ਟੈਲੀਗ੍ਰਾਮ ਰਾਂਹੀ ਭੇਜਿਆ ਸੁਨੇਹਾ ਅਤਿਵਾਦੀਆਂ ਤੱਕ ਪਹੁੰਚਣ ਤੋਂ ਆਪਣੇ ਆਪ ਡਿਲੀਟ ਹੋ ਜਾਂਦੈ
ਅੰਮ੍ਰਿਤਸਰ- ਸਰਹੱਦ ਪਾਰ ਬੈਠੇ ਪਾਕਿਸਤਾਨੀ ਤਸਕਰ ਅਤੇ ਅਤਿਵਾਦੀ ਭਾਰਤ ਸਮੇਤ ਹੋਰਨਾਂ ਦੇਸ਼ਾਂ ਦੇ ਵਿਰੁੱਧ ਕਾਰਵਾਈਆਂ ਨੂੰ ਅੰਜ਼ਾਮ ਦੇਣ ਤੇ ਗੁਪਤ ਸੁਨੇਹੇ ਭੇਜਣ, ਨਸ਼ਾ ਤੇ ਹੋਰ ਕਈ ਅਜਿਹੀਆਂ ਵਸਤੂਆਂ ਦੀ ਤਸਕਰੀ ਲਈ ਸਾਰੀ ਜਾਣਕਾਰੀ ਟੈਲੀਗ੍ਰਾਮ ਮੈਸੇਂਜਰ ਦੇ ਜਰੀਏ ਸਾਂਝੀ ਕਰ ਰਹੇ ਹਨ। ਇਸ ਟੈਲੀਗ੍ਰਾਮ ਦੇ ਰਾਂਹੀ ਸਾਮਾਨ ਦੀ ਡਿਲਵਰੀ ਕਿਸ ਜਗ੍ਹਾ ਤੇ ਹੋਵੇਗੀ, ਸਾਮਾਨ ਲੈਣ ਅਤੇ ਦੇਣ ਦੀ ਜਿੰਮੇਵਾਰੀ ਕਿਸ ਦੀ ਹੋਵੇਗੀ ਭੇਜੇ ਗਏ ਸਾਮਾਨ ਦੀ ਰਾਸ਼ੀ ਦਾ ਭੁਗਤਾਨ ਕਿਸ ਨੂੰ ਅਤੇ ਕਿਵੇਂ ਕਰਨਾ ਹੈ ਇਹ ਸਾਰੀ ਜਾਣਕਾਰੀ ਸਾਂਝੀ ਕੀਤੀ ਜਾ ਰਹੀ ਹੈ।
ਸਾਮਾਨ ਪਹੁੰਚਾਉਣ ਵਾਲੇ ਤਸਕਰ ਅਤੇ ਅਤਿਵਾਦੀ ਕੋਈ ਵੀ ਜਾਣਕਾਰੀ ਆਪਣੇ ਸਾਥੀਆਂ ਤੱਕ ਪਹੁੰਚਾਉਣ ਵਿਚ ਆਸਾਨੀ ਨਾਲ ਕਾਮਯਾਬ ਹੋ ਰਹੇ ਹਨ। ਇਸ ਟੈਲਾਗ੍ਰਾਮ ਦੀ ਇਕ ਖਾਸ ਗੱਲ ਇਹ ਹੈ ਕਿ ਟੈਲੀਗ੍ਰਾਮ ਰਾਂਹੀ ਭੇਜਿਆ ਸੁਨੇਹਾ ਅਤਿਵਾਦੀਆਂ ਤੱਕ ਪਹੁੰਚਣ ਤੋਂ ਆਪਣੇ ਆਪ ਡਿਲੀਟ ਹੋ ਜਾਂਦਾ ਹੈ। ਭੇਜੇ ਗਏ ਮੈਸੇਜ ਦਾ ਕੋਈ ਬੈਕ-ਅੱਪ ਨਾ ਹੋਣ ਕਰਕੇ ਇਸ ਮੈਸੇਜ ਦੀ ਜਾਣਕਾਰੀ ਪ੍ਰਾਪਤ ਕਰਨਾ ਏਜੰਸੀਆਂ ਲਈ ਬਹੁਤ ਮੁਸ਼ਕਿਲ ਹੋ ਗਿਆ ਹੈ।
ਸੂਤਰਾਂ ਤੋਂ ਇਹ ਵੀ ਜਾਣਕਾਰੀ ਮਿਲੀ ਹੈ ਕਿ ਇਸ ਟੈਲੀਗ੍ਰਾਮ ਤੋਂ ਇਲਾਵਾ ਟੈਲੀਗ੍ਰਾਮ ਮੈਸੇਂਜਰ ਐਪ ਇਕ ਕਲਾਊਂਡ-ਬੇਸਡ ਇੰਸਟੈਂਟ ਮੈਸੇਜਿੰਗ ਸਰਵਿਸ ਹੈ ਜੋ ਚੈਟਿੰਗ ਕਰਨ ਤੇ ਸੁਪਰ ਫਾਸਟ ਹੋਣ ਦੇ ਨਾਲ ਨਾਲ ਆਸਾਨ ਅਤੇ ਸੁਰੱਖਿਅਤ ਵੀ ਹੈ। ਇਸ ਵਿਚ ਉਪਭੋਗੀ ਦੇ ਸੁਨੇਹਿਆਂ ਨੂੰ ਨਿੱਜੀ ਰੱਖਿਆ ਜਾਂਦਾ ਹੈ। ਸੁਰੱਖਿਆ ਏਜੰਸੀਆਂ ਦਾ ਕਹਿਣਾ ਹੈ ਕਿ ਅਜਿਹੇ ਲੋਕਾਂ ਦੀ ਕੋਈ ਕਮੀ ਨਹੀਂ ਹੈ ਜੋ ਥੋੜ੍ਹੇ ਜਿਹੇ ਪੈਸਿਆਂ ਦੇ ਲਾਲਚ ਵਿਚ ਆ ਕੇ ਆਪਣੇ ਨਾਂਅ ਤੇ ਲਿਆ ਮੋਬਾਇਲ ਸਿਮ ਆਸਾਨੀ ਨਾਲ ਖ਼ਤਰਨਾਕ ਲੋਕਾਂ ਵਿਚ ਵੇਚ ਦਿੰਦੇ ਹਨ।