ਗੋਆ ਵਿਚ ਅਪਣੇ 11 ਮਹੀਨੇ ਦੇ ਬੇਟੇ ਨੂੰ ਦੋ ਲੱਖ ਰੁਪਏ ਵਿਚ ਵੇਚਣ ਵਾਲੀ 32 ਸਾਲ ਦੀ ਇਕ ਮਹਿਲਾ ਨੂੰ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ
ਪਣਜੀ : ਗੋਆ ਵਿਚ ਅਪਣੇ 11 ਮਹੀਨੇ ਦੇ ਬੇਟੇ ਨੂੰ ਦੋ ਲੱਖ ਰੁਪਏ ਵਿਚ ਵੇਚਣ ਵਾਲੀ 32 ਸਾਲ ਦੀ ਇਕ ਮਹਿਲਾ ਨੂੰ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਬੱਚੇ ਦੇ ਪਿਤਾ ਦੀ ਸ਼ਿਕਾਇਤ 'ਤੇ ਕੱਲ੍ਹ ਉਸ ਦੀ ਮਾਂ ਸ਼ੈਲਾ ਪਾਟਿਲ, ਕਥਿਤ ਖਰੀਦਦਾਰ ਅਮਰ ਮੋਰਜੇ (32) ਅਤੇ ਬੱਚੇ ਨੂੰ ਵੇਚਣ ਵਿਚ ਮਹਿਲਾ ਦੀ ਮਦਦ ਕਰਨ ਵਾਲੇ ਉਸ ਦੇ ਦੋਸਤਾਂ ਯੋਗੇਸ਼ ਗੋਸਾਵੀ (42) ਅਤੇ ਅਨੰਤ ਦਾਮਾਜੀ (34) ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ।
ਮਾਮਲੇ ਦੀ ਜਾਂਚ ਕਰ ਰਹੇ ਪੋਂਡਾ ਪੁਲਿਸ ਥਾਣੇ ਦੇ ਇੰਸਪੈਕਟਰ ਹਰੀਸ਼ ਮਡਕਾਇਕਰ ਨੇ ਕਿਹਾ ਕਿ ਸ਼ੈਲਾ ਨੇ ਅਪਣੇ ਪਤੀ ਨੂੰ ਹਨ੍ਹੇਰੇ ਵਿਚ ਰੱਖ ਕੇ ਬੱਚਾ ਵੇਚਿਆ ਸੀ ਕਿਉਂਕਿ ਉਸ ਨੂੰ ਪੈਸਿਆਂ ਦੀ ਜ਼ਰੂਰਤ ਸੀ। ਸਾਰੇ ਦੋਸ਼ੀ ਪਰਨੇਮ ਤਹਿਸੀਲ ਦੇ ਰਹਿਣ ਵਾਲੇ ਹਨ। ਸ਼ੈਲਾ ਪਾਟਿਲ ਪੁਣੇ ਦੀ ਰਹਿਣ ਵਾਲੀ ਹੈ। ਅਪਣੇ ਬੱਚੇ ਨੂੰ ਵੇਚਣ ਲਈ ਉਸ ਨੇ ਅਪਣੇ ਦੋਸਤਾਂ ਗੋਸਾਵੀ ਅਤੇ ਦਾਮਾਜੀ ਨੂੰ ਇਹ ਕਹਿ ਕੇ ਮਦਦ ਮੰਗੀ ਸੀ ਕਿ ਉਸ ਨੂੰ ਪੈਸਿਆਂ ਦੀ ਸਖ਼ਤ ਜ਼ਰੂਰਤ ਹੈ। ਗੋਸਾਵੀ ਅਤੇ ਦਾਮਾਜੀ ਨੇ ਮੋਰਜੇ ਨਾਲ ਸੰਪਰਕ ਕੀਤਾ। ਮੋਰਜੇ ਵਿਆਹਿਆ ਪਰ ਬੇ ਔਲਾਦ ਹੈ ਅਤੇ ਕਥਿੱਤ ਰੂਪ ਨਾਲ ਉਹ ਇਕ ਬੱਚਾ ਖਰੀਦਣਾ ਚਾਹੁੰਦਾ ਸੀ। ਪੁਲਿਸ ਅਧਿਕਾਰੀ ਨੇ ਦਸਿਆ ਕਿ 23 ਮਾਰਚ ਨੂੰ ਬੱਚਾ ਮੋਰਜੇ ਨੂੰ ਸੌਂਪ ਦਿਤਾ ਗਿਆ। ਇੰਸਪੈਕਟਰ ਮਡਕਾਇਕਰ ਨੇ ਦਸਿਆ ਕਿ ਘਟਨਾ ਦੇ ਸਮੇਂ ਸ਼ੈਲਾ ਦਾ ਪਤੀ ਘਰ 'ਤੇ ਨਹੀਂ ਸੀ ਅਤੇ ਘਰ ਪਰਤਣ 'ਤੇ ਉਸ ਨੂੰ ਘਟਨਾ ਦੀ ਜਾਣਕਾਰੀ ਮਿਲੀ। ਇਸ ਦੇ ਬਾਅਦ ਉਸ ਨੇ ਪੁਲਿਸ ਨਾਲ ਸੰਪਰਕ ਕੀਤਾ। ਉਨ੍ਹਾਂ ਦਸਿਆ ਕਿ ਪੁਲਿਸ ਨੇ ਆਈਪੀਸੀ ਦੇ ਮਾਨਵ ਤਸਕਰੀ ਵਿਰੋਧੀ ਪ੍ਰਬੰਧ ਦੇ ਤਹਿਤ ਮਾਮਲਾ ਦਰਜ ਕੀਤਾ ਹੈ।