ਆਟੇ ਦੀ ਵਧਦੀ ਕੀਮਤ ਨੂੰ ਰੋਕਣ ਲਈ ਸਰਕਾਰ ਦਾ ਵੱਡਾ ਫ਼ੈਸਲਾ, ਨਿਰਯਾਤ 'ਤੇ ਸਖ਼ਤੀ

ਨਵੀਂ ਦਿੱਲੀ, 8 ਜੁਲਾਈ : ਦੇਸ਼ 'ਚ  ਆਟੇ ਦੀ ਵਧਦੀ ਕੀਮਤ ਨੂੰ  ਰੋਕਣ ਲਈ ਸਰਕਾਰ ਨੇ ਵੱਡਾ ਫ਼ੈਸਲਾ ਕੀਤਾ ਹੈ | ਸਰਕਾਰ ਨੇ ਆਟਾ ਅਤੇ ਇਸ ਨਾਲ ਜੁੜੇ ਉਤਪਾਦਾਂ ਦੀ ਐਕਸਪੋਰਟ 'ਤੇ ਸਖ਼ਤੀ ਵਧਾ ਦਿਤੀ ਹੈ | ਇਸ ਤੋਂ ਪਹਿਲਾਂ ਸਰਕਾਰ ਨੇ ਦੇਸ਼ 'ਚ ਅਨਾਜ ਦੀਆਂ ਕੀਮਤਾਂ ਨੂੰ  ਵਧਣ ਤੋਂ ਰੋਕਣ ਲਈ 13 ਮਈ ਨੂੰ  ਕਣਕ ਐਕਸਪੋਰਟ 'ਤੇ ਰੋਕ ਲਗਾ ਦਿਤੀ ਸੀ | ਇਕ ਰਿਪੋਰਟ ਮੁਤਾਬਕ ਆਟੇ ਦੀ ਨਿਰਯਾਤ ਲਈ ਸਾਰੇ ਨਿਰਯਾਤਕਾਂ ਨੂੰ  ਹੁਣ ਅੰਤਰ ਮੰਤਰਾਲਾ ਕਮੇਟੀ ਆਨ ਵ੍ਹੀਟ ਐਕਸਪੋਰਟ ਤੋਂ ਪਹਿਲਾਂ ਇਜਾਜ਼ਤ ਲੈਣੀ ਹੋਵੇਗੀ | ਅਜਿਹੀਆਂ ਖ਼ਬਰਾਂ ਆ ਰਹੀਆਂ ਸਨ ਕਿ ਕਣਕ ਐਕਸਪੋਰਟ 'ਤੇ ਰੋਕ ਤੋਂ ਬਾਅਦ ਵਪਾਰੀ ਗ਼ਲਤ ਤਰੀਕੇ ਨਾਲ ਆਟੇ ਦੀ ਐਕਸਪੋਰਟ ਕਰ ਰਹੇ ਹਨ |
ਡਾਇਰੈਕਟੋਰੇਟ ਜਨਰਲ ਆਫ਼ ਫ਼ਾਰੇਨ ਟ੍ਰੇਡ (ਡੀ. ਜੀ. ਐਫ਼. ਟੀ.) ਦੇ ਜਾਰੀ ਨੋਟੀਫ਼ਿਕੇਸ਼ਨ ਮੁਤਾਬਕ ਨਵੀਂ ਵਿਵਸਥਾ 12 ਜੁਲਾਈ ਤੋਂ ਲਾਗੂ ਹੋਵੇਗੀ | 6 ਜੁਲਾਈ ਤੋਂ ਪਹਿਲਾਂ ਲੋਡ ਕੀਤੇ ਗਏ ਸ਼ਿਪਮੈਂਟ ਜਾਂ 12 ਜੁਲਾਈ ਤੋਂ ਪਹਿਲਾਂ ਕਸਟਮ ਕੋਲ ਦਾਇਰ ਕੀਤੀ ਖੇਪ ਨੂੰ  ਐਕਸਪੋਰਟ ਦੀ ਇਜਾਜ਼ਤ ਦਿਤੀ ਜਾਵੇਗੀ |
 ਯਾਨੀ ਇਨ੍ਹਾਂ ਦੀ ਐਕਸਪੋਰਟ ਤੋਂ ਪਹਿਲਾਂ ਸਰਕਾਰ ਤੋਂ ਇਜਾਜ਼ਤ ਲੈਣੀ ਹੋਵੇਗੀ | ਹਾਲਾਂਕਿ ਕਣਕ ਦੀ ਨਿਰਯਾਤ 'ਤੇ ਰੋਕ ਤੋਂ ਬਾਅਦ ਦੇਸ਼ 'ਚ ਆਟੇ ਦੀਆਂ ਕੀਮਤਾਂ 'ਚ ਕੁੱਝ ਕਮੀ ਆਈ ਹੈ |
ਹਾਲਾਂਕਿ ਕਣਕ ਵਾਂਗ ਆਟੇ ਦੇ ਨਿਰਯਾਤ 'ਤੇ ਪੂਰੀ ਤਰ੍ਹਾਂ ਰੋਕ ਨਹੀਂ ਲਗਾਈ ਗਈ ਹੈ | ਕੁੱਝ ਰਿਪੋਰਟਾਂ ਮੁਤਾਬਕ ਭਾਰਤ ਤੋਂ ਅਪ੍ਰੈਲ 'ਚ ਕਰੀਬ 96,000 ਟਨ ਆਟੇ ਦੀ ਐਕਸਪੋਰਟ ਹੋਈ ਜੋ ਪਿਛਲੇ ਸਾਲ ਦੇ ਮੁਕਾਬਲੇ 26,000 ਟਨ ਵੱਧ ਹੈ | ਵਪਾਰੀ ਸਰਕਾਰ ਦੀਆਂ ਪਾਬੰਦੀਆਂ 'ਚ ਸੰਨ ਲਗਾਉਣ ਦੇ ਨਵੇਂ ਤਰੀਕੇ ਲੱਭ ਰਹੇ ਸਨ ਅਤੇ ਕਣਕ ਦੀ ਥਾਂ ਆਟੇ ਦੀ ਐਕਸਪੋਰਟ ਦੀ ਖੇਡ ਚੱਲ ਰਹੀ ਸੀ | ਇਸ ਨੂੰ  ਰੋਕਣ ਲਈ ਸਰਕਾਰ ਨੇ ਇਹ ਕਦਮ ਉਠਾਇਆ ਹੈ | (ਏਜੰਸੀ)