ਮੱਧ ਪ੍ਰਦੇਸ਼ ਦੇ ਇਸ ਸ਼ਹਿਰ ਲਾਗੇ ਹੌਲਨਾਕ ਘਟਨਾ ਵਾਪਰੀ ਹੈ। ਡਿਪਟੀ ਰੇਂਜਰ ਸਮੇਤ ਅੱਠ ਵਣ ਕਰਮਚਾਰੀਆਂ ਨੇ ਜੰਗਲ ਵਿਚ ਲਕੜੀ ਲਿਜਾਣ 'ਤੇ ਇਕ ਵਿਅਕਤੀ ਦੀ ਕੁੱਟ-ਕੁੱਟ ਕੇ...
ਸਿਵਨੀ : ਮੱਧ ਪ੍ਰਦੇਸ਼ ਦੇ ਇਸ ਸ਼ਹਿਰ ਲਾਗੇ ਹੌਲਨਾਕ ਘਟਨਾ ਵਾਪਰੀ ਹੈ। ਡਿਪਟੀ ਰੇਂਜਰ ਸਮੇਤ ਅੱਠ ਵਣ ਕਰਮਚਾਰੀਆਂ ਨੇ ਜੰਗਲ ਵਿਚ ਲਕੜੀ ਲਿਜਾਣ 'ਤੇ ਇਕ ਵਿਅਕਤੀ ਦੀ ਕੁੱਟ-ਕੁੱਟ ਕੇ ਹਤਿਆ ਕਰ ਦਿਤੀ ਅਤੇ ਸਬੂਤ ਮਿਟਾਉਣ ਲਈ ਜੰਗਲ ਵਿਚ ਚਿਤਾ ਬਣਾ ਕੇ ਉਸ ਦੀ ਲਾਸ਼ ਨੂੰ ਅੱਗ ਲਾ ਦਿਤੀ। ਇਹ ਘਟਨਾ ਗਾਂਗਪੁਰ ਪਿੰਡ ਨਾਲ ਲਗਦੇ ਜੰਗਲ ਵਿਚ ਵਾਪਰੀ। ਡਿਪਟੀ ਰੇਂਜਰ ਸਮੇਤ ਅੱਠ ਕਰਮਚਾਰੀਆਂ ਨੂੰ ਪੁਲਿਸ ਨੇ ਕਲ ਗ੍ਰਿਫ਼ਤਾਰ ਕਰ ਲਿਆ।
ਪੁਲਿਸ ਅਧਿਕਾਰੀ ਖੇਮੇਂਦਰ ਜੈਤਵਾਰ ਨੇ ਦਸਿਆ, 'ਗਾਂਗਪੁਰ ਪਿੰਡ ਵਾਸੀ 40 ਸਾਲਾ ਰੂਪਚੰਦ ਸੋਨਵਾਨੇ ਦੀ ਮੰਗਲਵਾਰ ਸ਼ਾਮ ਹਤਿਆ ਕਰ ਕੇ ਲਾਸ਼ ਨੂੰ ਅੱਗ ਲਾ ਦਿਤੀ ਗਈ। ਮੁੱਖ ਮੁਲਜ਼ਮ ਡਿਪਟੀ ਰੇਂਜਰ ਸੰਤੋਸ਼ ਤੋਂ ਇਲਾਵਾ ਸੱਤ ਚੌਕੀਦਾਰਾਂ ਨੂੰ ਕਲ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਰੂਪਚੰਦ ਜੰਗਲ ਵਿਚੋਂ ਲਕੜੀ ਲਿਆਉਣ ਲਈ ਗਿਆ ਸੀ। ਗਸ਼ਤ 'ਤੇ ਨਿਕਲੇ ਡਿਪਟੀ ਰੇਂਜਰ ਨੇ ਉਸ ਨੂੰ ਫੜ ਲਿਆ।
ਜੰਗਲ ਵਿਚੋਂ ਕੀਮਤੀ ਲੱਕੜ ਕੱਟ ਕੇ ਲਿਜਾਣ ਦੇ ਸ਼ੱਕ ਵਿਚ ਉਸ ਨੂੰ ਪੁੱਛ-ਪੜਤਾਲ ਲਈ ਡਿਪਟੀ ਰੇਂਜਰ ਦੇ ਘਰ ਲਿਜਾਇਆ ਗਿਆ। ਕੁੱਝ ਪਿੰਡ ਵਾਲਿਆਂ ਦੇ ਵੇਖਣ 'ਤੇ ਡਿਪਟੀ ਰੇਂਜਰ ਨੇ ਕਿਹਾ ਕਿ ਪੁੱਛ-ਪੜਤਾਲ ਮਗਰੋਂ ਉਸ ਨੂੰ ਛੱਡ ਦਿਤਾ ਜਾਵੇਗਾ ਤੇ ਪਿੰਡ ਵਾਲੇ ਮੁੜ ਗਏ। ਬਾਅਦ ਵਿਚ ਉਸ ਨੂੰ ਏਨਾ ਕੁਟਿਆ ਗਿਆ ਕਿ ਉਸ ਦੀ ਰੇਂਜਰ ਦੇ ਘਰੇ ਹੀ ਮੌਤ ਹੋ ਗਈ।
ਫਿਰ ਰਾਤ ਦੇ ਹਨੇਰੇ ਵਿਚ ਉਸ ਦੀ ਲਾਸ਼ ਨੂੰ ਅੱਗ ਲਾ ਦਿਤੀ ਗਈ। ਜਦ ਰੂਪਚੰਦ ਅਗਲੇ ਦਿਨ ਵੀ ਘਰ ਨਾ ਮੁੜਿਆ ਤਾਂ ਉਸ ਦੇ ਘਰ ਵਾਲੇ ਰੇਂਜਰ ਕੋਲ ਗਏ ਪਰ ਉਥੋਂ ਤਸੱਲੀਬਖ਼ਸ਼ ਜਵਾਬ ਨਾ ਮਿਲਣ 'ਤੇ ਉਸ ਦੀ ਗੁਮਸ਼ੁਦਗੀ ਦੀ ਰੀਪੋਰਟ ਥਾਣੇ ਲਿਖਾ ਦਿਤੀ ਗਈ ਜਿਸ ਕਾਰਨ ਰੇਂਜਰ ਘਬਰਾ ਗਿਆ ਤੇ ਉਸ ਨੇ ਥਾਣੇ ਪਹੁੰਚ ਕੇ ਜੁਰਮ ਕਬੂਲ ਕਰ ਲਿਆ। (ਏਜੰਸੀ)