ਲੌਕਡਾਊਨ ਦੇ ਚਲਦਿਆਂ ਪ੍ਰਵਾਸੀ ਮਜ਼ਦੂਰ ਸਭ ਤੋਂ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਏ ਹਨ।
ਨਵੀਂ ਦਿੱਲੀ: ਲੌਕਡਾਊਨ ਦੇ ਚਲਦਿਆਂ ਪ੍ਰਵਾਸੀ ਮਜ਼ਦੂਰ ਸਭ ਤੋਂ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਏ ਹਨ। ਉਤਪਾਦਨ ਅਤੇ ਨਿਰਮਾਣ ਗਤੀਵਿਧੀਆਂ ਦੇ ਰੁਕਣ ਨਾਲ, ਪੈਸੇ ਅਤੇ ਭੋਜਨ ਦੀ ਕਮੀ ਨਾਲ ਪੂਰੇ ਭਾਰਤ ਵਿਚ ਲੱਖਾਂ ਪ੍ਰਵਾਸੀ ਮਜ਼ਦੂਰ ਅਪਣੇ ਘਰਾਂ ਤੱਕ ਪਹੁੰਚਣ ਲਈ ਪੈਦਲ ਜਾਣ ਨੂੰ ਮਜਬੂਰ ਹਨ।
Photo
ਇਸ ਦੌਰਾਨ ਇੰਟਰਨੈੱਟ ਤੇ ਪ੍ਰਵਾਸੀ ਮਜ਼ਦੂਰਾਂ ਦੀਆਂ ਫੋਟੋਆਂ ਤੇ ਵੀਡੀਓਜ਼ ਕਾਫੀ ਵਾਇਰਲ ਹੋ ਰਹੇ ਹਨ। ਅਪਣੀ ਪਿੱਠ 'ਤੇ ਬੰਨੇ ਬੱਚੇ ਨੂੰ ਲੈ ਕੇ ਸਾਇਕਲ ਚਲਾਉਂਦੇ ਹੋਏ ਇਕ ਔਰਤ ਦੀ ਤਸਵੀਰ ਵੀ ਵਾਇਰਲ ਹੋ ਰਹੀ ਹੈ, ਜਿਸ ਵਿਚ ਸੋਸ਼ਲ ਮੀਡੀਆ ਯੂਜ਼ਰ ਦਾ ਦਾਅਵਾ ਹੈ ਕਿ ਲੌਕਡਾਊਨ ਦੌਰਾਨ ਪ੍ਰਵਾਸੀਆਂ ਲਈ ਜੀਵਨ ਕਿੰਨਾ ਔਖਾ ਹੈ।
Photo
ਕਾਂਗਰਸ ਦੇ ਸਟੂਡੈਂਟ ਵਿੰਗ ਐਨਐਸਯੂਆਈ ਦੇ ਰਾਸ਼ਟਰੀ ਸਕੱਤਰ ਹੋਣ ਦਾ ਦਾਅਵਾ ਕਰ ਰਹੇ ਵਿਨੋਦ ਜਾਖੜ ਨੇ ਇਹ ਫੋਟੋ ਟਵੀਟ ਕੀਤੀ, ਇਸ ਦੇ ਨਾਲ ਇਕ ਕੈਪਸ਼ਨ ਲਿਖਿਆ ਹੈ,'ਸਿਆਸਤ ਤੋਂ ਉੱਪਰ ਉੱਠੋ। ਅਸੰਵੇਦਨਸ਼ੀਲ ਨਾ ਬਣੋ। ਇਹਨਾਂ ਪ੍ਰਵਾਸੀਆਂ ਦੇ ਦਰਦ ਨੂੰ ਦੇਖੋ ਤੇ ਮਹਿਸੂਸ ਕਰੋ'। ਜਦੋਂ ਇਸ ਫੋਟੋ ਬਾਰੇ ਜਾਂਚ ਕੀਤੀ ਗਈ ਤਾਂ ਪਾਇਆ ਕਿ ਇਸ ਫੋਟੋ ਨਾਲ ਕੀਤਾ ਜਾ ਰਿਹਾ ਦਾਅਵਾ ਗਲਤ ਹੈ।
Photo
ਜਾਂਚ ਵਿਚ ਸਾਹਮਣੇ ਆਇਆ ਕਿ ਇਹ ਫੋਟੋ 6 ਸਾਲ ਪੁਰਾਣੀ ਹੈ ਤੇ ਇਸ ਦਾ ਲੌਕਡਾਊਨ ਦੌਰਾਨ ਪ੍ਰਭਾਵਿਤ ਹੋਏ ਪ੍ਰਵਾਸੀ ਮਜ਼ਦੂਰਾਂ ਨਾਲ ਕੋਈ ਸਬੰਧ ਨਹੀਂ ਹੈ।
ਹੋਰਨਾਂ ਤੋਂ ਇਲਾਵਾ ਕਾਂਗਰਸ ਦੇ ਬੁਲਾਰੇ ਰਣਦੀਪ ਸੁਰਜੇਵਾਲਾ ਨੇ ਵੀ ਇਹ ਫੋਟੋ ਟਵੀਟ ਕੀਤੀ ਹੈ। ਇਸ ਦੇ ਨਾਲ ਕੈਪਸ਼ਨ ਲਿਖਿਆ ਸੀ, 'ਨਿਊ ਇੰਡੀਆ ਦਾ ਸੱਚ'। ਇਸ ਤੋਂ ਬਾਅਦ ਉਹਨਾਂ ਨੇ ਇਹ ਟਵੀਟ ਡਿਲੀਟ ਕਰ ਦਿੱਤਾ ਸੀ।
Photo
ਰਿਵਰਸ ਖੋਜ ਵਿਚ ਪਾਇਆ ਗਿਆ ਕਿ ਇਕ ਫੇਸਬੁੱਕ ਯੂਜ਼ਰ ਨੇ ਇਹ ਫੋਟੋ 1 ਜੁਲਾਈ 2014 ਨੂੰ ਪੋਸਟ ਕੀਤੀ ਸੀ। ਇਸ ਤੋਂ ਸਾਬਿਤ ਹੁੰਦਾ ਹੈ ਕਿ ਇਸ ਦਾ ਲੌਕਡਾਊਨ ਨਾਲ ਕੋਈ ਸਬੰਧ ਨਹੀਂ ਹੈ। ਇਮੇਜ ਸ਼ੇਅਰਿੰਗ ਸਰਵਿਸ Pinterest ਅਨੁਸਾਰ, ਇਹ ਤਸਵੀਰ ਨੇਪਾਲ ਦੇ ਨੇਪਾਲਗੰਜ ਦੀ ਹੈ ਤੇ ਇਹ ਕਈ ਸਾਲ ਪੁਰਾਣੀ ਹੈ।
Photo
ਫੈਕਟ ਚੈੱਕ
ਦਾਅਵਾ-ਸੋਸ਼ਲ ਮੀਡੀਆ 'ਤੇ ਇਕ ਫੋਟੋ ਇਸ ਦਾਅਵੇ ਨਾਲ ਵਾਇਰਲ ਹੋ ਰਹੀ ਹੈ ਕਿ ਇਹ ਫੋਟੋ ਲੌਕਡਾਊਨ ਦੌਰਾਨ ਪ੍ਰਭਾਵਿਤ ਹੋਏ ਪ੍ਰਵਾਸੀ ਮਜ਼ਦੂਰਾਂ ਦੀ ਹੈ। ਇਸ ਵਿਚ ਇਕ ਸਾਇਕਲ 'ਤੇ ਜਾ ਰਹੀ ਔਰਤ ਤੇ ਉਸ ਦੀ ਪਿੱਠ ਦੇ ਬੰਨੇ ਬੱਚੇ ਨੂੰ ਦਿਖਾਇਆ ਜਾ ਰਿਹਾ ਹੈ।
ਸੱਚਾਈ-ਇਹ ਤਸਵੀਰ ਨੇਪਾਲ ਦੇ ਨੇਪਾਲਗੰਜ ਦੀ ਹੈ ਤੇ ਇਹ 6 ਸਾਲ ਪੁਰਾਣੀ ਹੈ।
ਸੱਚ/ਝੂਠ-ਝੂਠ
