ਡੂੰਘੀ ਸੱਟ ਲੱਗਣ ਕਾਰਨ ਖੂਨ ਸ਼ਰੀਰ ਅੰਦਰ ਹੀ ਜਮਿਆ
ਗਾਂਧੀ ਨਗਰ : ਗੁਜਰਾਤ ਦੇ ਭਾਜਪਾ ਸੰਸਦ ਮੈਂਬਰ ਲੀਲਾਧਰ ਵਾਘੇਲਾ 'ਤੇ ਘਰ ਤੋਂ ਨਿਕਲਦਿਆਂ ਹੀ ਇਕ ਗਾਂ ਨੇ ਹਮਲਾ ਕਰ ਦਿੱਤਾ। ਗਾਂ ਦੇ ਇਸ ਹਮਲੇ 'ਚ ਭਾਜਪਾ ਸੰਸਦ ਮੈਂਬਰ ਦੀ ਛਾਤੀ ਦੀਆਂ ਦੋ ਪਸਲੀਆਂ ਟੁੱਟ ਗਈਆਂ ਅਤੇ ਫਿਲਹਾਲ ਉਹ ਆਈਸੀਯੂ 'ਚ ਦਾਖ਼ਲ ਹਨ। ਹਮਲੇ ਦੀ ਜਾਣਕਾਰੀ ਮਿਲਦਿਆਂ ਹੀ ਉਥੇ ਮੌਜੂਦ ਲੋਕਾਂ ਨੇ ਉਨ੍ਹਾਂ ਨੂੰ ਨਜ਼ਦੀਕੀ ਹਸਪਤਾਲ 'ਚ ਦਾਖ਼ਲ ਕਰਵਾਇਆ।
ਵਾਘੇਲਾ ਗੁਜਰਾਤ ਦੀ ਪਾਟਨ ਲੋਕ ਸਭਾ ਸੀਟ ਤੋਂ ਸੰਸਦ ਮੈਂਬਰ ਹਨ। ਮੀਡੀਆ ਰਿਪੋਰਟ ਮੁਤਾਬਕ ਉਨ੍ਹਾਂ ਦੇ ਪਰਵਾਰ ਨੇ ਦੱਸਿਆ ਕਿ ਪੰਚਸ਼ੀਲ ਪਾਰਕ ਸੁਸਾਇਟੀ ਸਥਿਤ ਆਪਣੇ ਘਰ ਤੋਂ ਬਾਹਰ ਜਿਵੇਂ ਹੀ ਲੀਲਾਧਰ ਨਿਕਲੇ ਤਾਂ ਇਕ ਗਾਂ ਨੇ ਉਨ੍ਹਾਂ 'ਤੇ ਹਮਲਾ ਕਰ ਦਿੱਤਾ। ਪਰਵਾਰ ਨੇ ਦੱਸਿਆ ਕਿ ਲੀਲਾਧਰ ਨੇ ਗਾਂ ਤੋਂ ਬਚਣ ਦੀ ਵੀ ਕੋਸ਼ਿਸ਼ ਕੀਤੀ ਪਰ ਇਸ ਤੋਂ ਪਹਿਲਾਂ ਕਿ ਉਹ ਸੰਭਲ ਪਾਉਂਦੇ ਗਾਂ ਨੇ ਉਨ੍ਹਾਂ ਦੀ ਛਾਤੀ 'ਤੇ ਜ਼ੋਰਦਾਰ ਤਰੀਕੇ ਨਾਲ ਆਪਣਾ ਸਿਰ ਮਾਰ ਦਿੱਤਾ।
ਗਾਂ ਦੇ ਇਸ ਹਮਲੇ ਕਾਰਨ ਲੀਲਾਧਰ ਦੀ ਛਾਤੀ ਦੀਆਂ ਦੋ ਪਸਲੀਆਂ ਟੁੱਟ ਗਈਆਂ। ਉਨ੍ਹਾਂ ਦੇ ਸ਼ਰੀਰ ਅੰਦਰ ਡੂੰਘੀ ਸੱਟ ਲੱਗਣ ਕਾਰਨ ਖੂਨ ਅੰਦਰ ਹੀ ਜਮ ਗਿਆ। ਇਸ ਕਾਰਨ ਉਨ੍ਹਾਂ ਨੂੰ ਸਾਹ ਲੈਣ 'ਚ ਕਾਫ਼ੀ ਮੁਸ਼ਕਲ ਹੋ ਰਹੀ ਹੈ। ਲੀਲਾਧਰ ਨੂੰ ਗਾਂਧੀ ਨਗਰ ਦੇ ਅਪੋਲੋ ਹਸਪਤਾਲ 'ਚ ਦਾਖ਼ਲ ਕਰਵਾਇਆ ਗਿਆ ਹੈ। ਘਟਨਾ ਦੀ ਜਾਣਕਾਰੀ ਮਿਲਦਿਆਂ ਹੀ ਕਈ ਭਾਜਪਾ ਆਗੂ ਉਨ੍ਹਾਂ ਦਾ ਹਾਲਚਾਲ ਜਾਨਣ ਲਈ ਹਸਪਤਾਲ ਪੁੱਜੇ।