ਫ਼ੋਨ ਉੱਤੇ ਭਾਰਤ ਦੀ ਲੱਗੀ ਮੋਹਰ
ਨਵੀਂ ਦਿੱਲੀ - ਰਿਲਾਇੰਸ ਜਿਓ ਨੇ 4ਜੀ ਫੋਨ 'Jio Bharat V2' ਲਾਂਚ ਕਰ ਦਿੱਤਾ ਹੈ। 'Jio Bharat V2' ਬਹੁਤ ਹੀ ਸਸਤੀਆਂ ਕੀਮਤਾਂ 'ਤੇ ਉਪਲਬਧ ਹੋਵੇਗਾ, ਇਸ ਦੀ ਕੀਮਤ 999 ਰੁਪਏ ਰੱਖੀ ਗਈ ਹੈ। ਕੰਪਨੀ ਭਾਰਤ 'ਚ 25 ਕਰੋੜ 2ਜੀ ਗਾਹਕਾਂ 'ਤੇ ਨਜ਼ਰ ਰੱਖ ਰਹੀ ਹੈ। ਇਹ ਗਾਹਕ ਫਿਲਹਾਲ ਏਅਰਟੈੱਲ ਅਤੇ ਵੋਡਾਫੋਨ-ਆਈਡੀਆ ਵਰਗੀਆਂ ਕੰਪਨੀਆਂ ਨਾਲ ਜੁੜੇ ਹੋਏ ਹਨ। ਤੁਹਾਨੂੰ ਦੱਸ ਦਈਏ ਕਿ ਰਿਲਾਇੰਸ ਜੀਓ ਸਿਰਫ਼ 4ਜੀ ਅਤੇ 5ਜੀ ਨੈੱਟਵਰਕ ਆਪਰੇਟ ਕਰਦਾ ਹੈ। ਰਿਲਾਇੰਸ ਜੀਓ ਦਾ ਦਾਅਵਾ ਹੈ ਕਿ 'ਜੀਓ ਭਾਰਤ ਵੀ2' ਦੇ ਆਧਾਰ 'ਤੇ ਕੰਪਨੀ 10 ਕਰੋੜ ਤੋਂ ਵੱਧ ਗਾਹਕਾਂ ਨੂੰ ਜੋੜੇਗੀ।
'Jio Bharat V2' ਦੀ ਕੀਮਤ ਇੰਟਰਨੈੱਟ 'ਤੇ ਕੰਮ ਕਰਨ ਵਾਲੇ ਬਾਜ਼ਾਰ 'ਚ ਉਪਲੱਬਧ ਸਾਰੇ ਫ਼ੋਨਾਂ 'ਚੋਂ ਸਭ ਤੋਂ ਘੱਟ ਹੈ। 999 ਰੁਪਏ 'ਚ ਉਪਲੱਬਧ 'Jio Bharat V2' ਦਾ ਮਹੀਨਾਵਾਰ ਪਲਾਨ ਵੀ ਸਭ ਤੋਂ ਸਸਤਾ ਹੈ। ਗਾਹਕਾਂ ਨੂੰ 28 ਦਿਨਾਂ ਦੀ ਵੈਧਤਾ ਵਾਲੇ ਪਲਾਨ ਲਈ 123 ਰੁਪਏ ਦਾ ਭੁਗਤਾਨ ਕਰਨਾ ਹੋਵੇਗਾ। ਜਦਕਿ ਦੂਜੇ ਆਪਰੇਟਰ ਦੀ ਵੌਇਸ ਕਾਲ ਅਤੇ 2 ਜੀਬੀ ਦਾ ਮਹੀਨਾਵਾਰ ਪਲਾਨ ਸਿਰਫ਼ 179 ਰੁਪਏ ਤੋਂ ਸ਼ੁਰੂ ਹੁੰਦਾ ਹੈ।
ਇਸ ਤੋਂ ਇਲਾਵਾ ਕੰਪਨੀ 'Jio Bharat V2' ਦੇ ਗਾਹਕਾਂ ਨੂੰ 14 GB 4G ਡਾਟਾ ਦੇਵੇਗੀ, ਯਾਨੀ ਅੱਧਾ GB ਪ੍ਰਤੀ ਦਿਨ, ਜੋ ਕਿ ਪ੍ਰਤੀਯੋਗੀਆਂ ਦੇ 2 GB ਡੇਟਾ ਤੋਂ 7 ਗੁਣਾ ਜ਼ਿਆਦਾ ਹੈ। 'Jio Bharat V2' 'ਤੇ ਇਕ ਸਾਲਾਨਾ ਪਲਾਨ ਵੀ ਹੈ ਜਿਸ ਲਈ ਗਾਹਕ ਨੂੰ 1234 ਰੁਪਏ ਦੇਣੇ ਹੋਣਗੇ। ਰਿਲਾਇੰਸ ਦੇ ਮਾਲਕ ਮੁਕੇਸ਼ ਅੰਬਾਨੀ ਜਨਤਕ ਮੰਚਾਂ ਤੋਂ 2ਜੀ ਮੁਕਤ ਭਾਰਤ ਦੀ ਵਕਾਲਤ ਕਰ ਰਹੇ ਹਨ। ਕੰਪਨੀ ਨੇ 25 ਕਰੋੜ 2ਜੀ ਗਾਹਕਾਂ ਨੂੰ 4ਜੀ 'ਤੇ ਲਿਆਉਣ ਲਈ 'ਜੀਓ ਭਾਰਤ' ਪਲੇਟਫਾਰਮ ਵੀ ਲਾਂਚ ਕੀਤਾ ਹੈ।
ਹੋਰ ਕੰਪਨੀਆਂ ਵੀ ਇਸ ਪਲੇਟਫਾਰਮ ਦੀ ਵਰਤੋਂ 4ਜੀ ਫੋਨ ਬਣਾਉਣ ਲਈ ਕਰ ਸਕਣਗੀਆਂ। ਕਾਰਬਨ ਨੇ ਵੀ ਇਸ ਦੀ ਵਰਤੋਂ ਸ਼ੁਰੂ ਕਰ ਦਿੱਤੀ ਹੈ। ਮਾਹਿਰਾਂ ਨੂੰ ਉਮੀਦ ਹੈ ਕਿ 2ਜੀ ਫੀਚਰ ਫੋਨ ਜਲਦੀ ਹੀ 4ਜੀ ਭਾਰਤ ਸੀਰੀਜ਼ ਦੇ ਮੋਬਾਈਲਾਂ ਨਾਲ ਬਦਲ ਜਾਣਗੇ। 2ਜੀ ਗਾਹਕਾਂ ਨੂੰ ਲੁਭਾਉਣ ਲਈ, ਕੰਪਨੀ ਨੇ 2018 ਵਿਚ ਜੀਓ ਫੋਨ ਵੀ ਲਿਆਂਦਾ ਸੀ। JioPhone ਅੱਜ ਵੀ 13 ਕਰੋੜ ਤੋਂ ਵੱਧ ਗਾਹਕਾਂ ਦੀ ਪਸੰਦ ਬਣਿਆ ਹੋਇਆ ਹੈ। ਕੰਪਨੀ ਨੂੰ 'Jio Bharat V2' ਤੋਂ ਵੀ ਇਹੀ ਉਮੀਦਾਂ ਹਨ। ਕੰਪਨੀ ਨੇ 'Jio Bharat V2' ਦਾ ਬੀਟਾ ਟ੍ਰਾਇਲ 7 ਜੁਲਾਈ ਤੋਂ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ। ਕੰਪਨੀ ਦੀ 'Jio Bharat V2' ਨੂੰ 6,500 ਤਹਿਸੀਲਾਂ 'ਚ ਲਿਜਾਣ ਦੀ ਯੋਜਨਾ ਹੈ।
