ਅਮੇਰਿਕਨ ਮੈਗਜ਼ੀਨ ‘ਟਾਈਮ’ ਨੇ ਮੋਦੀ ਨੂੰ ਦੱਸਿਆ ‘ਡਿਵਾਈਡਰ ਇਨ ਚੀਫ਼’
ਨਵੀਂ ਦਿੱਲੀ: ਅਮੇਰਿਕਨ ਨਿਊਜ਼ ਮੈਗਜ਼ੀਨ ‘ਟਾਈਮ’ ਅਪਣੀ ਇਕ ਹੈਡਲਾਈਨ ਨੂੰ ਲੈ ਕੇ ਕਾਫ਼ੀ ਚਰਚਾ ਵਿਚ ਹੈ। ਟਾਈਮ ਮੈਗਜ਼ੀਨ ਨੇ ਪ੍ਰਧਾਨ ਮੰਤਰੀ ਮੋਦੀ ਨੂੰ ਲੈ ਕੇ ਅਪਣੇ ਕਵਰ ਪੇਜ ਉਤੇ ਇਕ ਹੈਡਲਾਈਨ ਦਿਤੀ ਹੈ, ਜਿਸ ਉਤੇ ਵੱਡਾ ਵਿਵਾਦ ਹੋਣ ਦੀ ਸੰਭਾਵਨਾ ਹੈ। ਮੈਗਜ਼ੀਨ ਨੇ ਕਵਰ ਪੇਜ ਉਤੇ ਪ੍ਰਧਾਨ ਮੰਤਰੀ ਮੋਦੀ ਦੀ ਫੋਟੋ ਨਾਲ ਇੰਡੀਆਜ਼ ਡੀਵਾਈਡਰ ਇਨ ਚੀਫ਼ (ਭਾਰਤ ਨੂੰ ਤੋੜਨ ਵਾਲਾ ਪ੍ਰਮੁੱਖ) ਲਿਖਿਆ ਹੈ।
ਇਸ ਤੋਂ ਇਲਾਵਾ ਟਾਈਮ ਮੈਗਜ਼ੀਨ ਦੀ ਵੈੱਬਸਾਈਟ ਉਤੇ ਇਸ ਆਰਟੀਕਲ ਨੂੰ ਪਬਲਿਸ਼ ਵੀ ਕੀਤਾ ਗਿਆ ਹੈ, ਜਿਸ ਵਿਚ ਪ੍ਰਧਾਨ ਮੰਤਰੀ ਮੋਦੀ ਉਤੇ ਸੰਪ੍ਰਦਾਇਕ ਮਾਹੌਲ ਨੂੰ ਖ਼ਰਾਬ ਕਰਨ ਦੇ ਇਲਜ਼ਾਮ ਲਗਾਏ ਗਏ ਹਨ। ਇਸ ਹੈੱਡਲਾਈਨ ਨੂੰ ਦੇਣ ਵਾਲੇ ਸੰਪਾਦਕ ਦਾ ਨਾਮ ਆਤਿਸ਼ ਤਸੀਰ ਹੈ। ਉਸ ਨੇ ਅਪਣੇ ਡਿਜ਼ੀਟਲ ਪਲੇਟਫਾਰਮ ਉਤੇ ਵੀ ਇਸੇ ਤਰ੍ਹਾਂ ਦੀ ਹੈੱਡਲਾਇਨ ਦਿੰਦੇ ਹੋਏ ਲਿਖਿਆ ਹੈ, ‘ਕੀ ਦੁਨੀਆਂ ਦੇ ਸਭ ਤੋਂ ਵੱਡੇ ਲੋਕਤੰਤਰ ਨੂੰ ਮੋਦੀ ਸਰਕਾਰ ਦੇ ਪੰਜ ਸਾਲ ਹੋਰ ਝੇਲਣੇ ਹੋਣਗੇ?’
ਟਾਈਮ ਦੇ ਡਿਜ਼ੀਟਲ ਪਲੇਟਫਾਰਮ ਉਤੇ ਛਪੇ ਆਰਟੀਕਲ ਵਿਚ ਪ੍ਰਧਾਨ ਮੰਤਰੀ ਮੋਦੀ ਦੀ ਜਵਾਹਰ ਲਾਲ ਨਹਿਰੂ ਨਾਲ ਤੁਲਣਾ ਕੀਤੀ ਗਈ ਹੈ। ਇਸ ਵਿਚ ਲਿਖਿਆ ਗਿਆ ਹੈ ਕਿ ਜਵਾਹਰ ਲਾਲ ਨਹਿਰੂ ਨੇ ਦੇਸ਼ ਵਿਚ ਸਾਰਿਆਂ ਨੂੰ ਬਰਾਬਰੀ ਦਾ ਹੱਕ ਦਿੰਦੇ ਹੋਏ ਕਿਹਾ ਕਿ ਇਥੇ ਹਰ ਧਰਮ ਦੇ ਲੋਕਾਂ ਲਈ ਜਗ੍ਹਾ ਹੋਵੇਗੀ। ਨਹਿਰੂ ਸੈਕਿਊਲਰ ਵਿਚਾਰਧਾਰਾ ਵਾਲੇ ਸੀ ਪਰ ਪ੍ਰਧਾਨ ਮੰਤਰੀ ਮੋਦੀ ਨੇ ਇਸ ਪੰਜ ਸਾਲਾਂ ਵਿਚ ਸੰਪ੍ਰਦਾਇਕ ਮਾਹੌਲ ਖ਼ਰਾਬ ਕਰਨ ਦੀ ਕੋਸ਼ਿਸ਼ ਕੀਤੀ।
ਟਾਈਮ ਮੈਗਜ਼ੀਨ ਦੇ ਇਸ ਆਰਟੀਕਲ ਵਿਚ ਪ੍ਰਧਾਨ ਮੰਤਰੀ ਮੋਦੀ ਉਤੇ ਦੇਸ਼ ਦੇ ਫਾਉਂਡਿੰਗ ਫਾਦਰਜ਼ ਅਤੇ ਵੱਡੇ ਅਹੁਦਿਆਂ ਉਤੇ ਰਹਿਣ ਵਾਲੇ ਲੋਕਾਂ ਉਤੇ ਵੀ ਹਮਲਾ ਬੋਲਣ ਦਾ ਇਲਜ਼ਾਮ ਲਗਾਇਆ ਗਿਆ ਹੈ। ਇਸ ਵਿਚ ਲਿਖਿਆ ਹੈ, ਮੋਦੀ ਦੀ ਜਿੱਤ ਤੋਂ ਬਾਅਦ ਇਕ ਸ਼ੱਕ ਪੈਦਾ ਹੋਇਆ, ਜਦੋਂ ਉਨ੍ਹਾਂ ਨੇ ਕਈ ਸਨਮਾਨਿਤ ਲੋਕਾਂ ਉਤੇ ਹਮਲਾ ਬੋਲਣਾ ਸ਼ੁਰੂ ਕੀਤਾ। ਉਨ੍ਹਾਂ ਨੇ ਨਹਿਰੂਵਾਦ ਅਤੇ ਸਮਾਜਵਾਦੀ ਵਿਚਾਰਧਾਰਾ ਉਤੇ ਹਮਲਾ ਬੋਲਿਆ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਕਾਂਗਰਸ ਅਜ਼ਾਦ ਭਾਰਤ ਦੀ ਵੀ ਗੱਲ ਕੀਤੀ।
ਆਰਟੀਕਲ ਵਿਚ ਗੁਜਰਾਤ ਦੰਗਿਆਂ ਦਾ ਵੀ ਜ਼ਿਕਰ ਕੀਤਾ ਗਿਆ ਹੈ। ਇਸ ਵਿਚ ਲਿਖਿਆ ਹੈ, ਮੋਦੀ ਨੇ ਹਰ ਬੇਰਹਿਮੀ ਭਰੇ ਦੰਗਿਆਂ ਤੋਂ ਬਾਅਦ ਚੁੱਪੀ ਸਾਧੀ ਰੱਖੀ। ਜਿਵੇਂ ਸਾਲ 2002 ਵਿਚ ਉਨ੍ਹਾਂ ਦੀ ਹੋਮ ਸਟੇਟ ਗੁਜਰਾਤ ਵਿਚ ਇਕੱਠੇ ਲਗਭੱਗ ਇਕ ਹਜ਼ਾਰ ਲੋਕਾਂ ਨੂੰ ਮਾਰ ਦਿਤਾ ਗਿਆ, ਜਿਨ੍ਹਾਂ ਵਿਚ ਜ਼ਿਆਦਾਤਰ ਮੁਸਲਮਾਨ ਭਾਈਚਾਰੇ ਦੇ ਲੋਕ ਸਨ। ਇਸ ਸਭ ਨਾਲ ਉਨ੍ਹਾਂ ਨੇ ਇਹੀ ਸਾਬਿਤ ਕੀਤਾ ਸੀ ਕਿ ਉਹ ਭੀੜਤੰਤਰ ਨੂੰ ਵਧਾਵਾ ਦਿੰਦੇ ਹਨ।
ਚੁਣਾਵੀ ਮਾਹੌਲ ਵਿਚ ਟਾਈਮ ਵਰਗੇ ਵੱਡੇ ਮੈਗਜ਼ੀਨ ਦਾ ਇਹ ਆਰਟੀਕਲ ਸਿਆਸੀ ਤੂਫ਼ਾਨ ਖੜ੍ਹਾ ਕਰ ਸਕਦਾ ਹੈ। ਫ਼ਿਲਹਾਲ ਇਸ ਨੂੰ ਲੈ ਕੇ ਭਾਜਪਾ ਦੇ ਕਿਸੇ ਵੀ ਨੇਤਾ ਵਲੋਂ ਕੋਈ ਪ੍ਰਤੀਕਿਰਿਆ ਨਹੀਂ ਆਈ ਹੈ।