ਸੁਨੇਹੇ ਵਿਚ ਵਰਤੇ ਗਏ ਸ਼ਬਦ 'ਕਰਪਸ਼ਨ' ਨੂੰ ਲੈ ਕੇ ਗਲਤ ਮਤਲਬ ਕੱਢਿਆ ਜਾ ਰਿਹਾ ਹੈ।
ਨਵੀਂ ਦਿੱਲੀ : ਬੈਂਗਲੁਰੂ ਵਿਚ ਹੋਏ ਮਿਰਾਜ ਹਾਦਸੇ ਵਿਚ ਸ਼ਹੀਦ ਸਕਵਾਰਡਨ ਲੀਡਰ ਸਮੀਰ ਅਬਰੋਲ ਦੀ ਪਤਨੀ ਗਰਿਮਾ ਅਬਰੋਲ ਦਾ ਇਕ ਸੁਨੇਹਾ ਵਾਇਰਲ ਹੋ ਰਿਹਾ ਹੈ ਜਿਸ ਵਿਚ ਕਿਹਾ ਗਿਆ ਸੀ ਕਿ ਅਸੀਂ ਯੋਧਿਆਂ ਨੂੰ ਲੜਨ ਲਈ ਪੁਰਾਣੀਆਂ ਮਸ਼ੀਨਾਂ ਦਿੰਦੇ ਹਾਂ, ਫਿਰ ਵੀ ਉਹ ਪੂਰੀ ਤਾਕਤ ਅਤੇ ਹੁਨਰ ਦੇ ਨਾਲ ਲੜਦੇ ਹਨ। ਇਸ ਵਿਚ ਲਿਖਿਆ ਹੈ ਕਿ ਸਮੀਰ ਨੇ ਛਲਾਂਗ ਲਗਾਈ ਸੀ ਪਰ ਪੈਰਾਸ਼ੂਟ ਵਿਚ ਅੱਗ ਲਗ ਗਈ।
ਉਥੇ ਹੀ ਇਸ ਸੁਨੇਹੇ ਤੇ ਸਮੀਰ ਦੇ ਭਰਾ ਸੁਸ਼ਾਂਤ ਨੇ ਸਪਸ਼ਟ ਕੀਤਾ ਹੈ ਕਿ ਗਰਿਮਾ ਵੱਲੋਂ ਇਹ ਸੁਨੇਹਾ ਭਾਵਨਾਵਾਂ ਵਿਚ ਲਿਖਿਆ ਗਿਆ ਹੈ। ਇਹ ਇਕ ਸਾਧਾਰਨ ਸੁਨੇਹਾ ਹੈ ਤੇ ਇਸ ਵਿਚ ਕਿਸੇ ਵੱਲ ਇਸ਼ਾਰਾ ਨਹੀਂ ਕੀਤਾ ਗਿਆ ਹੈ। ਦੱਸ ਦਿਤਾ ਜਾਵੇ ਕਿ ਸੁਨੇਹੇ ਵਿਚ ਵਰਤੇ ਗਏ ਸ਼ਬਦ 'ਕਰਪਸ਼ਨ' ਨੂੰ ਲੈ ਕੇ ਗਲਤ ਮਤਲਬ ਕੱਢਿਆ ਜਾ ਰਿਹਾ ਹੈ। ਸੁਨੇਹੇ ਵਿਚ ਉਹਨਾਂ ਨੇ ਕਿਹਾ ਕਿ ਉਸ ਦੇ ਆਖਰੀ ਸਾਹਾਂ ਤੋਂ ਲਗਿਆ ਕਿ
ਜੇਕਰ ਨੌਕਰਸ਼ਾਹੀ ਅਪਣੀ ਭ੍ਰਿਸ਼ਟਤਾ ਦੀ ਮੌਜ਼ ਮਸਤੀ ਵਿਚ ਰੁੱਝਾ ਨਾ ਹੁੰਦਾ ਤਾਂ ਸ਼ਾਇਦ ਅਜਿਹਾ ਨਾ ਹੋਇਆ ਹੁੰਦਾ। ਸੁਸ਼ਾਂਤ ਦਾ ਕਹਿਣਾ ਹੈ ਕਿ ਉਹਨਾਂ ਨੂੰ ਹਵਾਈ ਫ਼ੌਜ 'ਤੇ ਪੂਰਾ ਭਰੋਸਾ ਹੈ। ਉਨਾਂ ਕਿਹਾ ਕਿ ਜਹਾਜ਼ ਵਿਚ ਸਮੀਰ ਦੇ ਨਾਲ ਸ਼ਾਮਲ ਸਾਰੇ ਅੱਠ ਅਫ਼ਸਰਾਂ ਨੂੰ ਸਮੀਰ ਦੇ ਚਲੇ ਜਾਣ ਦਾ ਬਹੁਤ ਦੁੱਖ ਹੈ। ਉਹਨਾਂ ਕਿਹਾ ਕਿ ਅਸੀਂ ਜਾਂਚ ਰੀਪੋਰਟ ਦੀ ਉਡੀਕ ਕਰ ਰਹੇ ਹਾਂ। ਜ਼ਿਕਰਯੋਗ ਹੈ ਕਿ ਸਮੀਰ ਨੇ 2004 ਵਿਚ 12ਵੀਂ ਪਾਸ ਕਰਨ ਤੋਂ
ਬਾਅਦ ਐਨਡੀਏ ਦਾ ਇਮਤਿਹਾਨ ਪਾਸ ਕਰ ਲਿਆ ਸੀ। ਸਾਲ 2008 ਵਿਚ ਸਮੀਰ ਹਵਾਈ ਫ਼ੌਜ ਵਿਚ ਭਰਤੀ ਹੋ ਗਏ। ਸਮੀਰ ਨੂੰ ਐਡਵੇਂਚਰ ਦਾ ਬਹੁਤ ਸ਼ੌਂਕ ਸੀ। ਹਵਾਈ ਫ਼ੌਜ ਵਿਚ ਭਰਤੀ ਹੋਣ ਦਾ ਮੁੱਖ ਕਾਰਨ ਵੀ ਇਹੋ ਸੀ। ਬੈਂਗਲੁਰੂ ਵਿਚ ਸਮੀਰ ਦੀ 1 ਫਰਵਰੀ ਨੂੰ ਮਿਰਾਜ ਹਾਦਸੇ ਦੌਰਾਨ ਮੌਤ ਹੋ ਗਈ ਸੀ। ਉਹ ਬੁਰੀ ਤਰ੍ਹਾਂ ਸੜ ਗਏ ਸਨ। ਉਹਨਾਂ ਨੂੰ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਸੀ। ਜਿਥੇ ਉਹਨਾਂ ਨੇ ਆਖਰੀ ਸਾਹ ਲਈ।