ਰਾਜਸਥਾਲ ਦੇ ਕੋਟਾ 'ਚ ਤਿੰਨ ਦਿਨਾਂ ਅੰਦਰ ਦੋ ਵਿਦਿਆਰਥੀਆਂ ਨੇ ਖ਼ੁਦਕੁਸ਼ੀ ਕਰ ਲਈ। ਦੇਸ਼ ਦਾ ਕੋਚਿੰਗ ਹਬ ਕੋਟਾ ਇਸ ਸਾਲ ਹੁਣ ਤਕ ਇਮਤਿਹਾਨਾਂ ਦੀ ਤਿਆਰੀ ਕਰ ਰਹੇ...........
ਕੋਟਾ : ਰਾਜਸਥਾਲ ਦੇ ਕੋਟਾ 'ਚ ਤਿੰਨ ਦਿਨਾਂ ਅੰਦਰ ਦੋ ਵਿਦਿਆਰਥੀਆਂ ਨੇ ਖ਼ੁਦਕੁਸ਼ੀ ਕਰ ਲਈ। ਦੇਸ਼ ਦਾ ਕੋਚਿੰਗ ਹਬ ਕੋਟਾ ਇਸ ਸਾਲ ਹੁਣ ਤਕ ਇਮਤਿਹਾਨਾਂ ਦੀ ਤਿਆਰੀ ਕਰ ਰਹੇ 13 ਵਿਦਿਆਰਥੀਆਂ ਦੀ ਮੌਤ ਦਾ ਗਵਾਹ ਬਣ ਚੁਕਾ ਹੈ। ਤਿੰਨ ਦਿਨਾਂ ਵਿਚ ਜਿਸ ਦੂਜੀ ਵਿਦਿਆਰਥਣ ਨੇ ਖ਼ੁਦਕੁਸ਼ੀ ਕੀਤੀ ਹੈ, ਉਹ ਮਹਾਰਾਸ਼ਟਰ ਦੀ ਰਹਿਣ ਵਾਲੀ ਸੀ ਅਤੇ ਇਥੇ ਨੀਟ ਦੀ ਤਿਆਰੀ ਕਰ ਰਹੀ ਸੀ। ਮੰਗਲਵਾਰ ਨੂੰ ਉਸ ਦੀ ਲਾਸ਼ ਹੋਸਟਲ ਦੇ ਕਮਰੇ ਵਿਚ ਮਿਲੀ। ਪੁਲਿਸ ਨੇ ਦਸਿਆ ਕਿ 11ਵੀ ਦੀ ਵਿਦਿਆਰਥਣ ਸਾਕਸ਼ੀ ਮਹਾਰਾਸ਼ਟਰ ਦੀ ਨਿਵਾਸੀ ਸੀ ਅਤੇ ਉਹ ਇਥੇ ਕੁੰਹਾੜੀ ਲੈਂਡਮਾਰਕ ਵਿਖੇ ਹੋਸਟਲ ਵਿਚ ਰਹਿ ਰਹੀ ਸੀ।
ਸੋਮਵਾਰ ਦੇਰ ਰਾਤ ਤਕ ਉਹ ਹੋਰ ਵਿਦਿਆਰਥੀਆਂ ਨਾਲ ਪੜ੍ਹਾਈ ਕਰ ਰਹੀ ਸੀ। ਉਸ ਤੋਂ ਬਾਅਦ ਉਹ ਅਪਣੇ ਕਮਰੇ ਵਿਚ ਚਲੀ ਗਈ। ਮੰਗਲਵਾਰ ਨੂੰ ਦੁਪਹਿਰ ਤਕ ਉਹ ਹੋਸਟਲ ਦੇ ਕਮਰੇ ਤੋਂ ਬਾਹਰ ਨਹੀਂ ਆਈ। ਉਸ ਤੋਂ ਪਹਿਲਾਂ ਸੱਭ ਨੇ ਸੋਚਿਆ ਕਿ ਉਸ ਨੇ ਦੇਰ ਰਾਤ ਤਕ ਪੜ੍ਹਾਈ ਕੀਤੀ ਹੈ, ਇਸ ਲਈ ਸੌਂ ਰਹੀ ਹੋਵੇਗੀ ਪਰ ਦੁਪਹਿਰ ਤੋਂ ਬਾਅਦ ਵਾਰਡਨ ਨੇ ਦਰਵਾਜ਼ਾ ਖੜਕਾਇਆ ਤਾਂ ਅਖ਼ੀਰ ਦਰਵਾਜ਼ਾ ਤੋੜਿਆ ਗਿਆ।
ਅੰਦਰ ਉਸ ਦੀ ਲਾਸ਼ ਲਟਕ ਰਹੀ ਸੀ। ਡਾਕਟਰੀ ਅਤੇ ਇੰਜਨੀਅਰਿੰਗ ਦੀ ਕੋਚਿੰਗ ਲੈਣ ਲਈ ਹਰ ਸਾਲ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਤੋਂ 1.50 ਲੱਖ ਤੋਂ ਵੱਧ ਵਿਦਿਆਰਥੀ ਕੋਟਾ ਆਉਂਦੇ ਹਨ। ਜ਼ਿਲ੍ਹਾ ਪ੍ਰਸ਼ਾਸਨ ਵਲੋਂ ਦਿਤੇ ਅੰਕੜਿਆਂ ਮੁਤਾਬਕ 2013 ਤੋਂ 2017 ਤਕ ਕੋਟਾ 'ਚ ਕੋਚਿੰਗ ਕਰਨ ਵਾਲੇ 58 ਵਿਦਿਆਰਥੀ ਖ਼ੁਦਕੁਸ਼ੀ ਕਰ ਚੁਕੇ ਹਨ। (ਏਜੰਸੀ)
