ਅੱਜ ਨਵਾਂ ਸਾਲ ਚੜ੍ਹਦਿਆਂ ਹੀ ਲੋਕਾਂ ਨੂੰ ਵੱਡੀ ਰਾਹਤ ਮਿਲੀ ਅਤੇ ਸਵੇਰੇ 10 ਵਜੇ ਤੋਂ ਬਾਅਦ ਧੁੱਪ ਨਿਕਲ ਆਈ
ਚੰਡੀਗੜ੍ਹ- ਪੂਰੇ ਦੇਸ਼ 'ਚ ਨਵਾਂ ਸਾਲ ਧੂਮਧਾਮ ਨਾਲ ਮਨਾਇਆ ਜਾ ਰਿਹਾ ਹੈ, ਉੱਥੇ ਹੀ ਪੰਜਾਬ ਦੇ ਲੋਕਾਂ ਲਈ ਨਵਾਂ ਸਾਲ ਦੁੱਗਣੀ ਖੁਸ਼ੀ ਲੈ ਕੇ ਆਇਆ ਹੈ। ਬੀਤੇ 15 ਦਿਨਾਂ ਤੋਂ ਸੂਬੇ 'ਚ ਕੜਾਕੇ ਦੀ ਠੰਢ ਨੇ ਲੋਕਾਂ ਦਾ ਬੁਰਾ ਹਾਲ ਕਰ ਦਿੱਤਾ ਸੀ। 2019 ਦੇ ਦਸੰਬਰ ਮਹੀਨੇ 'ਚ ਪਈ ਠੰਢ ਨੇ ਪਿਛਲੇ ਕਈ ਸਾਲਾਂ ਦੇ ਰਿਕਾਰਡ ਤੋੜ ਦਿੱਤੇ ਸਨ। ਲੋਕਾਂ ਨੂੰ ਦੋ ਹਫਤੇ ਤੋਂ ਸੂਰਜ ਦੇ ਦਰਸ਼ਨ ਤਕ ਨਹੀਂ ਹੋਏ ਸਨ।
File Photo
ਅੱਜ ਨਵਾਂ ਸਾਲ ਚੜ੍ਹਦਿਆਂ ਹੀ ਲੋਕਾਂ ਨੂੰ ਵੱਡੀ ਰਾਹਤ ਮਿਲੀ ਅਤੇ ਸਵੇਰੇ 10 ਵਜੇ ਤੋਂ ਬਾਅਦ ਧੁੱਪ ਨਿਕਲ ਆਈ। ਇਸ ਨਾਲ ਲੋਕਾਂ ਨੂੰ ਕੁੱਝ ਰਾਹਤ ਜ਼ਰੂਰ ਮਿਲੀ ਹੈ। ਮੌਸਮ ਵਿਭਾਗ ਦੇ ਮੁਕਾਬਿਕ ਅਗਲੇ ਦੋ ਦਿਨਾਂ ਤਕ ਵੱਧੋ-ਵੱਧ ਤੇ ਘੱਟੋ-ਘੱਟ ਤਾਪਮਾਨ 'ਚ ਵਾਧਾ ਹੋਣ ਦੇ ਆਸਾਰ ਹਨ ਨਾਲ ਹੀ 2 ਤੇ 3 ਜਨਵਰੀ ਨੂੰ ਹਲਕੀ ਬਾਰਿਸ਼ ਪੈਣ ਦੀ ਵੀ ਸੰਭਾਵਨਾ ਹੈ। ਇਸ ਕਾਰਨ 4 ਅਤੇ 5 ਜਨਵਰੀ ਨੂੰ ਸੰਘਣਾ ਕੋਹਰਾ ਮੁੜ ਸੂਬੇ ਨੂੰ ਆਪਣੀ ਲਪੇਟ 'ਚ ਲੈ ਸਕਦਾ ਹੈ।
File Photo
ਅੱਜ ਸਵੇਰੇ 10 ਵਜੇ ਤਕ ਵੱਧ ਤੋਂ ਵੱਧ ਤਾਪਮਾਨ ਮੋਹਾਲੀ, ਗੁਰਦਾਸਪੁਰ, ਮੋਗਾ 'ਚ 9 ਡਿਗਰੀ, ਅੰਮ੍ਰਿਤਸਰ 4 ਡਿਗਰੀ, ਪਟਿਆਲਾ, ਜਲੰਧਰ, ਲੁਧਿਆਣਾ 6 ਡਿਗਰੀ, ਸੰਗਰੂਰ, ਫਰੀਦਕੋਟ, ਭਠਿੰਡਾ, ਮਾਨਸਾ, ਫਾਜਿਲਕਾ 'ਚ 5 ਡਿਗਰੀ, ਚੰਡੀਗੜ੍ਹ, ਰੋਪੜ 'ਚ 12 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ।
File Photo
ਜ਼ਿਕਰਯੋਗ ਹੈ ਕਿ ਉੱਤਰੀ ਭਾਰਤ ’ਚ ਪਹਾੜਾਂ ਤੋਂ ਲੈ ਕੇ ਮੈਦਾਨੀ ਇਲਾਕਿਆਂ ਤੱਕ ਰਿਕਾਰਡ ਤੋੜ ਠੰਢ ਨੇ ਆਮ ਜਨਜੀਵਨ ਠੱਪ ਕਰ ਕੇ ਰੱਖ ਦਿੱਤਾ ਸੀ। ਲੱਦਾਖ ਦੇ ਦਰਾਸ ਤੋਂ ਲੈ ਕੇ ਪੰਜਾਬ ਦੇ ਅੰਮ੍ਰਿਤਸਰ, ਬਠਿੰਡਾ ਅਤੇ ਉੱਤਰ ਪ੍ਰਦੇਸ਼ ਦੇ ਮੁਜ਼ੱਫ਼ਰਨਗਰ ਤੱਕ ਪਾਰਾ ਸਿਫ਼ਰ ਤੱਕ ਪਹੁੰਚ ਗਿਆ ਸੀ।
