ਮੋਦੀ ਸਰਕਾਰ ਦੀਆਂ ਮਾੜੀਆਂ ਨੀਤੀਆਂ ਕਾਰਨ ਮੰਦੀ ਆਈ ਜਿਹੜੀ ਲੰਮਾ ਸਮਾਂ ਚੱਲੇਗੀ

ਨਵੀਂ ਦਿੱਲੀ: ਅਰਥਚਾਰੇ ਦੀ ਹਾਲਤ ਨੂੰ ਬੇਹੱਦ ਚਿੰਤਾਜਨਕ ਦਸਦਿਆਂ ਸਾਬਕਾ ਪ੍ਰਧਾਨ ਮੰਤਰੀ ਡਾ. ਮਨਮੋਹਨ ਸਿੰਘ ਨੇ ਸਰਕਾਰ ਨੂੰ ਅਪੀਲ ਕੀਤੀ ਹੈ ਕਿ ੳ¹ਹ ਬਦਲੇ ਦੀ ਰਾਜਨੀਤੀ ਨੂੰ ਛੱਡੇ ਅਤੇ ਅਰਥਚਾਰੇ ਨੂੰ ਮਨੁੱਖ ਦੇ ਖੜੇ ਕੀਤੇ ਸੰਕਟ ਵਿੱਚੋਂ ਬਾਹਰ ਕੱਢਣ ਲਈ ਸਹੀ ਸੋਚ-ਸਮਝ ਵਾਲੇ ਲੋਕਾਂ ਨਾਲ ਸੰਪਰਕ ਕਰੇ। ੳਹਨਾਂ ਨੋਟਬੰਦੀ ਅਤੇ ਜੀਐਸਟੀ ਲਾਗੂ ਕਰਨ ਵਿਚ ਕੀਤੀ ਗਈ ਕਾਹਲੀ ਨੂੰ ਮਨੁੱਖ ਦਾ ਖੜਾ ਕੀਤਾ ਸੰਕਟ ਦਸਿਆ।

Money

ਸਾਬਕਾ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਇਹ ਆਰਥਕ ਮੰਦੀ ਮੋਦੀ ਸਰਕਾਰ ਦੇ ਚੋਂਤਰਫ਼ਾ ਕੁਪ੍ਰਬੰਧ ਕਾਰਨ ਹੈ। ਉਹਨਾਂ ਇਕ ਪੱਤਰ ਵਿਚ ਕਿਹਾ, ‘ਇਸ ਵੇਲੇ ਅਰਥਵਿਵਸਥਾ ਦੀ ਹਾਲਤ ਬਹੁਤ ਚਿੰਤਾਜਨਕ ਹੈ। ਪਿਛਲੀ ਤਿਮਾਹੀ ਵਿਚ ਜੀਡੀਪੀ ਦਾ ਵਾਧਾ ਮਹਿਜ਼ ਪੰਜ ਫ਼ੀ ਸਦੀ ਤਕ ਸੀਮਤ ਰਹਿਣਾ ਮੰਦੀ ਦੇ ਲੰਮੇ ਸਮੇਂ ਤਕ ਚੱਲਣ ਦਾ ਸੰਕੇਤ ਹੈ। ਭਾਰਤ ਵਿਚ ਤੇਜ਼ੀ ਨਾਲ ਵਿਕਾਸ ਵਿਚ ਦੀਆਂ ਸੰਭਾਵਨਾਵਾਂ ਮੌਜੂਦ ਹਨ ਪਰ ਮੋਦੀ ਸਰਕਾਰ ਦੇ ਚੋਂਤਰਫ਼ਾ ਮਾੜੇ ਪ੍ਰਬੰਧਾਂ ਕਾਰਨ ਇਹ ਮੰਦੀ ਆਈ ਹੈ।’

ਉਹਨਾਂ ਕਿਹਾ ਕਿ ਦੇਸ਼ ਦੇ ਨੌਜਵਾਨ ਵਰਗ, ਕਿਸਾਨ, ਮਜ਼ਦੂਰ, ਉਦਮੀ ਅਤੇ ਸਾਧਨਹੀਣ ਤਬਕੇ ਨੂੰ ਬਿਹਤਰ ਸਹੂਲਤਾਂ ਮਿਲਣੀਆਂ ਚਾਹੀਦੀਆਂ ਹਨ। ਉਹਨਾਂ ਕਿਹਾ ਕਿ ਭਾਰਤ ਇਸ ਰਸਤੇ ਹੋਰ ਅੱਗੇ ਨਹੀਂ ਵੱਧ ਸਕਦਾ। ਉਹਨਾਂ ਕਿਹਾ, ‘ਮੈਂ ਸਰਕਾਰ ਨੂੰ ਬੇਨਤੀ ਕਰਦਾ ਹਾਂ ਕਿ ਉਹ ਬਦਲੇ ਦੀ ਰਾਜਨੀਤੀ ਬੰਦ ਕਰੇ ਅਤੇ ਅਰਥਚਾਰੇ ਨੂੰ ਮਨੁੱਖੀ-ਰਚਿਤ ਸੰਕਟ ਵਿਚੋਂ ਬਾਹਰ ਕੱਢਣ ਲਈ ਸੋਚ-ਸਮਝ ਕੇ ਲੋਕਾਂ ਕੋਲੋਂ ਸਲਾਹ ਲਏ।’ 

ਉਹਨਾਂ ਕਿਹਾ ਕਿ ਖ਼ਾਸਕਰ ਨਿਰਮਾਣ ਖੇਤਰ ਵਿਚ ਵਾਧਾ ਦਰ ਦਾ ਸਿਰਫ਼ 0.6 ਫ਼ੀ ਸਦੀ ਰਹਿਣਾ ਚਿੰਤਾਜਨਕ ਹੈ। ਬਿਨਾਂ ਰੁਜ਼ਗਾਰ ਪੈਦਾਵਾਰ ਵਾਲੇ ਵਾਧੇ ਲਈ ਮੋਦੀ ਸਰਕਾਰ ਦੀਆਂ ਨੀਤੀਆਂ ਨੂੰ ਦੋਸ਼ੀ ਦਸਦਿਆਂ ਸਾਬਕਾ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਸਿਰਫ਼ ਆਟੋਮੋਬਾਈਲ ਸੈਕਟਰ ਵਿਚ ਸਾਢੇ ਤਿੰਨ ਲੱਖ ਤੋਂ ਵੱਧ ਨੌਕਰੀਆਂ ਗਈਆਂ ਹਨ। ਗ਼ੈਰ-ਜਥੇਬੰਦ ਖੇਤਰ ਵਿਚ ਵੀ ਵੱਡੇ ਪੱਧਰ ’ਤੇ ਨੌਕਰੀਆਂ ਗਈਆਂ ਹਨ ਅਤੇ ਇਸ ਦਾ ਜ਼ਿਆਦਾ ਨੁਕਸਾਨ ਕਮਜ਼ੋਰ ਤਬਕੇ ਦੇ ਲੋਕਾਂ ਨੂੰ ਹੋਇਆ ਹੈ।