ਕਿਹਾ - ਇਸ ਸਬੰਧ 'ਚ ਪਾਰਟੀ ਦੇ ਸੀਨੀਅਰ ਆਗੂਆਂ ਨਾਲ ਪਹਿਲਾਂ ਹੀ ਚਰਚਾ ਕਰ ਚੁੱਕੀ ਹਾਂ
ਭੋਪਾਲ : ਲੋਕ ਸਭਾ ਸਪੀਕਰ ਅਤੇ ਇੰਦੌਰ ਤੋਂ ਸੰਸਦ ਮੈਂਬਰ ਸੁਮਿਤਰਾ ਮਹਾਜਨ ਨੇ ਲੋਕ ਸਭਾ ਚੋਣਾਂ ਨਾ ਲੜਨ ਦਾ ਐਲਾਨ ਕੀਤਾ ਹੈ। ਇਹ ਐਲਾਨ ਉਨ੍ਹਾਂ ਨੇ ਪਾਰਟੀ ਨੂੰ ਭੇਜੀ ਇਕ ਚਿੱਠੀ 'ਚ ਕੀਤਾ। ਉਨ੍ਹਾਂ ਨੇ ਚਿੱਠੀ 'ਚ ਲਿਖਿਆ ਹੈ, "ਭਾਰਤੀ ਜਨਤਾ ਪਾਰਟੀ ਨੇ ਹਾਲੇ ਤੱਕ ਇੰਦੌਰ 'ਚ ਆਪਣਾ ਉਮੀਦਵਾਰ ਐਲਾਨ ਨਹੀਂ ਕੀਤਾ ਹੈ। ਸੰਭਵ ਹੈ ਕਿ ਪਾਰਟੀ ਨੂੰ ਫ਼ੈਸਲਾ ਲੈਣ 'ਚ ਝਿਜਕ ਹੋ ਰਹੀ ਹੈ। ਮੈਂ ਇਹ ਐਲਾਨ ਕਰਦੀ ਹਾਂ ਕਿ ਮੈਂ ਹੁਣ ਲੋਕ ਸਭਾ ਦੀਆਂ ਚੋਣਾਂ ਨਹੀਂ ਲੜਨੀਆਂ ਹਨ। ਆਸ ਕਰਦੀ ਹਾਂ ਕਿ ਪਾਰਟੀ ਉਮੀਦਵਾਰ ਦੇ ਨਾਂ 'ਤੇ ਛੇਤੀ ਹੀ ਫ਼ੈਸਲਾ ਕਰੇ ਤਾਂ ਕਿ ਆਉਣ ਵਾਲੇ ਦਿਨਾਂ 'ਚ ਸਾਰਿਆਂ ਨੂੰ ਕੰਮ ਕਰਨ 'ਚ ਸਹੂਲਤ ਹੋਵੇਗੀ ਅਤੇ ਪ੍ਰੇਸ਼ਾਨੀ ਦੀ ਸਥਿਤੀ ਖ਼ਤਮ ਹੋਵੇਗੀ।"
ਸੁਮਿਤਰਾ ਮਹਾਜਨ ਨੇ ਦਸਿਆ ਕਿ ਉਹ ਇਸ ਸਬੰਧ 'ਚ ਪਾਰਟੀ ਦੇ ਸੀਨੀਅਰ ਆਗੂਆਂ ਨਾਲ ਪਹਿਲਾਂ ਹੀ ਚਰਚਾ ਕਰ ਚੁੱਕੀ ਹੈ। ਉਨ੍ਹਾਂ ਕਿਹਾ, "ਮੈਂ ਫ਼ੈਸਲਾ ਉਨ੍ਹਾਂ 'ਤੇ ਹੀ ਛੱਡਿਆ ਸੀ।" ਉਮੀਦਵਾਰ ਦੇ ਐਲਾਨ ਨੂੰ ਲੈ ਕੇ ਪਾਰਟੀ 'ਚ ਅਜੇ ਵੀ ਪ੍ਰੇਸ਼ਾਨੀ ਹੋਣ ਦਾ ਹਵਾਲਾ ਦਿੰਦਿਆਂ ਸੁਮਿਤਰਾ ਮਹਾਜਨ ਨੇ ਭਾਜਪਾ ਨੂੰ ਬੇਝਿਜਕ ਹੋ ਕੇ ਮੁਕਤ ਮਨ ਨਾਲ ਫ਼ੈਸਲਾ ਕਰਨ ਦੀ ਅਪੀਲ ਕੀਤੀ।
ਜ਼ਿਕਰਯੋਗ ਹੈ ਕਿ ਭਾਜਪਾ ਮੱਧ ਪ੍ਰਦੇਸ਼ ਦੀ 29 ਲੋਕ ਸਭਾ ਸੀਟਾਂ 'ਚੋਂ 18 ਸੀਟਾਂ 'ਤੇ ਉਮੀਦਵਾਰਾਂ ਦਾ ਐਲਾਨ ਕਰ ਚੁੱਕੀ ਹੈ। ਭਾਜਪਾ ਦਾ ਗੜ੍ਹ ਮੰਨੀ ਜਾਣ ਵਾਲੀ ਇੰਦੌਰ ਸੀਟ 'ਤੇ ਕਾਫ਼ੀ ਸਮੇਂ ਤੋਂ ਭੰਬਲਭੂਸੇ ਵਾਲੀ ਹਾਲਤ ਬਣੀ ਹੋਈ ਹੈ। ਇਕ ਤੋਂ ਬਾਅਦ ਇਕ ਨਾਂ ਸਾਹਮਣੇ ਆਉਣ ਕਾਰਨ ਹਾਲੇ ਤਕ ਇੱਥੋਂ ਉਮੀਦਵਾਰ ਤੈਅ ਨਹੀਂ ਹੋਇਆ ਹੈ।
ਕਾਂਗਰਸ ਨੂੰ ਸਿਰਫ਼ 4 ਵਾਰ ਮਿਲੀ ਜਿੱਤ : ਇੰਦੌਰ 'ਚ 30 ਸਾਲ ਤੋਂ ਭਾਜਪਾ ਜਿੱਤਦੀ ਰਹੀ ਹੈ। ਹੁਣ ਤਕ 16 ਲੋਕ ਸਭਾ ਚੋਣਾਂ 'ਚ ਕਾਂਗਰਸ ਸਿਰਫ਼ 4 ਵਾਰ ਜਿੱਤ ਸਕੀ ਹੈ। ਇੰਦੌਰ ਲੋਕ ਸਭਾ ਸੀਟ ਤਹਿਤ 8 ਵਿਧਾਨ ਸਭਾ ਖੇਤਰ ਆਉਂਦੇ ਹਨ। ਸਾਲ 2018 ਦੀਆਂ ਵਿਧਾਨ ਸਭਾ ਚੋਣਾਂ 'ਚ ਮੁਕਾਬਲਾ ਬਰਾਬਰੀ ਦਾ ਸੀ। ਭਾਜਪਾ ਅਤੇ ਕਾਂਗਰਸ ਨੇ 4-4 ਸੀਟਾਂ ਜਿੱਤੀਆਂ ਸਨ।