ਪੰਜਾਬ ਵਿਚ ਸਰਕਾਰੀ ਨੌਕਰੀ ਲਈ ਜ਼ਰੂਰੀ ਹੈ ਇਹ ਪ੍ਰੀਖਿਆ
Punjab News: ਪਿਛਲੇ ਮਹੀਨੇ ਹੋਈ ਪੰਜਾਬੀ ਪ੍ਰਬੋਧ ਪ੍ਰੀਖਿਆ ਦਾ ਨਤੀਜਾ ਐਲਾਨ ਦਿਤਾ ਗਿਆ ਹੈ। ਇਸ ਪ੍ਰੀਖਿਆ ਵਿਚ ਹਿੱਸਾ ਲੈਣ ਵਾਲੇ ਕੁੱਲ 62 ਉਮੀਦਵਾਰਾਂ ਵਿਚੋਂ 55 ਉਮੀਦਵਾਰ ਫੇਲ੍ਹ ਹੋ ਗਏ ਹਨ। ਦਰਅਸਲ ਪੰਜਾਬੀ ਪ੍ਰਬੋਧ ਪ੍ਰੀਖਿਆ ਸਿਰਫ਼ ਉਹੀ ਉਮੀਦਵਾਰ ਦੇ ਸਕਦੇ ਹਨ, ਜਿਨ੍ਹਾਂ ਨੇ ਪੰਜਾਬ ਵਿਚ ਕਿਸੇ ਸਰਕਾਰੀ ਨੌਕਰੀ ਲਈ ਅਪਲਾਈ ਕਰਨਾ ਹੋਵੇ।
2022 ਵਿਚ ਪ੍ਰੀਖਿਆ ਲਈ ਦੋ ਪੇਪਰ ਲੈਣ ਦਾ ਫ਼ੈਸਲਾ ਕੀਤਾ ਗਿਆ ਸੀ, ਇਸ ਨੂੰ ਪਾਸ ਕਰਨ ਲਈ ਦੋਵੇਂ ਪੇਪਰ ਦੇਣੇ ਅਤੇ ਪਾਸ ਕਰਨੇ ਲਾਜ਼ਮੀ ਹਨ। ਦੋਵੇਂ ਭਾਗ 75-75 ਅੰਕ ਦੇ ਹੁੰਦੇ ਹਨ। ਪਹਿਲੇ ਭਾਗ ਵਿਚ ਤਕਨੀਕੀ ਵਿਆਕਰਨ ਜਿਵੇਂ, ਲੇਖ, ਬਿਨੈ ਪੱਤਰ, ਮੁਹਾਵਰੇ, ਅਖਾਣ, ਸ਼ਬਦ ਤੇ ਭੇਦ, ਅਗੇਤਰ ਪਿਛੇਤਰ, ਵਚਨ ਬਦਲੋ, ਵਿਸ਼ਰਾਮ ਚਿੰਨ੍ਹ, ਸੰਖੇਪ ਰਚਨਾ, ਸ਼ਬਦਾਂ ਜਾਂ ਵਾਕਾਂ ਨੂੰ ਸ਼ੁੱਧ ਕਰਨਾ ਆਦਿ ਸ਼ਾਮਲ ਹੁੰਦਾ ਹੈ।
ਦੂਜੇ ਭਾਗ ਵਿਚ ਅੰਗਰੇਜ਼ੀ ਅਤੇ ਪੰਜਾਬੀ ਅਨੁਵਾਦ ਕਰ ਕੇ ਵਾਕ ਬਣਾਉਣਾ, ਅੰਕਾਂ ਨੂੰ ਪੰਜਾਬੀ ਅਤੇ ਅੰਗਰੇਜ਼ੀ ਵਿਚ ਲਿਖਣਾ, ਆਮ ਜਾਣਕਾਰੀ ਸਬੰਧੀ ਸਵਾਲ, ਕੰਪਿਊਟਰ ਸਬੰਧੀ ਸਵਾਲ, ਚਲੰਤ ਮੁੱਦਿਆਂ ਸਬੰਧੀ ਪੈਰ੍ਹਾ ਲਿਖਣਾ, ਪੰਜਾਬ ਦੇ ਇਤਿਹਾਸ ਅਤੇ ਸੱਭਿਆਚਾਰ ਨਾਲ ਸਬੰਧਤ ਪੰਜ ਸਵਾਲ ਹੁੰਦੇ ਹਨ। ਇਨ੍ਹਾਂ ਪ੍ਰੀਖਿਆਵਾਂ ਨੂੰ ਪਾਸ ਕਰਨ ਲਈ ਘੱਟੋ ਘੱਟ 25-25 ਅੰਕ ਲਾਜ਼ਮੀ ਹਨ।
ਦਰਅਸਲ ਸਰਕਾਰ ਵਲੋਂ 2009 ਵਿਚ ਸਰਕਾਰੀ ਨੌਕਰੀ ਵਿਚ ਗਰੁੱਪ ਸੀ ਅਸਾਮੀਆਂ ਲਈ ਨਿਰਧਾਰਤ ਯੋਗਤਾ ਗ੍ਰੈਜੂਏਸ਼ਨ ਕੀਤੀ ਗਈ ਹੈ। ਇਸ ਲਈ ਪ੍ਰਬੋਧ ਪ੍ਰੀਖਿਆ ਦੇਣ ਵਾਲੇ ਉਮੀਦਵਾਰਾਂ ਦੀ ਯੋਗਤਾ ਵੀ ਗ੍ਰੈਜੂਏਸ਼ਨ ਹੈ। ਇਹ ਪ੍ਰੀਖਿਆ ਸਾਲ ਵਿਚ ਚਾਰ ਵਾਰ, ਮਾਰਚ, ਜੂਨ, ਸਤੰਬਰ ਅਤੇ ਦਸੰਬਰ ਮਹੀਨਿਆਂ ਵਿਚ ਹੁੰਦੀ ਹੈ। ਇਸ ਪ੍ਰੀਖਿਆ ਲਈ ਉਮੀਦਵਾਰ ਦੀ ਉਮਰ ਸੀਮਾ 18 ਤੋਂ 37 ਸਾਲ ਤਕ ਹੈ।