ਯੂ.ਟੀ. ਪ੍ਰਸ਼ਾਸਨ ਨੇ ਮੰਗੇ ਸਨ 5300 ਕਰੋੜ ਰੁਪਏ
ਚੰਡੀਗੜ੍ਹ : ਕੇਂਦਰੀ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਵਲੋਂ ਸੰਸਦ ਵਿਚ ਪੇਸ਼ ਕੀਤੇ ਵਿੱਤੀ ਵਰ੍ਹੇ 2020-21 ਦੇ ਬਜਟ ਵਿਚ ਚੰਡੀਗੜ੍ਹ ਪ੍ਰਸ਼ਾਸਨ ਲਈ 5138 ਕਰੋੜ ਰੁਪਏ ਮਨਜ਼ੂਰ ਕੀਤੇ ਗਏ ਹਨ ਜੋ ਪਿਛਲੇ ਸਾਲ 2019-20 ਦੇ ਬਜਟ ਨਾਲੋਂ 8.02 ਫ਼ੀ ਸਦੀ ਜ਼ਿਆਦਾ ਹਨ।
File Photo
ਸੂਤਰਾਂ ਅਨੁਸਾਰ ਚੰਡੀਗੜ੍ਹ ਪ੍ਰਸ਼ਾਸਨ ਵਲੋਂ ਵਿੱਤੀ ਵਰ੍ਹੇ 2020-21 ਲਈ ਕੇਂਦਰ ਕੋਲੋਂ 5300 ਕਰੋੜ ਰੁਪਏ ਦੇਣ ਦੀ ਮੰਗ ਕੀਤੀ ਗਈ ਸੀ, ਜਿਸ ਵਿਚ 4800 ਕਰੋੜ ਰੁਪਏ ਰੈਵਨਿਊ ਹੈਡ ਅਤੇ 500 ਕਰੋੜ ਰੁਪਏ ਕੈਪੀਟਲ ਬਜਟ ਵਿਚ ਖ਼ਰਚ ਹੋਣਗੇ। ਯੂ.ਟੀ. ਪ੍ਰਸ਼ਾਸਨ ਵਲੋਂ ਚੰਡੀਗੜ੍ਹ ਮਿਊਂਸਪਲ ਕਾਰਪੋਰੇਸ਼ਨ ਲਈ ਵਿੱਤੀ ਫ਼ੰਡ 700 ਕਰੋੜ ਰੁਪਏ ਵਾਧੂ ਮੰਗੇ ਗਏ ਸਨ ਪਰ ਅਜੇ ਪਤਾ ਨਹੀਂ ਲੱਗਾ ਕਿੰਨੀ ਰਕਮ ਮਿਲੀ।
File Photo
ਦੱਸਣਯੋਗ ਹੈ ਕਿ ਕੇਂਦਰੀ ਵਿੱਤ ਮੰਤਰਾਲਾ ਚੰਡੀਗੜ੍ਹ ਦੇ ਸਾਲਾਨਾ ਬਜਟ 'ਤੇ ਇਸ ਤੋਂ ਪਹਿਲਾਂ ਹਰ ਵਰ੍ਹੇ ਹਮੇਸ਼ਾ ਕੈਂਚੀ ਫੇਰਦਾ ਰਿਹਾ ਹੈ। 2019-20 ਵਿੱਤੀ ਵਰ੍ਹੇ ਬਜਟ ਵਿਚ ਕੇਂਦਰ ਨੇ 24 ਫ਼ੀ ਸਦੀ ਮੰਗੇ ਗਏ ਬਜਟ ਵਿਚੋਂ ਘੱਟ ਬਜਟ ਦੇ ਕੇ ਪੱਲਾ ਝਾੜ ਦਿਤਾ ਸੀ ਕਿਉਂਕਿ ਚੰਡੀਗੜ੍ਹ ਪ੍ਰਸ਼ਾਸਨ ਵਲੋਂ 5218.03 ਕਰੋੜ ਪ੍ਰਸਤਾਵਿਤ ਬਜਟ ਭੇਜਿਆ ਸੀ ਪਰ ਕੇਂਦਰ ਨੇ 4753.12 ਕਰੋੜ ਰੁਪਏ ਦੀ ਰਾਸ਼ੀ ਹੀ ਪ੍ਰਦਾਨ ਕੀਤੀ ਸੀ ਜਿਸ ਵਿਚ 465 ਕਰੋੜ ਦੀ ਸਿੱਧੀ ਕਟੌਤੀ ਕੀਤੀ ਸੀ।
File Photo
ਦੂਜੇ ਪਾਸੇ ਨਗਰ ਨਿਗਮ ਚੰਡੀਗੜ੍ਹ ਨੂੰ ਸਿਰਫ਼ 375 ਕਰੋੜ ਦੀ ਸਾਲਾਨਾ ਗ੍ਰਾਂਟ ਇਨ ਏਡ ਹੀ ਦਿਤੀ ਸੀ ਜਦਕਿ ਨਗਰ ਨਿਗਮ ਲਈ ਯੂ.ਟੀ. ਪ੍ਰਸ਼ਾਸਨ ਵਲੋਂ 1024 ਕਰੋੜ ਦੀ ਵਾਧੂ ਰਾਸ਼ੀ ਬਜਟ ਵਿਚ ਦੇਣ ਦੀ ਮੰਗ ਰੱਖ ਸੀ। 2019 ਵਿਚ ਮੋਦੀ ਸਰਕਾਰ ਨੇ ਚੋਣਾਂ ਤੋਂ ਬਾਅਦ ਬਜਟ ਪੇਸ਼ ਕਰਨ ਮਗਰੋਂ ਵੀ ਚੰਡੀਗੜ੍ਹ ਪ੍ਰਸ਼ਾਸਨ ਨੇ 575 ਕਰੋੜ ਦੀ ਐਡੀਸ਼ਨਲ ਗ੍ਰਾਂਟ ਦੀ ਮੰਗ ਕੀਤੀ ਸੀ ਪਰ ਕੇਂਦਰ ਨੇ ਕੁੱਝ ਵੀ ਨਹੀਂ ਦਿਤਾ ਸੀ।
File Photo
ਕਿੱਥੇ-ਕਿੱਥੇ ਖਰਚ ਹੋਣਗੇ ਬਜਟ ਦੇ ਪੈਸੇ
1 ਚੰਡੀਗੜ੍ਹ ਪੁਲਿਸ ਲਈ 561.36 ਕਰੋੜ ਰੁਪਏ ਖ਼ਰਚ ਹੋਣਗੇ।
2 ਸਿਖਿਆ ਦੇ ਖੇਤਰ ਲਈ ਪੂਰਾ ਸਾਲ ਬਜਟ -843.73 ਕਰੋੜ ਰੁਪਏ।
3 ਹਾਊਸਿੰਗ ਤੇ ਅਰਬਨ ਲਈ ਸਾਲਾਨਾ ਬਜਟ - 963.47 ਕਰੋੜ।
4 ਟਰਾਂਸਪੋਰਟ ਦੀ ਮਜ਼ਬੂਤੀ ਲਈ 294.96 ਕਰੋੜ।
5 ਸਿਹਤ ਸੇਵਾਵਾਂ ਲਈ 522 ਕਰੋੜ।
6 ਇਲੈਕਟ੍ਰਿਕ ਸਿਟੀ ਸੇਵਾਵਾਂ ਆਦਿ ਲਈ 962.75 ਕਰੋੜ ਰੁਪਏ ਖ਼ਰਚ ਹੋਣਗੇ।
7 ਪੀ.ਜੀ.ਆਈ. ਲਈ 1551.53 ਕਰੋੜ ਰੁਪਏ ਰੱਖੇ ਹਨ।
