ਇਟਲੀ ਤੋਂ ਇਕ ਹਾਦਸੇ ਵਿਚ ਪੰਜਾਬੀ ਨੌਜਵਾਨ ਦੀ ਮੌਤ ਦੀ ਖ਼ਬਰ ਸਾਹਮਣੇ ਆਈ ਹੈ
ਰੋਮ, ਇਟਲੀ ਤੋਂ ਇਕ ਹਾਦਸੇ ਵਿਚ ਪੰਜਾਬੀ ਨੌਜਵਾਨ ਦੀ ਮੌਤ ਦੀ ਖ਼ਬਰ ਸਾਹਮਣੇ ਆਈ ਹੈ। ਵਿਦੇਸ਼ ਵਿਚ ਗਏ ਨੌਜਵਾਨਾਂ ਦੀਆਂ ਹਾਦਸਿਆਂ ਵਿਚ ਮੌਤਾਂ ਇਕ ਚਿੰਤਾ ਦਾ ਵਿਸ਼ਾ ਬਣ ਗਈਆਂ ਹਨ। ਬੀਤੇ ਦਿਨ ਇੱਕ ਪੰਜਾਬੀ ਨੌਜਵਾਨ ਦੀ ਦਰਦਨਾਕ ਮੌਤ ਨੇ ਸਾਰਿਆਂ ਦੇ ਦਿਲਾਂ ਨੂੰ ਹਿਲਾ ਦਿੱਤਾ ਹੈ। ਮਿਲੀ ਜਾਣਕਾਰੀ ਮੁਤਾਬਕ ਦਵਿੰਦਰ ਸਿੰਘ (35) ਪੁੱਤਰ ਨਿਰੰਜਣ ਸਿੰਘ ਵਾਸੀ ਪੂਨੀਆਂ (ਸ਼ਹੀਦ ਭਗਤ ਸਿੰਘ ਨਗਰ) ਆਪਣੇ ਸਾਥੀ ਰਵੀ ਪਾਲ ਨਾਲ ਬੀਤੇ ਦਿਨ ਸਵੇਰੇ ਸਾਢੇ ਛੇ ਵਜੇ ਦੇ ਕਰੀਬ ਸਾਈਕਲ 'ਤੇ ਕੰਮ ਲਈ ਨਿਕਲ ਗਿਆ ਸੀ ਕਿ ਇਕ ਤੇਜ਼ ਰਫ਼ਤਾਰ ਕਾਰ ਨੇ ਦਵਿੰਦਰ ਸਿੰਘ ਨੂੰ ਜ਼ਬਰਦਸਤ ਟੱਕਰ ਮਾਰ ਦਿਤੀ।
Accident
ਮ੍ਰਿਤਕ ਦਵਿੰਦਰ ਦੇ ਸਾਥੀ ਰਵੀ ਪਾਲ ਨੇ ਪ੍ਰੈੱਸ ਨੂੰ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਉਹ ਦੋਵੇਂ ਆਪਣੇ-ਆਪਣੇ ਸਾਈਕਲ 'ਤੇ ਜਾ ਰਹੇ ਸੀ ਕਿ ਇਕ ਤੇਜ਼ ਰਫ਼ਤਾਰ ਗੱਡੀ ਨੇ ਦਵਿੰਦਰ ਨੂੰ ਟੱਕਰ ਮਾਰੀ। ਰਵੀ ਨੇ ਦੱਸਿਆ ਕਿ ਉਸ ਨੇ ਜਿਵੇਂ ਹੀ ਦੇਖਿਆ ਕਿ ਤੇਜ਼ ਰਫਤਾਰ 'ਚ ਗੱਡੀ ਉਨ੍ਹਾਂ ਦੇ ਵਲ ਆ ਰਹੀ ਹੈ, ਉਸ ਨੇ ਸਾਈਕਲ ਹੌਲੀ ਕਰ ਲਿਆ ਪਰ ਦਵਿੰਦਰ ਉਸ ਤੋਂ 10-15 ਮੀਟਰ ਅੱਗੇ ਸੀ। ਇਸ ਤੋਂ ਪਹਿਲਾਂ ਕਿ ਉਹ ਦਵਿੰਦਰ ਨੂੰ ਬਚਾਉਣ ਲਈ ਆਵਾਜ਼ ਦਿੰਦਾ ਉਦੋਂ ਤੱਕ ਗੱਡੀ ਨੇ ਉਸ ਨੂੰ ਟੱਕਰ ਮਾਰ ਦਿੱਤੀ।
ਦਵਿੰਦਰ ਹਵਾ ਵਿੱਚ 7-8 ਫੁੱਟ ਤਕ ਉੱਛਲ ਕੇ ਜ਼ਮੀਨ ਉੱਪਰ ਡਿੱਗ ਗਿਆ ਅਤੇ ਉਸ ਦੀ ਮੌਤ ਹੋ ਗਈ। ਰਵੀ ਪਾਲ ਮੁਤਾਬਕ ਗੱਡੀ ਨੂੰ ਇੱਕ ਇਟਾਲੀਅਨ ਮੁੰਡਾ ਚਲਾ ਰਿਹਾ ਸੀ, ਜਿਸ ਨੇ ਕਾਫ਼ੀ ਨਸ਼ਾ ਕੀਤਾ ਹੋਇਆ ਸੀ। ਇਹ ਇਟਾਲੀਅਨ ਨੌਜਵਾਨ ਆਪਣੀ ਦੋਸਤ ਕੁੜੀ ਨਾਲ ਇੱਕ ਮੇਲਾ ਦੇਖ ਕੇ ਆ ਰਿਹਾ ਸੀ।
Accident
ਘਟਨਾ ਦੀ ਸੂਚਨਾ ਮਿਲਦੇ ਹੀ ਐਂਬੂਲੈਂਸ ਅਤੇ ਪੁਲਿਸ ਨੇ ਆਕੇ ਦਵਿੰਦਰ ਦੀ ਮ੍ਰਿਤਕ ਦੇਹ ਨੂੰ ਕਬਜ਼ੇ ਵਿਚ ਲੈ ਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਦੱਸ ਦਈਏ ਕਿ ਮ੍ਰਿਤਕ ਦਵਿੰਦਰ ਦਾ ਇਕ 4 ਸਾਲ ਦਾ ਬੀਟਾ ਵੀ ਹੈ। ਇਸ ਦਰਦ ਨਾਕ ਸੜਕ ਹਾਦਸੇ ਦਾ ਸ਼ਿਕਾਰ ਇਹ ਨੌਜਵਾਨ ਅਪਣੀ ਪਤਨੀ ਅਤੇ ਬੁੱਢੇ ਮਾਪਿਆਂ ਨੂੰ ਸਾਰੀ ਉਮਰ ਦਾ ਦੁੱਖ ਦੇ ਕੇ ਚਲਿਆ ਗਿਆ ਹੈ।
