ਕੋਰੋਨਾ ਦੀ ਆੜ ਵਿਚ ਕਿਸਾਨੀ ਸੰਘਰਸ਼ ਨੂੰ ਤਾਰਪੀਡੋ ਕਰਨ ਦਾ ਯਤਨ
ਸੰਗਰੂਰ (ਬਲਵਿੰਦਰ ਸਿੰਘ ਭੁੱਲਰ): ਕੋਰੋਨਾ ਮਹਾਂਮਾਰੀ ਭਾਵੇਂ ਕਿੰਨੀ ਵੀ ਦੁਰਪ੍ਰਭਾਵੀ ਸਾਬਤ ਹੋ ਚੁੁੱਕੀ ਹੋਵੇ ਪਰ ਇਸ ਦੇ ਪਾਜ਼ੇਟਿਵ ਆਉਣ ਵਾਲੇ ਵਿਅਕਤੀਆਂ ਵਿਚ ਮੌਤ ਦਰ ਸਿਰਫ਼ 1.5 ਫ਼ੀ ਸਦੀ ਹੈ। ਹਾਂ, ਇਹ ਵਿਸ਼ਾ ਵੱਖਰਾ ਹੈ ਕਿ ਕੋਰੋਨਾ ਮਹਾਂਮਾਰੀ ਦੇ ਨਾਮ ਹੇਠਾਂ ਆਮ ਲੋਕਾਂ ਨੂੰ ਡਰਾ, ਧਮਕਾ ਜਾਂ ਉਨ੍ਹਾਂ ਦੇ ਘਰਾਂ ਅੰਦਰ ਬੰਦ ਰੱਖ ਕੇ ਦੇਸ਼ ਵਿਚ ਰਾਜ ਕਰਦੀਆਂ ਕਈ ਰਾਜ ਸਰਕਾਰਾਂ ਅਤੇ ਕੇਂਦਰ ਸਰਕਾਰਾਂ ਨੇ ਅਪਣੇ ਨਿਜੀ ਅਤੇ ਰਾਜਨੀਤਕ ਫ਼ਾਇਦੇ ਲੈਣ ਵਿਚ ਕੋਈ ਕਸਰ ਬਾਕੀ ਨਹੀਂ ਛੱਡੀ।
ਅਮਰੀਕਾ ਦੁਨੀਆਂ ਦਾ ਦੂਸਰਾ ਸੱਭ ਤੋਂ ਵੱਡਾ ਲੋਕ ਰਾਜ ਹੈ ਪਰ ਉਸ ਦੀ ਸਰਕਾਰ ਵਲੋਂ ਅਪਣੇ ਦੇਸ਼ ਵਿਚ ਲਾਕਡਾਊਨ ਲਗਾਉਣ ਤੋਂ ਪਹਿਲਾਂ ਕਈ ਵਾਰ ਸੋਚਿਆ ਗਿਆ। ਉਸ ਸਰਕਾਰ ਨੂੰ ਪੂਰੀ ਤਰ੍ਹਾਂ ਪਤਾ ਸੀ ਕਿ ਦੇਸ਼ ਅੰਦਰ ਲਾਕਡਾਊਨ ਲਗਾਉਣ ਤੋਂ ਬਾਅਦ ਹੋਣ ਵਾਲਾ ਆਰਥਕ ਨੁਕਸਾਨ ਪੂਰਾ ਕਰਨਾ ਮੁਸ਼ਕਿਲ ਹੋ ਜਾਵੇਗਾ ਇਸ ਲਈ ਉਨ੍ਹਾਂ ਲਾਕਡਾਊਨ ਤੋਂ ਪ੍ਰਹੇਜ਼ ਹੀ ਰਖਿਆ।
ਭਾਰਤ ਵਰਗੇ ਪਹਿਲਾਂ ਹੀ ਗ਼ਰੀਬੀ ਦੇ ਮਾਰੇ ਦੇਸ਼ ਨੇ ਅਜੇ ਨੋਟਬੰਦੀ ਤੋਂ ਉਭਰਨਾ ਸੀ ਪਰ ਉਸ ਦੇ ਨਾਲੋਂ ਨਾਲ ਕੋਰੋਨਾ ਕਾਰਨ ਲਗਾਏ ਲਾਕਡਾਊੁਨ ਨੇ ਆਮ ਜਨਤਾ ਨੂੰ ਦੋ ਵਕਤ ਦੀ ਰੋਟੀ ਤੋਂ ਵੀ ਵਿਰਵੇ ਕਰ ਦਿਤਾ। ਸਮਾਜਕ ਅਤੇ ਆਰਥਕ ਥੁੜਾਂ ਦਾ ਮਾਰਿਆ ਦੇਸ਼ ਭਾਰਤ 2020 ਦੇ ਲਾਕਡਾਊਨ ਨਾਲ ਵਿਕਾਸ ਦੀ ਗਤੀ ਤਕਰੀਬਨ 50 ਸਾਲ ਪਿਛੇ ਪੈ ਗਈ। ਸਰਕਾਰਾਂ ਕੋਲ ਬੀਤਿਆ ਇਕ ਸਾਲ ਕੋਰੋਨਾ ਵਿਰੁਧ ਤਿਆਰੀ ਕਰਨ ਲਈ ਕਾਫ਼ੀ ਸੀ ਪਰ ਇਸ ਦੌਰਾਨ ਕੇਂਦਰ ਸਰਕਾਰ ਦੇ ਸਾਰੇ ਪ੍ਰਮੁੱਖ ਅਦਾਰੇ ਹੱਥ ਉਤੇ ਹੱਥ ਧਰ ਕੇ ਬੈਠੇ ਰਹੇ।
ਹੁਣ ਫਿਰ ਲਾਕਡਾਊਨ ਲਗਾਉਣਾ ਪੈ ਰਿਹਾ ਹੈ। ਅਗਰ ਲਾਕਡਾਊੂਨ ਹੀ ਇਸ ਮਹਾਂਮਾਰੀ ਦਾ ਸਹੀ ਇਲਾਜ ਹੈ ਤਾਂ ਭਾਰਤ ਵਰਗੇ ਗ਼ਰੀਬ ਦੇਸ਼ ਦੀਆਂ ਸਰਕਾਰਾਂ ਵਲੋਂ ਕਰੋੜਾਂ ਅਰਬਾਂ ਰੁਪਏ ਦਾ ਖਰਚਾ ਕਰ ਕੇ ਵੈਕਸੀਨ ਦੀ ਖੋਜ ਕਿਉਂ ਕੀਤੀ ਗਈ। ਇਹ ਤੱਥ ਵੀ ਝੁਠਲਾਇਆ ਨਹੀਂ ਜਾ ਸਕਦਾ ਕਿ ਹੁਣ ਤਕ ਦੇਸ਼ ਅੰਦਰ 10 ਫ਼ੀ ਸਦੀ ਲੋਕਾਂ ਨੂੰ ਵੀ ਵੈਕਸੀਨ ਨਹੀਂ ਲਗਾਈ ਜਾ ਸਕੀ।
ਕੋਰੋਨਾ ਮਹਾਂਮਾਰੀ ਸਬੰਧੀ ਫ਼ੈਸਲੇ ਲੈਣ ਵੇਲੇ ਲੋਕਾਂ ਦੀ ਕੋਈ ਰਾਇ ਨਹੀਂ ਲਈ ਗਈ, ਉਨ੍ਹਾਂ ਉਤੇ ਫ਼ੈਸਲੇ ਸਿਰਫ਼ ਠੋਸੇ ਗਏ। ਉਨ੍ਹਾਂ ਦੀ ਇਸ ਮਹਾਂਮਾਰੀ ਦੌਰਾਨ ਸ਼ਮੂਲੀਅਤ ਨਾਂਹ ਦੇ ਬਰਾਬਰ ਰਹੀ। ਇਹੀ ਕਾਰਨ ਹੈ ਕਿ ਆਮ ਪਬਲਿਕ ਦਾ ਸਮੇਂ ਦੀਆ ਸਰਕਾਰਾਂ ਅਤੇ ਯਕੀਨ ਬਹੁਤ ਸਤਹੀ ਅਤੇ ਪੇਤਲਾ ਹੁੰਦਾ ਜਾ ਰਿਹਾ ਹੈ। ਅਸੀ ਕੁਦਰਤ ਦੇ ਵਿਧੀ ਵਿਧਾਨ ਤੋਂ ਭਲੀ ਭਾਂਤ ਵਾਕਿਫ਼ ਹੋ ਚੁੱਕੇ ਹਾਂ। ਜਿੰਨਾ ਅਸੀ ਕੁਦਰਤ ਨਾਲ ਛੇੜ-ਛਾੜ ਕਰਾਂਗੇ ਬਦਲੇ ਵਿਚ ਕੁਦਰਤ ਵੀ ਉਸ ਵਧੀਕੀ ਦਾ ਜਵਾਬ ਦਿੰਦੀ ਰਹੇਗੀ ਪਰ ਮਨੁੱਖੀ ਇਤਿਹਾਸ ਦੌਰਾਨ ਕਦੇ ਵੀ ਅਜਿਹੀ ਰਾਤ ਨਹੀਂ ਆਈ ਜਿਸ ਤੋਂ ਬਾਅਦ ਦਿਨ ਨਾ ਚੜ੍ਹਿਆ ਹੋਵੇ।
ਬੀਮਾਰੀਆਂ ਮਹਾਂਮਾਰੀਆ ਕੁਦਰਤ ਦੀ ਦੇਣ ਹਨ, ਇਹ ਲਗਾਤਾਰ ਆਉਂਦੀਆ ਜਾਂਦੀਆ ਰਹਿੰਦੀਆ ਹਨ ਪਰ ਇਸ ਤੋਂ ਬਚਾਅ ਡਰਾਉਣ ਨਾਲ ਨਹੀਂ ਬਲਕਿ ਸਮਝਾਉਣ ਨਾਲ ਸੰਭਵ ਹੈ। ਆਬੋ ਹਵਾ ਅਤੇ ਵਾਤਾਵਰਣ ਵਿਚ ਦਰਜਨਾਂ ਤੋਂ ਵਧੇਰੇ ਚੰਗੀਆ ਮਾੜੀਆਂ ਗੈਸਾਂ ਹਨ ਪਰ ਕੁਦਰਤ ਨੇ ਮਨੁੱਖ ਲਈ ਸਿਰਫ਼ ਆਕਸੀਜਨ ਦੀ ਵਰਤੋਂ ਦੀ ਇਜਾਜ਼ਤ ਦਿਤੀ ਹੈ। ਇਸੇ ਤਰ੍ਹਾਂ ਸਾਡੇ ਨੇੜਲੇ ਵਾਯੂਮੰਡਲ ਵਿਚ ਸੈਂਕੜੇ ਤਰ੍ਹਾਂ ਦੇ ਮਾਰੂ ਵਾਇਰਸ ਜਾਂ ਬੈਕਟੀਰੀਆ ਹਰ ਸਮੇਂ ਮੌਜੂਦ ਰਹਿੰਦੇ ਹਨ ਪਰ ਸਾਨੂੰ ਇਨ੍ਹਾਂ ਤੋਂ ਘਬਰਾਉਣ ਦੀ ਲੋੜ ਨਹੀਂ ਬਲਕਿ ਜਾਗਰੂਕ ਹੋ ਕੇ ਇਨ੍ਹਾਂ ਦਾ ਪੁਰਜ਼ੋਰ ਟਾਕਰਾ ਕਰਨਾ ਹੀ ਮਨੁੱਖੀ ਫ਼ਰਜ਼ ਹੈ।
ਪਿਛਲੀਆਂ ਦੋ ਤਿੰਨ ਸਦੀਆਂ ਵਿਚ ਭਾਰਤ ਵਰਗੇ ਦੇਸ਼ ਅੰਦਰ ਕਈ ਘਾਤਕ ਬੀਮਾਰੀਆਂ ਫੈਲਦੀਆ ਰਹੀਆਂ ਹਨ ਜਿਨ੍ਹਾਂ ਦੁਆਰਾ ਲੱਖਾਂ ਦਾ ਜਾਨੀ ਨੁਕਸਾਨ ਹੋਇਆ ਪਰ ਕੁੱਝ ਕੁਦਰਤ ਅਤੇ ਕੁੱਝ ਮਨੁੱਖੀ ਹੰਭਲੇ ਦੁਆਰਾ ਇਨ੍ਹਾਂ ਉੱਪਰ ਕਾਬੂੁ ਪਾਇਆ ਜਾਂਦਾ ਰਿਹਾ ਹੈ। ਅੱਜ ਵੀ ਸਾਡੇ ਦੇਸ਼ ਅੰਦਰ ਕੋਰੋਨਾ ਨਾਲੋਂ ਮਲੇਰੀਆ ਨਾਲ ਹਰ ਸਾਲ 27 ਲੱਖ ਮੌਤਾਂ ਹੋ ਰਹੀਆ ਹਨ ਅਤੇ ਸ਼ਰਾਬ ਨਾਲ ਹਰ 96 ਮਿੰਟ ਬਾਅਦ ਮੌਤ ਹੋ ਰਹੀ ਹੈ ਪਰ ਲੋਕ ਮਲੇਰੀਆ ਤੋਂ ਬੇਡਰ ਹਨ ਜਦ ਕਿ ਕੋਰੋਨਾ ਨੂੰ ਹਊਆ ਬਣਾਇਆ ਜਾ ਰਿਹਾ ਹੈ।
ਦੇਸ਼ ਦੀਆ ਸੜਕਾਂ ਉਤੇ ਹਰ ਸਾਲ ਕੋਰੋਨਾ ਕਾਰਨ ਹੋਈਆਂ ਮੌਤਾ ਨਾਲੋਂ ਵਧੇਰੇ ਮੌਤਾਂ ਐਕਸੀਡੈਂਟਾਂ ਦੁਆਰਾ ਹੋ ਰਹੀਆਂ ਹਨ ਪਰ ਉਸ ਦੇ ਅੰਕੜੇ ਕੋਰੋਨਾ ਵਾਂਗ ਹਰ ਰੋਜ਼ ਜਨਤਕ ਨਹੀਂ ਕੀਤੇ ਜਾ ਰਹੇ ਜਿਸ ਦੇ ਚਲਦਿਆਂ ਲੋਕ ਐਕਸ਼ੀਡੈਂਟਾਂ ਤੋਂ ਬੇਖੌਫ਼ ਹਨ ਜਦ ਕਿ ਕੋਰੋਨਾ ਉਨ੍ਹਾਂ ਦੇ ਮਨਾਂ ਉਤੇ ਬੁਰੀ ਤਰ੍ਹਾਂ ਹਾਵੀ ਕੀਤੀ ਜਾ ਚੁੱਕੀ ਹੈ। ਕੋਰੋਨਾ ਦੀ ਦਹਿਸ਼ਤ ਪੈਦਾ ਕਰ ਕੇ ਸਰਕਾਰਾਂ ਵਲੋਂ ਦੇਸ਼ ਦੀ ਆਰਥਕਤਾ ਨਾਲ ਖੇਡਣਾ ਸਰਾਸਰ ਧੱਕਾ ਅਤੇ ਬੇਇਨਸਾਫ਼ੀ ਹੈ ਕਿਉਂਕਿ ਸਮੇਂ ਦੀਆਂ ਸਰਕਾਰਾਂ ਵਲੋਂ ਅਪਣੇ ਸਵਾਰਥ ਸਿੱਧ ਕਰਨ ਲਈ ਆਮ ਲੋਕ ਇਸ ਡਰ ਦੁਆਰਾ ਅਪਣੇ ਬੁਨਿਆਦੀ ਹੱਕਾਂ ਤੋਂ ਜਾਣ ਬੁੱਝ ਕੇ ਮਹਿਰੂਮ ਕੀਤੇ ਜਾ ਰਹੇ ਹਨ। ਪੰਜਾਬ ਦੇ ਆਮ ਲੋਕਾਂ ਵਿਚ ਇਸ ਗੱਲ ਨੂੰ ਲੈ ਕੇ ਵੀ ਇਹ ਅਫ਼ਵਾਹ ਹੈ ਕਿ ਮੋਦੀ ਸਰਕਾਰ ਵਲੋਂ ਕੋਰੋਨਾ ਦਾ ਪਾਇਆ ਜਾ ਰਿਹੈ ਰੌਲਾ ਦਰਅਸਲ ਦਿੱਲੀ ਵਿਖੇ ਪਿਛਲੇ ਪੰਜ ਮਹੀਨਿਆਂ ਤੋਂ ਕਿਸਾਨੀ ਧਰਨੇ ਨੂੰ ਚੁਕਵਾਉਣ ਦੀ ਸਾਜ਼ਿਸ਼ ਹੈ।