ਗਰਮੀ ਅਤੇ ਹੁੰਮਸ ਦੇ ਚਲਦਿਆਂ ਸੱਪ ਅਪਣੇ ਬਿਲਾਂ ਤੋਂ ਨਿਕਲ ਕੇ ਇਨਸਾਨੀ ਆਬਾਦੀ ਦੇ ਕੋਲ ਭਟਕ ਰਹੇ ਹਨ। ਸਾਲ 2015 ਨਾਲ ਤੁਲਨਾ ਕਰੀਏ ਤਾਂ ਰਿਹਾਇਸ਼ੀ ਭਵਨਾਂ ...
ਨਵੀਂ ਦਿੱਲੀ : ਗਰਮੀ ਅਤੇ ਹੁੰਮਸ ਦੇ ਚਲਦਿਆਂ ਸੱਪ ਅਪਣੇ ਬਿਲਾਂ ਤੋਂ ਨਿਕਲ ਕੇ ਇਨਸਾਨੀ ਆਬਾਦੀ ਦੇ ਕੋਲ ਭਟਕ ਰਹੇ ਹਨ। ਸਾਲ 2015 ਨਾਲ ਤੁਲਨਾ ਕਰੀਏ ਤਾਂ ਰਿਹਾਇਸ਼ੀ ਭਵਨਾਂ ਅਤੇ ਦਫ਼ਤਰ ਕੰਪਲੈਕਸਾਂ ਦੇ ਕੋਲ ਸੱਪ ਪਾਏ ਜਾਣ ਦੀ ਘਟਨਾ ਵਿਚ 60 ਫ਼ੀਸਦੀ ਤਕ ਦਾ ਵਾਧਾ ਹੋਇਆ ਹੈ। ਰਾਜਧਾਨੀ ਵਿਚ ਸਾਲ 2015 ਵਿਚ ਜਿੱਥੇ ਜੂਨ-ਜੁਲਾਈ ਵਿਚ ਸੱਪ ਨਿਕਲਣ ਦੀਆਂ 59 ਘਟਨਾਵਾਂ ਸਾਹਮਣੇ ਆਈ ਸਨ, ਉਥੇ ਹੀ ਇਸ ਸਾਲ ਇਨ੍ਹਾਂ ਦੋ ਮਹੀਨਿਆਂ ਵਿਚ ਸੱਪ ਨਿਕਲਣ ਦੀਆਂ 99 ਘਟਨਾਵਾਂ ਸਾਹਮਣੇ ਆਈਆਂ ਹਨ।
ਜ਼ਿਕਰਯੋਗ ਹੈ ਕਿ ਅਰਾਵਲੀ ਅਤੇ ਯਮਨਾ ਨੂੰ ਦਿੱਲੀ ਦੇ ਵਾਤਾਵਰਣ ਦੀਆਂ ਦੋ ਮੁੱਖ ਇਕਾਈਆਂ ਵਿਚ ਸ਼ਾਮਲ ਕੀਤਾ ਜਾਂਦਾ ਹੈ। ਇਨ੍ਹਾਂ ਦੋਵੇਂ ਥਾਵਾਂ ਵਿਚ ਘੁਲੇ ਮਿਲੇ ਜੰਤੂ ਅਤੇ ਬਨਸਪਤੀਆਂ ਪਾਈਆਂ ਜਾਂਦੀਆਂ ਹਨ। ਇਨ੍ਹਾਂ ਵਿਚ ਅਲੱਗ-ਅਲੱਗ ਪ੍ਰਜਾਤੀ ਦੇ ਸੱਪ ਵਿਚ ਸ਼ਾਮਲ ਹਨ। ਚਿੰਤਾ ਦੀ ਗੱਲ ਇਹ ਹੈ ਕਿ ਜੂਨ ਅਤੇ ਜੁਲਾਈ ਵਿਚ ਆਮ ਤੌਰ 'ਤੇ ਹੋਣ ਵਾਲੀ ਗਰਮੀ ਅਤੇ ਹੁੰਮਸ ਕਾਰਨ ਇਨ੍ਹਾਂ ਦੇ ਅਪਣੇ ਬਿਲਾਂ ਵਿਚੋਂ ਨਿਕਲ ਕੇ ਇਨਸਾਨੀ ਆਬਾਦੀ ਦੇ ਕੋਲ ਭਟਕਣ ਦੀਆਂ ਘਟਨਾਵਾਂ ਵਿਚ ਵਾਧਾ ਹੋ ਰਿਹਾ ਹੈ।
ਰਾਜਧਾਨੀ ਵਿਚ ਸੱਪ ਫੜਨ ਵਾਲੀ ਸੰਸਥਾ ਦੇ ਮੁਖੀ ਕਾਰਤਿਕ ਸੱਤਿਆ ਨਰਾਇਣ ਨੇ ਦਸਿਆ ਕਿ ਸੱਪਾਂ ਦੇ ਇਨਸਾਨੀ ਆਬਾਦੀ ਵਿਚ ਆਉਣ ਦੀਆਂ ਘਟਨਾਵਾਂ ਵਿਚ ਵਾਧਾ ਹੋਇਆ ਹੈ। ਹਾਲਾਂਕਿ ਇਸ ਦਾ ਮਤਲਬ ਇਹ ਨਹੀਂ ਕੱਢਿਆ ਜਾ ਸਕਦਾ ਕਿ ਸੱਪਾਂ ਦੀ ਆਬਾਦੀ ਵਧ ਗਈ ਹੈ। ਬਲਕਿ ਇਹ ਕਿਹਾ ਜਾ ਸਕਦਾ ਹੈ ਕਿ ਸਿਰਫ਼ ਇਨਸਾਨਾਂ ਦੇ ਨਾਲ ਇਨ੍ਹਾਂ ਦੀ ਮੁਠਭੇੜ ਹੋਣ ਦੀਆਂ ਘਟਨਾਵਾਂ ਵਧ ਗਈਆਂ ਹਨ। ਸੱਪ ਮਿਲਣ ਦੀਆਂ ਜ਼ਿਆਦਾਤਰ ਘਟਨਾਵਾਂ ਦੁਆਰਕਾ, ਛਤਰਪੁਰ, ਸੈਨਿਕ ਫਾਰਮ, ਜੇਐਨਯੂ ਕੰਪਲੈਕਸ, ਗ੍ਰੇਟਰ ਕੈਲਾਸ਼-1, ਦੋ ਅਤੇ ਤਿੰਨ ਅਤੇ ਵਸੰਤ ਵਿਹਾਰ ਵਰਗੇ ਖੇਤਰਾਂ ਵਿਚ ਸਾਹਮਣੇ ਆਈਆਂ ਹਨ।
ਇਸ ਸਾਲ ਫੜੇ ਗਏ 99 ਸੱਪਾਂ ਵਿਚੋਂ 74 ਸੱਪ ਘਰਾਂ ਅਤੇ ਰਿਹਾਇਸ਼ੀ ਭਵਨਾਂ ਤੋਂ ਫੜੇ ਗਏ ਹਨ। ਜਦਕਿ ਅੱਠ ਸੱਪ ਸਕੂਲ ਜਾਂ ਸਿੱਖਿਆ ਸੰਸਥਾਵਾਂ ਤੋਂ ਫੜੇ ਗਏ ਹਨ। ਮਨੁੱਖੀ ਆਬਾਦੀ ਦੇ ਵਿਚਕਾਰ ਇਸ ਸਾਲ ਮੁੱਖ ਤੌਰ 'ਤੇ ਸਪੈਕਟੇਬਲ ਕੋਬਰਾ (ਨਾਗ), ਕਰੈਤ, ਪਾਈਥਨ (ਅਜਗਰ), ਇੰਡੀਅਨ ਰੈਟ ਸਨੈਕ, ਕਾਮਨ ਸੈਂਡ ਬੋਆ, ਵੋਲਫ ਸਨੈਕ, ਬਲੈਕ ਹੈਡਡ ਰਾਇਲ ਸਨੈਕ ਪ੍ਰਜਾਤੀ ਦੇ ਸੱਪ ਫੜੇ ਗਏ ਹਨ। ਇਨ੍ਹਾਂ ਵਿਚੋਂ ਕੋਬਰਾ ਅਤੇ ਕਰੈਤ ਬੇਹੱਦ ਜ਼ਹਿਰੀਲੇ ਸੱਪ ਹੁੰਦੇ ਹਨ ਅਤੇ ਇਨ੍ਹਾਂ ਦੇ ਕੱਟਣ ਨਾਲ ਇਨਸਾਨ ਦੀ ਮੌਤ ਵੀ ਹੋ ਸਕਦੀ ਹੈ।
ਜੇਐਨਯੂ ਦੇ ਸਕੂਲ ਆਫ਼ ਲਾਈਫ਼ ਸਾਇੰਸੇਜ਼ ਵਿਗਿਆਨੀ ਸੂਰੀਆ ਪ੍ਰਕਾਸ਼ ਨੇ ਕਿਹਾ ਕਿ ਸੰਘਣੇ ਜੰਗਲਾਂ ਦੀ ਕਮੀ ਅਤੇ ਨਿਰਮਾਣ ਗਤੀਵਿਧੀਆਂ ਦੇ ਚਲਦੇ ਸੱਪ ਅਪਣੇ ਸੁਰੱਖਿਅਤ ਟਿਕਾਣਿਆਂ ਤੋਂ ਬਾਹਰ ਆ ਰਹੇ ਹਨ। ਨਿਰਮਾਣ ਕਾਰਜ ਦੌਰਾਨ ਡੂੰਘਾਈ ਨਾਲ ਹੋਣ ਵਾਲੀ ਖੁਦਾਈ ਦੇ ਚਲਦਿਆਂ ਸੱਪਾਂ ਦੇ ਘਰ ਤਬਾਹ ਹੋ ਜਾਂਦੇ ਹਨ ਅਤੇ ਉਹ ਛੁਪਣ ਲਈ ਇਨਸਾਨਾਂ ਦੀ ਆਬਾਦੀ ਵੱਲ ਜਾਂਦੇ ਹਨ। ਗਰਮੀ ਅਤੇ ਹੁੰਮਸ ਕਾਰਨ ਬਾਹਰ ਨਿਕਲ ਰਹੇ ਸੱਪ ਸਾਲ 2015 ਦੀ ਤੁਲਨਾ ਵਿਚ ਮਾਲਿਆਂ ਵਿਚ ਵਾਧਾ ਹੋਇਆ ਹੈ। ਇਸ ਸਾਲ ਜੂਨ-ਜੁਲਾਈ ਮਹੀਨੇ ਵਿਚ ਹੁਣ ਤਕ 99 ਮਾਮਲੇ ਸਾਹਮਣੇ ਆ ਚੁੱਕੇ ਹਨ।