰਟ ਆਉਣ ਵਿੱਚ ਦੇਰੀ ਹੋਈ ਸੀ। ਇਸ ਕਾਰਨ ਸ਼੍ਰੀਦੇਵੀ ਦਾ ਡੈੱਥ ਸਰਟੀਫਿਕੇਟ ਵੀ ਅਜੇ ਤੱਕ ਨਹੀਂ ਬਣਿਆ ਸੀ। ਅਜੇ ਤੱਕ ਸ਼੍ਰੀਦੇਵੀ ਦਾ ਮ੍ਰਿਤਕ ਸਰੀਰ ਪੁਲਿਸ ਦੀ ਕਸਟਡੀ ਵਿੱਚ ਹੀ ਸੀ। ਕਾਨੂੰਨੀ ਪਰਿਕ੍ਰਿਆ ਵਿੱਚ ਦੋ ਤੋਂ ਤਿੰਨ ਘੰਟੇ ਲੱਗਣ ਦੇ ਕਾਰਨ ਲਗਾਤਾਰ ਦੇਰੀ ਹੁੰਦੀ ਗਈ।