ਕੈਨੇਡਾ 'ਚ ਪੰਜਾਬੀ ਸੱਭ ਤੋਂ ਵੱਧ ਬੋਲੀ ਜਾਣ ਵਾਲੀ ਚੌਥੀ ਭਾਸ਼ਾ ਬਣੀ
ਟੋਰਾਂਟੋ, 28 ਅਕਤੂਬਰ : ਪੰਜਾਬੀਆਂ ਦੀ ਬਹੁਗਿਣਤੀ ਵਾਲੇ ਦੇਸ਼ ਕੈਨੇਡਾ ਵਿਚ ਪੰਜਾਬ ਦੇ ਲੋਕਾਂ ਦਾ ਦਬਦਬਾ ਅੱਜ ਵੀ ਕਾਇਮ ਹੈ | ਇਥੇ ਬੋਲੀਆਂ ਜਾਣ ਵਾਲੀਆਂ ਕੁੱਲ 450 ਭਾਸ਼ਾਵਾਂ ਵਿਚੋਂ ਪੰਜਾਬੀ ਸਿਖਰਲੇ ਚਾਰ ਵਿਚ ਸ਼ਾਮਲ ਹੋ ਗਈ ਹੈ | ਕੈਨੇਡਾ ਦੀ ਸਰਕਾਰ ਨੇ ਇਹ ਅੰਕੜੇ 2021 ਦੀ ਜਨਗਣਨਾ ਦੇ ਆਧਾਰ 'ਤੇ ਕੀਤੇ ਗਏ ਸਰਵੇਖਣ ਦੇ ਆਧਾਰ 'ਤੇ ਜਾਰੀ ਕੀਤੇ ਹਨ |
ਕੈਨੇਡੀਅਨ ਸਰਕਾਰ ਨੇ ਹਾਲ ਹੀ ਵਿਚ ਪ੍ਰਵਾਸੀ ਨਾਗਰਿਕਾਂ ਅਤੇ ਨਸਲੀ-ਸਭਿਆਚਾਰਕ ਵਿਭਿੰਨਤਾ 'ਤੇ ਇਕ ਸਰਵੇਖਣ ਕੀਤਾ | ਇਸ ਵਿਚ 2021 ਦੀ ਜਨਗਣਨਾ ਵਿਚ 450 ਤੋਂ ਵੱਧ ਭਾਸ਼ਾਵਾਂ ਦੀ ਜਾਣਕਾਰੀ ਦਿਤੀ ਗਈ ਹੈ | ਸਰਵੇਖਣ ਦੇ ਨਤੀਜਿਆਂ ਅਨੁਸਾਰ ਕੈਨੇਡਾ ਵਿਚ 69.4 ਫ਼ੀ ਸਦੀ ਪ੍ਰਵਾਸੀ ਅੰਗਰੇਜ਼ੀ ਜਾਂ ਫ਼ਰੈਂਚ ਨਹੀਂ ਬੋਲਦੇ | ਕੈਨੇਡਾ ਦੀ ਸਰਕਾਰੀ ਭਾਸ਼ਾ ਦੀ ਵਰਤੋਂ ਨਾ ਕਰਨ ਵਾਲੇ ਜ਼ਿਆਦਾਤਰ ਪ੍ਰਵਾਸੀਆਂ ਵਿਚ ਅਰਬੀ 10.3 ਫ਼ੀ ਸਦੀ, ਤਾਗਾਲੋਗ 8.4, ਮੈਂਡਰਿਨ 7.9 ਫ਼ੀ ਸਦੀ ਅਤੇ ਪੰਜਾਬੀ 6.5 ਫ਼ੀ ਸਦੀ ਸ਼ਾਮਲ ਹਨ | ਹਾਲਾਂਕਿ ਇਸ ਸਰਵੇਖਣ ਵਿਚ ਹਰ ਚਾਰ ਨਵੇਂ ਪ੍ਰਵਾਸੀਆਂ ਵਿਚੋਂ ਇਕ ਨੇ ਅੰਗਰੇਜ਼ੀ ਨੂੰ ਅਪਣੀ ਪਹਿਲੀ ਭਾਸ਼ਾ ਵਜੋਂ ਬੋਲਣ ਦੀ ਗੱਲ ਕੀਤੀ | ਇਹ ਪ੍ਰਵਾਸੀ ਜ਼ਿਆਦਾਤਰ ਭਾਰਤ, ਫ਼ਿਲੀਪੀਨਜ਼ ਜਾਂ ਅਮਰੀਕਾ ਤੋਂ ਹਨ |
ਪ੍ਰਵਾਸੀ ਜੋ ਅਪਣੀ ਮੂਲ ਭਾਸ਼ਾ ਵਜੋਂ ਫ਼੍ਰੈਂਚ ਬੋਲਦੇ ਹਨ, ਹਾਲ ਹੀ ਦੇ ਪ੍ਰਵਾਸੀਆਂ ਦਾ 6.5 ਫ਼ੀ ਸਦੀ ਬਣਦੇ ਹਨ | 30 ਫ਼ੀ ਸਦੀ ਤੋਂ ਵੱਧ ਇਕੱਲੇ ਫ਼ਰਾਂਸ ਦੇ ਹਨ | ਇਸ ਤੋਂ ਬਾਅਦ ਕੈਮਰੂਨ 11.5 ਫ਼ੀ ਸਦੀ, ਸੀਟੀ ਡੀ ਆਈਵਰ 8.4, ਅਲਜੀਰੀਆ 5.8 ਅਤੇ ਕਾਂਗੋ ਦਾ ਲੋਕਤੰਤਰੀ ਗਣਰਾਜ 5.7 ਫ਼ੀ ਸਦੀ ਹੈ | ਸਰਵੇਖਣ ਅਨੁਸਾਰ ਜ਼ਿਆਦਾਤਰ ਪ੍ਰਵਾਸੀ ਅੰਗਰੇਜ਼ੀ ਜਾਂ ਫ਼ਰੈਂਚ ਬੋਲ ਸਕਦੇ ਹਨ, ਜਦਕਿ ਜ਼ਿਆਦਾਤਰ ਨਵੇਂ ਪ੍ਰਵਾਸੀ ਅਪਣੀ ਪਹਿਲੀ ਭਾਸ਼ਾ ਵਜੋਂ ਅੰਗਰੇਜ਼ੀ ਜਾਂ ਫ਼ਰੈਂਚ ਨਹੀਂ ਬੋਲਦੇ | ਹਾਲ ਹੀ ਵਿਚ ਕੈਨੇਡਾ ਵਿਚ ਰਹਿਣ ਵਾਲੇ 1.3 ਮਿਲੀਅਨ ਤੋਂ ਵੱਧ ਪ੍ਰਵਾਸੀਆਂ ਵਿਚੋਂ, 92.7 ਫ਼ੀ ਸਦੀ ਨੇ ਅੰਗਰੇਜ਼ੀ ਜਾਂ ਫ਼ਰੈਂਚ ਵਿਚ ਗੱਲਬਾਤ ਕਰਨ ਦੇ ਯੋਗ ਹੋਣ ਦੀ ਰਿਪੋਰਟ ਕੀਤੀ | ਰਿਪੋਰਟ ਵਿਚ ਪ੍ਰਗਟਾਵਾ ਹੋਇਆ ਕਿ ਕੈਨੇਡਾ ਵਿਚ ਪੰਜ ਪ੍ਰਵਾਸੀਆਂ ਵਿਚੋਂ ਇਕ ਭਾਰਤ ਦਾ ਹੈ, ਜਿਨ੍ਹਾਂ ਵਿਚ ਪੰਜਾਬੀਆਂ ਦੀ ਬਹੁਗਿਣਤੀ ਹੈ | (ਏਜੰਸੀ)
