ਸਿੱਖ ਬੱਚੇ ਦੇ ਜਜ਼ਬੇ ਦੀ ਵੀਡੀਓ ਦੇਖ ਖਿੜ ਉਠੇਗਾ ਮਨ
ਚੰਡੀਗੜ੍ਹ: ਸਿੱਖ ਭਾਵੇਂ ਕਿੰਨਾ ਹੀ ਗ਼ਰੀਬ ਕਿਉਂ ਨਾ ਹੋਵੇ ਪਰ ਕਦੇ ਭੀਖ ਨਹੀਂ ਮੰਗਦਾ ਬਲਕਿ ਅਪਣੀ ਮਿਹਨਤ ਮਜ਼ਦੂਰੀ ਕਰਕੇ ਰੋਜ਼ੀ ਰੋਟੀ ਕਮਾਉਣ ਵਿਚ ਵਿਸਵਾਸ਼ ਰੱਖਦੈ। ਸੋਸ਼ਲ ਮੀਡੀਆ 'ਤੇ ਇਕ ਸਿੱਖ ਬੱਚੇ ਦੀ ਵਾਇਰਲ ਹੋ ਰਹੀ ਵੀਡੀਓ ਵਿਚ ਵੀ ਇਸ ਦੀ ਮਿਸਾਲ ਦੇਖਣ ਨੂੰ ਮਿਲੀ।
ਦਰਅਸਲ ਇਹ ਸਿੱਖ ਬੱਚਾ ਐਨਕਾਂ ਵੇਚ ਰਿਹਾ ਸੀ ਤਾਂ ਇਕ ਗਾਹਕ ਨੇ ਬਿਨਾਂ ਐਨਕਾਂ ਖ਼ਰੀਦੇ ਇਸ ਸਿੱਖ ਬੱਚੇ ਨੂੰ ਪੈਸੇ ਦੇਣ ਦੀ ਪੇਸ਼ਕਸ਼ ਕੀਤੀ ਪਰ ਬੱਚੇ ਨੇ ਇਹ ਕਹਿੰਦਿਆਂ ਪੈਸੇ ਲੈਣ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ ਕਿ ਉਹ ਇਸ ਤਰ੍ਹਾਂ ਪੈਸੇ ਨਹੀਂ ਲੈਂਦਾ, ਜੇ ਤੁਸੀਂ ਪੈਸੇ ਦੇਣੇ ਨੇ ਤਾਂ ਤੁਹਾਨੂੰ ਐਨਕ ਖ਼ਰੀਦਣੀ ਹੋਵੇਗੀ।
ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਹ ਬੱਚਾ ਕੰਮ ਕਰਨ ਦੇ ਨਾਲ-ਨਾਲ ਅਪਣੀ ਪੜ੍ਹਾਈ ਵੀ ਕਰਦਾ ਹੈ ਅਤੇ ਛੋਟੇ ਹੁੰਦਿਆਂ ਹੀ ਇਸ ਦੀ ਮਾਂ ਇਸ ਦੁਨੀਆ ਤੋਂ ਚਲੀ ਗਈ। ਇਹ ਬੱਚਾ ਗੁਰੂ ਸਾਹਿਬ ਦਾ ਓਟ ਆਸਰਾ ਲੈ ਕੇ ਅਪਣੇ ਪਿਤਾ ਦੀ ਮਦਦ ਕਰਨ ਵਿਚ ਜੁਟ ਗਿਆ।
ਪੂਰਾ ਦਿਨ ਇੱਧਰ ਉਧਰ ਘੁੰਮ ਕੇ ਇਹ ਬੱਚਾ ਮਸਾਂ 100 ਰੁਪਏ ਕਮਾਉਂਦਾ ਹੈ ਅਤੇ ਅਪਣੇ ਘਰ ਦਾ ਗੁਜ਼ਾਰਾ ਕਰਨ ਵਿਚ ਅਪਣੇ ਪਿਓ ਦੀ ਮਦਦ ਕਰਦਾ ਹੈ। ਇਸ ਬੱਚੇ ਨੂੰ ਅਪਣੇ ਕੰਮ ਦੀ ਇੰਨੀ ਫ਼ਿਕਰ ਹੈ ਕਿ ਉਹ ਗਾਹਕ ਨੂੰ ਇਹ ਕਹਿੰਦਾ ਹੋਇਆ ਸੁਣਾਈ ਦਿੰਦਾ ਕਿ ਜਲਦੀ ਖ਼ਰੀਦੋ, ਉਸ ਨੇ ਹੋਰ ਗਾਹਕ ਵੀ ਦੇਖਣੇ ਹਨ।
ਬੱਚੇ ਦੇ ਇਸ ਜਜ਼ਬੇ ਨੂੰ ਦੇਖ ਕੇ ਐਨਕਾਂ ਖ਼ਰੀਦਣ ਵਾਲੇ ਗਾਹਕ ਵੀ ਉਸ ਦੀ ਤਾਰੀਫ਼ ਕਰਦੇ ਹੋਏ ਸੁਣਾਈ ਦੇ ਰਹੇ ਹਨ। ਵਾਕਈ ਇਸ ਛੋਟੇ ਸਿੱਖ ਬੱਚੇ ਦੀ ਮਿਹਨਤ ਅਤੇ ਜਜ਼ਬੇ ਨੂੰ ਸਲਾਮ ਕਰਨਾ ਬਣਦਾ ਏ, ਜਿਸ ਨੇ ਭੀਖ ਮੰਗਣ ਦੇ ਕੰਮ ਨੂੰ ਨਾਕਾਰ ਕੇ ਮਿਹਨਤ ਕਰਨ ਨੂੰ ਤਰਜੀਹ ਦਿੱਤੀ ਅਤੇ ਸਿੱਖ ਕੌਮ ਦਾ ਸਿਰ ਉਚਾ ਕੀਤਾ। ਕੁੱਝ ਸਿੱਖਾਂ ਦਾ ਕਹਿਣੈ ਕਿ ਸਿੱਖਾਂ ਦੀ ਸਿਰਮੌਰ ਸੰਸਥਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੂੰ ਅਜਿਹੇ ਆਰਥਿਕ ਪੱਖੋਂ ਕਮਜ਼ੋਰ ਸਿੱਖਾਂ ਦੇ ਬੱਚਿਆਂ ਦੀ ਮੁਫ਼ਤ ਪੜ੍ਹਾਈ ਆਦਿ ਦੇ ਯਤਨ ਕਰਨੇ ਚਾਹੀਦੇ ਨੇ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।