ਹੋਮਿਉਪੈਥੀ ਦੀ ਇਕ ਵਿਦਿਆਰਥਣ ਨੂੰ ਕਾਲਜ ਪ੍ਰਬੰਧਕਾਂ ਨੇ ਪ੍ਰੀਖਿਆ ਵਿਚ ਬੈਠਣ ਤੋਂ ਇਸ ਲਈ ਰੋਕ ਦਿਤਾ
ਮੁੰਬਈ, ਹੋਮਿਉਪੈਥੀ ਦੀ ਇਕ ਵਿਦਿਆਰਥਣ ਨੂੰ ਕਾਲਜ ਪ੍ਰਬੰਧਕਾਂ ਨੇ ਪ੍ਰੀਖਿਆ ਵਿਚ ਬੈਠਣ ਤੋਂ ਇਸ ਲਈ ਰੋਕ ਦਿਤਾ ਕਿਉਂਕਿ ਉਸ ਦੀਆਂ ਹਾਜ਼ਰੀਆਂ ਘੱਟ ਸਨ। ਵਿਦਿਆਰਥਣ ਦਾ ਦੋਸ਼ ਹੈ ਕਿ ਉਸ ਦੀਆਂ ਹਾਜ਼ਰੀਆਂ ਇਸ ਲਈ ਘਟ ਗਈਆਂ ਕਿਉਂਕਿ ਉਹ ਹਿਜ਼ਾਬ ਪਹਿਨਦੀ ਸੀ ਤੇ ਉਸ ਨੂੰ ਹਿਜ਼ਾਬ ਪਹਿਨ ਕੇ ਕਲਾਸ 'ਚ ਆਉਣ ਤੋਂ ਰੋਕਿਆ ਗਿਆ। ਵਿਦਿਆਥਣ ਨੇ ਇਸ ਸਬੰਧੀ ਬੰਬੇ ਹਾਈ ਕੋਰਟ 'ਚ ਪਟੀਸ਼ਨ ਪਾਈ ਹੈ।
ਬਾਂਦਰਾ ਦੀ ਰਹਿਣ ਵਾਲੀ ਫ਼ਾਕਿਮਾ ਬਾਦਾਮੀ ਨੇ ਅਪਣੀ ਪਟੀਸ਼ਲ ਵਿਚ ਦਾਅਵਾ ਕੀਤਾ ਹੈ ਕਿ ਉਸ ਦੀਆਂ ਹਾਜ਼ਰੀਆਂ ਇਸ ਲਈ ਘਟ ਗਈਆਂ ਕਿਉਂਕਿ ਠਾਣੇ ਸਥਿਤ ਹੋਮਿਉਪੈਥੀ ਮੈਡੀਕਲ ਕਾਲਜ ਦੇ ਪ੍ਰਬੰਧਕਾਂ ਨੇ ਉਸ ਨੂੰ ਹਿਜ਼ਾਬ ਪਹਿਨ ਕੇ ਕਲਾਸ ਵਿਚ ਨਹੀਂ ਆਉਣ ਦਿਤਾ। ਵਿਦਿਆਰਥਣ ਦਾ ਦੋਸ਼ ਹੈ ਕਿ ਕਾਲਜ ਪ੍ਰਬੰਧਕਾਂ ਨੇ ਸਾਰੀਆਂ ਮੁਸਲਿਮ ਵਿਦਿਆਰਥਣਾਂ 'ਤੇ ਇਹ ਪਾਬੰਦੀ ਲਾ ਰੱਖੀ ਹੇ ਕਿ ਉਹ ਹਿਜ਼ਾਬ ਪਹਿਨ ਕੇ ਕਾਲਜ ਕੰਪਲੈਕਸ ਵਿਚ ਨਾ ਆਉਣ। ਬਾਦਾਮੀ ਨੇ ਸਾਲ 2016 ਵਿਚ ਇਸ ਕਾਲਜ ਮੈਡੀਸਨ ਸਰਜਰੀ ਲਈ ਦਾਖ਼ਲਾ ਲਿਆ ਸੀ।
ਉਸ ਨੇ ਇਸ ਸਬੰਧੀ ਯੂਨੀਵਰਸਿਟੀ ਅਤੇ ਮੰਤਰਾਲੇ ਦੇ ਉਚ ਅਧਿਕਾਰੀਆਂ ਨੂੰ ਵੀ ਪੱਤਰ ਲਿਖੇ ਸਨ ਪਰ ਫਿਰ ਵੀ ਮੁਸ਼ਕਲ ਦਾ ਹੱਲ ਨਹੀਂ ਨਿਕਲਿਆ। ਪਹਿਲੀ ਵਾਰ ਵਿਦਿਆਰਥਣ ਇਸ ਮਸਲੇ ਨੂੰ ਲੈ ਕੇ 2017 'ਚ ਅਦਾਲਤ ਗਈ ਸੀ ਤੇ ਉਸ ਸਮੇਂ ਕਾਲਜ ਨੇ ਵਿਦਿਆਰਥਣ ਨੂੰ ਅਗਲੀਆਂ ਪ੍ਰੀਖਿਆਵਾਂ ਵਿਚ ਬੈਠਣ ਦੀ ਆਗਿਆ ਦੇਣਾ ਮੰਨ ਲਿਆ ਪਰ ਇਸ ਦੇ ਬਾਵਜੂਦ ਵੀ ਕਾਲਜ ਪ੍ਰਬੰਧਕ ਉਸ ਨਾਲ ਵਿਤਕਰਾ ਕਰਦੇ ਰਹੇ।
ਇਸ ਮਾਮਲੇ ਦੀ ਸੁਣਵਾਈ ਜਸਟਿਸ ਐਸ ਜੇ ਕਥਾਵਾਲਾ ਤੇ ਜਸਟਿਸ ਅਜੈ ਗਡਕਰੀ ਕਰ ਰਹੇ ਹਨ। ਇਸ ਮਾਮਲੇ ਦੀ ਅਗਲੀ ਸੁਣਵਾਈ 25 ਮਈ ਨੂੰ ਹੋਵੇਗੀ। (ਏਜੰਸੀ)