ਬੰਬਈ ਹਾਈ ਕੋਰਟ ਨੇ ਵਟਸਐਪ ਜ਼ਰੀਏ ਨੋਟਿਸ ਤਾਮੀਲ ਕੀਤੇ ਜਾਣ ਨੂੰ ਪ੍ਰਵਾਨ ਕਰ ਲਿਆ ਹੈ। ਅਦਾਲਤ ਨੇ ਕਿਹਾ ਕਿ ਪੀਡੀਐਫ਼ ਦੇ ਰੂਪ ਵਿਚ ਤਾਮੀਲ ਕੀਤੇ ਗਏ....
ਮੁੰਬਈ, ਬੰਬਈ ਹਾਈ ਕੋਰਟ ਨੇ ਵਟਸਐਪ ਜ਼ਰੀਏ ਨੋਟਿਸ ਤਾਮੀਲ ਕੀਤੇ ਜਾਣ ਨੂੰ ਪ੍ਰਵਾਨ ਕਰ ਲਿਆ ਹੈ। ਅਦਾਲਤ ਨੇ ਕਿਹਾ ਕਿ ਪੀਡੀਐਫ਼ ਦੇ ਰੂਪ ਵਿਚ ਤਾਮੀਲ ਕੀਤੇ ਗਏ ਨੋਟਿਸ ਨੂੰ ਨਾ ਸਿਰਫ਼ ਭੇਜਿਆ ਗਿਆ ਸਗੋਂ ਪ੍ਰਾਪਤ ਕਰਨ ਵਾਲੇ ਵਿਅਕਤੀ ਨੇ ਇਸ ਨੂੰ ਖੋਲ੍ਹ ਕੇ ਵੀ ਵੇਖਿਆ। ਜੱਜ ਗੌਤਮ ਪਟੇਲ ਇਸ ਹਫ਼ਤੇ ਦੇ ਸ਼ੁਰੂ ਵਿਚ ਐਸਬੀਆਈ ਕਾਰਡ ਐਂਡ ਪੇਮੈਂਟਸ ਸਰਵਿਸਜ਼ ਪ੍ਰਾਈਵੇਟ ਲਿਮਟਿਡ ਦੇ ਮਾਮਲੇ ਸਬੰਧੀ ਪਟੀਸ਼ਨ 'ਤੇ ਸੁਣਵਾਈ ਕਰ ਰਹੇ ਸਨ।
ਕੰਪਨੀ ਨੇ ਕਿਹਾ ਕਿ ਰੋਹਿਤ ਜਾਧਵ ਨੋਟਿਸ ਲੈਣ ਤੋਂ ਬਚ ਰਿਹਾ ਹੈ। ਕੰਪਨੀ ਮੁਤਾਬਕ ਅੱਠ ਜੂਨ ਨੂੰ ਉਸ ਨੂੰ ਕੰਪਨੀ ਦੇ ਅਧਿਕਾਰੀ ਨੇ ਨੋਟਿਸ ਤਾਮੀਲ ਕੀਤਾ ਸੀ। ਇਹ ਨੋਟਿਸ ਵਟਸਐਪ ਜ਼ਰੀਏ ਪੀਡੀਐਫ਼ ਵਜੋਂ ਭੇਜਿਆ ਗਿਆ ਅਤੇ ਇਕ ਸੰਦੇਸ਼ ਜ਼ਰੀਏ ਉਸ ਨੂੰ ਸੁਣਵਾਈ ਦੀ ਅਗਲੀ ਤਰੀਕ ਬਾਰੇ ਦਸਿਆ ਗਿਆ। ਕੰਪਨੀ ਨੇ ਹਾਈ ਕੋਰਟ ਵਿਚ ਪਟੀਸ਼ਨ ਪਾ ਦਿਤੀ ਕਿਉਂਕਿ ਜਾਧਵ ਨੇ ਉਸ ਦਾ ਫ਼ੋਨ ਸੁਣਨਾ ਬੰਦ ਕਰ ਦਿਤਾ ਅਤੇ ਉਸ ਦੇ ਅਧਿਕਾਰੀਆਂ ਨੂੰ ਮਿਲਣ ਤੋਂ ਇਨਕਾਰ ਕਰ ਦਿਤਾ।
ਜੱਜ ਪਟੇਲ ਨੇ ਕਿਹਾ, 'ਨਾਗਰਿਕ ਪ੍ਰਕ੍ਰਿਆ ਨਿਯਮ ਤਹਿਤ ਨੋਟਿਸ ਤਾਮੀਲ ਕਰਨ ਦੇ ਮਕਸਦ ਨਾਲ ਮੈਂ ਇਸ ਨੂੰ ਪ੍ਰਵਾਨ ਕਰਾਂਗਾ। ਮੈਂ ਇਸ ਲਈ ਅਜਿਹਾ ਕਹਿ ਰਿਹਾ ਹਾਂ ਕਿਉਂਕਿ ਆਈਕਲ ਸੰਕੇਤ ਯਾਨੀ ਵਟਸਐਪ ਇਹ ਸਪੱਸ਼ਟ ਵਿਖਾ ਰਹੇ ਹਨ ਕਿ ਉਸ ਦੇ ਨੰਬਰ 'ਤੇ ਸੰਦੇਸ਼ ਭੇਜਿਆ ਗਿਆ ਤੇ ਉਸ ਨੇ ਖੋਲ੍ਹਿਆ ਵੀ। (ਏਜੰਸੀ)