ਕਿਹਾ, ਪੰਜਾਬ ਉਸ ਵਿੱਤੀ ਕਮਜ਼ੋਰੀ ਦੀ ਦਲ ਦਲ ਵਿਚੋਂ ਨਿਕਲ ਚੁੱਕੈ, ਜਿਸ ਵਿਚ ਪਿਛਲੀ ਸਰਕਾਰ ਛੱਡ ਕੇ ਗਈ ਸੀ
ਚੰਡੀਗੜ੍ਹ (ਹਰਦੀਪ ਸਿੰਘ ਭੋਗਲ): ਕੋਰੋਨਾ ਕਾਲ ਤੋਂ ਬਾਅਦ ਚਾਰੇ ਪਾਸੇ ਛਾਈ ਮੰਦੀ ਦਰਮਿਆਨ ਪੰਜਾਬ ਸਰਕਾਰ ਵੱਲੋਂ ਪਾਸ ਕੀਤੇ ਗਏ ਬਜਟ ਤੋਂ ਪੰਜਾਬ ਵਾਸੀਆਂ ਨੂੰ ਢੇਰ ਸਾਰੀਆਂ ਉਮੀਦਾਂ ਸਨ। ਇਹ ਬਜਟ ਲੋਕਾਂ ਦੀਆਂ ਉਮੀਦਾਂ 'ਤੇ ਕਿੰਨਾ ਕੁ ਪੂਰਾ ਉਤਰੇਗਾ, ਸਬੰਧੀ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਨਾਲ ਸਪੋਕਸਮੈਨ ਟੀਵੀ ਵੱਲੋਂ ਵਿਸ਼ੇਸ਼ ਗੱਲਬਾਤ ਕੀਤੀ ਗਈ। ਬਜਟ ਵਿਚ ਲੋਕਾਂ ਲਈ ਕੀ-ਕੁੱਝ ਹੈ, ਇਸ ਸਬੰਧ ਪੁਛੇ ਸਵਾਲ ਦੇ ਜਵਾਲ ਵਿਚ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਨੇ ਕਿਹਾ ਕਿ ਕੋਰੋਨਾ ਕਾਲ ਦਾ ਪੂਰੀ ਦੁਨੀਆ ਨੂੰ ਘਾਟਾ ਪਿਆ ਹੈ, ਜਿਸ ਤੋਂ ਪੰਜਾਬ ਵੀ ਅਛੂਤਾ ਨਹੀਂ ਹੈ। ਸਾਡੀ ਲਈ ਔਖ ਇਹ ਰਹੀ ਕਿ ਸਾਨੂੰ ਕਰਜ਼ੇ ਦੀ ਪੰਡ ਵਿਰਾਸਤ ਵਿਚ ਮਿਲੀ ਸੀ।
ਉਨ੍ਹਾਂ ਕਿਹਾ ਕਿ 31 ਹਜ਼ਾਰ ਕਰੋੜ ਰੁਪਏ ਸੀਸੀਐਲ ਲਿਮਟ ਦਾ ਕਰਜ਼ਾ ਸਰਕਾਰ ਕੇ ਖਾਤੇ ਵਿਚ ਪੈ ਗਿਆ। 8 ਹਜ਼ਾਰ ਕਰੋੜ ਦਾ ਦੇਣਦਾਰੀਆਂ ਜੋ ਅਕਾਲੀ ਦਲ ਨੇ ਖਰਚੇ ਕੀਤੇ ਸਨ, ਉਹ ਅਗਲੀ ਸਰਕਾਰ ਲਈ ਛੱਡ ਦਿੱਤੇ ਗਏ ਸਨ। ਸੋ ਜਿਹੜੀ ਸਰਕਾਰ ਲੋਕਾਂ ਦੀਆਂ ਵੱਡੀਆਂ ਉਮੀਦਾਂ ਨਾਲ ਜਿੱਤ ਕੇ ਆਈ ਹੋਵੇ, ਉਸ ਨੂੰ ਪਹਿਲੇ ਦਿਨ ਹੀ 38 ਜਾਂ 40 ਹਜ਼ਾਰ ਕਰੋੜ ਦਾ ਕਰਜ਼ਾ ਮਿਲ ਜਾਵੇ, ਉਹ ਇਸ ਨਾਲ ਕਿਸ ਤਰ੍ਹਾਂ ਨਿਪਟੇਗੀ, ਇਸ ਦਾ ਅੰਦਾਜ਼ਾ ਸਹਿਜੇ ਹੀ ਲਗਾਇਆ ਜਾ ਸਕਦਾ ਹੈ। ਕੋਵਿਡ ਕਾਰਨ ਇਹ ਸਾਲ ਸਾਡੇ ਲਈ ਬੇਹੱਦ ਮਾੜਾ ਰਿਹਾ ਹੈ। ਇਸ ਦੇ ਬਾਵਜੂਦ ਇਸ ਪੰਜਾਬ ਨੂੰ ਸੰਭਾਲਣ ਵਿਚ ਕਾਮਯਾਬ ਹੋਏ ਹਾਂ।
ਅੱਜ ਅਸੀਂ ਸਾਡਾ ਰੈਵੀਨਿਊ ਕੁਲੈਕਸ਼ਨ ਅਕਾਲੀ ਦਲ ਦੇ ਵੇਲੇ ਨਾਲੋਂ ਦੁੱਗਣਾ ਹੋ ਚੁੱਕਾ ਹੈ। ਅੱਜ ਪੰਜਾਬ ਸਾਰੀਆਂ ਮੁਸ਼ਕਲਾਂ ਨੂੰ ਪਾਰ ਕਰਦਾ ਹੋਇਆ ਉਸ ਦਲ ਦਲ ਵਿਚੋਂ ਬਾਹਰ ਨਿਕਲਣ ਵਿਚ ਕਾਮਯਾਬ ਹੋ ਚੁੱਕਾ ਹੈ ਜਿਸ ਵਿੱਚੋਂ ਨਿਕਲਣਾ ਕਿਸੇ ਵੇਲੇ ਨਾਮੁਮਕਿਨ ਜਾਪਦਾ ਸੀ। ਅੰਕੜਿਆਂ ਦੀ ਖੇਡ ਨੂੰ ਪਾਸੇ ਰੱਖਦਿਆਂ ਬਜਟ ਤੋਂ ਆਮ ਆਦਮੀ ਨੂੰ ਕੀ ਕੁੱਝ ਮਿਲੇਗਾ ਸਬੰਧੀ ਪੁਛੇ ਸਵਾਲ ਦੇ ਜਵਾਲ ਵਿਚ ਵਿੱਤ ਮੰਤਰੀ ਨੇ ਕਿਹਾ ਕਿ ਮੇਰਾ ਖੁਦ ਦਾ ਪਿਛੋਕੜ ਪਿੰਡ ਦਾ ਹੈ।
ਪੇਂਡੂ ਲੋਕਾਂ ਨੂੰ ਸਰਕਾਰ ਤੋਂ ਵੱਡੀਆਂ ਉਮੀਦਾਂ ਹੁੰਦੀਆਂ ਹਨ ਅਤੇ ਸਰਕਾਰ ਦਾ ਵੀ ਫਰਜ ਬਣਦਾ ਹੈ ਕਿ ਉਹ ਟੈਕਸਾਂ ਰਾਹੀਂ ਇਕੱਠੇ ਹੁੰਦੇ ਪੈਸੇ ਨੂੰ ਲੋਕਾਂ ਤਕ ਪਹੁੰਚਦਾ ਕਰੇ। ਅੱਜ ਅਸੀਂ ਉਸ ਹੈਸੀਅਤ ਵਿਚ ਆ ਗਏ ਹਾਂ ਕਿ ਅਸੀਂ ਆਪਣੀਆਂ ਲੋਕ ਭਲਾਈ ਸਕੀਮਾਂ ਨੂੰ ਸਫਲਤਾ ਨਾਲ ਚਲਾ ਸਕੀਏ। ਸਰਕਾਰ ਨੇ ਸਿਹਤ ਅਤੇ ਸਿੱਖਿਆ ਵਰਗੇ ਖੇਤਰਾਂ ਲਈ ਵੱਡਾ ਬਜਟ ਰੱਖਿਆ ਹੈ। ਇਸ ਤੋਂ ਇਲਾਵਾ ਕਿਸਾਨਾਂ ਅਤੇ ਨਹਿਰੀ ਵਿਭਾਗ ਲਈ ਵੀ ਰਕਮ ਰੱਖੀ ਗਈ ਹੈ। ਸਰਕਾਰ ਨਹਿਰੀ ਪ੍ਰਬੰਧ ਨੂੰ ਦਰੁਸਤ ਕਰਨ ਦੇ ਨਾਲ ਨਾਲ ਹਾਰਟੀਕਲਚਰ ਸਮੇਤ ਡੇਅਰੀ ਦੇ ਧੰਦੇ ਦੀ ਬਿਹਤਰੀ ਲਈ ਵੀ ਕੰਮ ਕਰ ਰਹੀ ਹੈ। ਇਸ ਲਈ ਬਜਟ ਵਿਚ ਬਕਾਇਦਾ ਪ੍ਰਬੰਧ ਕੀਤਾ ਗਿਆ ਹੈ।