ਜਨਮ ਦਿਨ ਦੀ ਪਾਰਟੀ ਤੋਂ ਵਾਪਸ ਘਰ ਜਾ ਰਹੇ ਦੋ ਨੌਜਵਾਨ ਸੜਕ ਹਾਦਸੇ ਦਾ ਸ਼ਿਕਾਰ ਹੋ ਗਏ। ਹਾਦਸੇ ਵਿਚ ਦੋਵਾਂ ਨੌਜਵਾਨਾਂ ਦੀ ਮੌਤ...

ਅੰਮ੍ਰਿਤਸਰ (ਸਸਸ) : ਜਨਮ ਦਿਨ ਦੀ ਪਾਰਟੀ ਤੋਂ ਵਾਪਸ ਘਰ ਜਾ ਰਹੇ ਦੋ ਨੌਜਵਾਨ ਸੜਕ ਹਾਦਸੇ ਦਾ ਸ਼ਿਕਾਰ ਹੋ ਗਏ। ਹਾਦਸੇ ਵਿਚ ਦੋਵਾਂ ਨੌਜਵਾਨਾਂ ਦੀ ਮੌਤ ਹੋ ਗਈ। ਘਟਨਾ ਤੋਂ ਬਾਅਦ ਪੂਰੇ ਪਰਵਾਰ ਵਿਚ ਦੁੱਖ ਦਾ ਮਾਹੌਲ ਬਣਿਆ ਹੋਇਆ ਹੈ। ਹਾਦਸਾ ਪੰਜਾਬ ਦੇ ਪਟਿਆਲਾ ਵਿਚ ਭਾਦਸੋ ਰੋਡ ‘ਤੇ ਹੋਇਆ। ਦੋਵੇਂ ਨੌਜਵਾਨ ਆਇਲੈਟਸ ਕਰਨ ਤੋਂ ਬਾਅਦ ਵਿਦੇਸ਼ ਜਾਣ ਦੀ ਤਿਆਰੀ ਵਿਚ ਸਨ। ਤ੍ਰਿਪੜੀ ਥਾਣਾ ਪੁਲਿਸ ਨੇ ਮਾਮਲੇ ਵਿਚ 174 ਦੀ ਕਾਰਵਾਈ ਕੀਤੀ ਹੈ।

ਜਾਂਚ ਅਧਿਕਾਰੀ ਏਐਸਆਈ ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਕਸ਼ਿਸ਼ ਬਾਂਸਲ (21) ਨਿਵਾਸੀ ਰਤਨ ਨਗਰ ਤ੍ਰਿਪੜੀ ਅਤੇ ਉਸ ਦਾ ਦੋਸਤ ਅਮਨਦੀਪ (21) ਨਿਵਾਸੀ ਜੋਗਿੰਦਰ ਨਗਰ ਬਡੂੰਗਰ ਦੋਵੇਂ ਰਾਤ ਲਗਭੱਗ ਸਾਢੇ 11 ਵਜੇ ਅਪਣੇ ਇਕ ਦੋਸਤ ਦਾ ਜਨਮ ਦਿਨ ਮਨਾ ਕੇ ਮੋਟਰਸਾਈਕਲ ਤੇ ਵਾਪਸ ਘਰ ਜਾ ਰਹੇ ਸਨ। ਰਸਤੇ ਵਿਚ ਭਾਦਸੋ ਰੋਡ ਉਤੇ ਅਚਾਨਕ ਮੋਟਰਸਾਈਕਲ ‘ਤੇ ਕਸ਼ਿਸ਼ ਬਾਂਸਲ ਦਾ ਸੰਤੁਲਨ ਵਿਗੜ ਗਿਆ ਅਤੇ ਮੋਟਰਸਾਈਕਲ ਡਿਵਾਇਡਰ ਨਾਲ ਟਕਰਾਇਆ।

ਦੋਵੇਂ ਦੋਸਤ ਮੋਟਰਸਾਈਕਲ ਤੋਂ ਭੁੜਕ ਕੇ ਜ਼ਮੀਨ ਉਤੇ ਜਾ ਡਿੱਗੇ ਅਤੇ ਸਿਰ ਵਿਚ ਗੰਭੀਰ ਸੱਟ ਲੱਗਣ ਨਾਲ ਕਸ਼ਿਸ਼ ਬਾਂਸਲ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ। ਗੰਭੀਰ ਹਾਲਤ ਵਿਚ ਅਮਨਦੀਪ ਨੂੰ ਤੁਰਤ ਪਟਿਆਲਾ ਦੇ ਇਕ ਪ੍ਰਾਈਵੇਟ ਹਸਪਤਾਲ ਵਿਚ ਪਹੁੰਚਾਇਆ ਗਿਆ। ਉਥੇ ਕੁੱਝ ਦੇਰ ਬਾਅਦ ਉਸ ਨੇ ਦਮ ਤੋੜ ਦਿਤਾ। ਪੁਲਿਸ ਦੇ ਮੁਤਾਬਕ ਕਸ਼ਿਸ਼ ਬਾਂਸਲ ਮੰਡੀ ਗੋਬਿੰਦਗੜ ਦੇ ਰਿਮਿਟ ਕਾਲਜ ਤੋਂ ਬੀਬੀਏ ਕਰ ਰਿਹਾ ਸੀ। ਅਮਨਦੀਪ ਪ੍ਰਾਈਵੇਟ ਤੌਰ ‘ਤੇ ਅਕਾਉਂਟਸ ਦਾ ਕੰਮ ਕਰਦਾ ਸੀ। ਦੋਵਾਂ ਨੇ ਆਇਲੈਟਸ ਕਰ ਰੱਖਿਆ ਸੀ।