ਅਗਲੇ ਸਾਲ ਤੋਂ ਸ਼ੁਰੂ ਹੋ ਰਹੀ ਟੈਸਟ ਚੈਂਪੀਅਨਸ਼ਿਪ ਵਿਚ ਵੀ ਟਾਸ ਦੀ ਪਰੰਪਰਾ ਖ਼ਤਮ ਨਹੀਂ ਕੀਤੀ ਜਾਵੇਗੀ| ਸਾਬਕਾ ਭਾਰਤੀ ਕਪਤਾਨ ਅਨਿਲ ਕੁੰਬਲੇ..........
ਮੁੰਬਈ : ਅਗਲੇ ਸਾਲ ਤੋਂ ਸ਼ੁਰੂ ਹੋ ਰਹੀ ਟੈਸਟ ਚੈਂਪੀਅਨਸ਼ਿਪ ਵਿਚ ਵੀ ਟਾਸ ਦੀ ਪਰੰਪਰਾ ਖ਼ਤਮ ਨਹੀਂ ਕੀਤੀ ਜਾਵੇਗੀ| ਸਾਬਕਾ ਭਾਰਤੀ ਕਪਤਾਨ ਅਨਿਲ ਕੁੰਬਲੇ ਦੀ ਅਗਵਾਈ ਵਿਚ ਹੋਈ ਆਈਸੀਸੀ ਕ੍ਰਿਕਟ ਕਮੇਟੀ ਨੇ ਦੋ ਦਿਨ ਦੀ ਮੀਟਿੰਗ ਤੋਂ ਬਾਅਦ ਇਹ ਸਿਫਾਰਸ਼ ਕੀਤੀ ਹੈ| ਨਾਲ ਹੀ ਟੈਸਟ ਚੈਂਪੀਅਨਸ਼ਿਪ ਤਹਿਤ ਲੜੀ ਜਿੱਤ ਲਈ ਟੀਮਾਂ ਨੂੰ ਕੋਈ ਅੰਕ ਨਹੀਂ ਦਿੱਤਾ ਜਾਵੇਗਾ| ਹਰ ਮੈਚ ਦੇ ਨਤੀਜੇ ਦੇ ਆਧਾਰ ਉਤੇ ਅੰਕ ਦਿੱਤੇ ਜਾਣਗੇ| ਕਮੇਟੀ ਨੇ ਬਾਲ ਟੈੰਪਰਿੰਗ ਅਤੇ ਅਪਮਾਨਜਨਕ ਵਿਹਾਰ ਨੂੰ ਸਜ਼ਾ ਦੇਣ ਦੇ ਪ੍ਰਬੰਧ ਨੂੰ ਮਜ਼ਬੂਤ ਕਰਨ ਦੀ ਸਿਫਾਰਸ਼ ਵੀ ਕੀਤੀ ਹੈ|
ਕਮੇਟੀ ਨੇ ਟੈਸਟ ਚੈਂਪੀਅਨਸ਼ਿਪ ਦੇ ਹਰ ਮੈਚ ਨੂੰ ਬਰਾਬਰ ਮਹੱਤਵ ਦੇਣ ਲਈ ਮੈਚ ਦੇ ਨਤੀਜੇ ਦੇ ਆਧਾਰ ਉਤੇ ਅੰਕ ਦੇਣ ਦਾ ਫੈਸਲਾ ਕੀਤਾ ਹੈ, ਨਾ ਕਿ ਲੜੀ ਦੇ ਆਧਾਰ 'ਤੇ| ਜੇਕਰ ਤਿੰਨ ਟੈਸਟ ਮੈਚਾਂ ਦੀ ਲੜੀ ਵਿਚ ਕੋਈ ਟੀਮ ਪਹਿਲੇ ਦੋ ਟੈਸਟ ਮੈਚ ਜਿੱਤ ਵੀ ਲੈਂਦੀ ਹੈ ਤਾਂ ਵੀ ਤੀਜੇ ਮੈਚ ਵਿਚ ਜਿੱਤ ਦੀ ਉਸਦੀ ਕੋਸ਼ਿਸ਼ ਘੱਟ ਨਹੀਂ ਹੋਵੇਗੀ, ਕਿਉਂਕਿ ਉਸ ਮੈਚ ਦੇ ਅੰਕ ਦਾ ਚੈਂਪੀਅਨਸ਼ਿਪ ਵਿਚ ਅੱਗੇ ਅਸਰ ਪੈ ਸਕਦਾ ਹੈ| ਐਸ਼ੇਜ-2015 ਦੌਰਾਨ ਤਤਕਾਲੀਨ ਆਸਟਰੇਲੀਆਈ ਕਪਤਾਨ ਰਿਕੀ ਪੋਂਟਿੰਗ ਨੇ ਟੈਸਟ ਮੈਚਾਂ ਵਿਚ ਟਾਸ ਖਤਮ ਕਰਨ ਦਾ ਪ੍ਰਸਤਾਵ ਰੱਖਿਆ ਸੀ| ਉਨ੍ਹਾਂ ਦਾ ਕਹਿਣਾ ਸੀ ਇਸ ਨਾਲ ਘਰੇਲੂ ਟੀਮਾਂ ਦਾ ਪਿਚ ਦੇ ਮਾਮਲੇ ਵਿਚ ਦਖ਼ਲ ਦੇਣਾ ਘੱਟ ਹੋਵੇਗਾ|
ਰਿਕੀ ਪੋਂਟਿਗ ਦੇ ਇਸ ਵਿਚਾਰ ਨੂੰ ਸਟੀਵ ਵਾਅ ਅਤੇ ਮਾਈਕਲ ਹੋਲਡਿੰਗ ਜਿਵੇਂ ਦਿੱਗਜਾਂ ਦਾ ਵੀ ਸਾਥ ਮਿਲਿਆ ਸੀ| ਇੰਗਲੈਂਡ ਕ੍ਰਿਕੇਟ ਬੋਰਡ ਨੇ 2016 ਵਿਚ ਖੇਡੀ ਗਈ ਕਾਉਂਟੀ ਚੈਂਪੀਅਨਸ਼ਿਪ ਵਿਚ ਟਾਸ ਖਤਮ ਕਰਨ ਦਾ ਪ੍ਰਯੋਗ ਵੀ ਕੀਤਾ ਸੀ, ਜਿਸ ਦੇ ਮਿਲੇ-ਜੁਲੇ ਨਤੀਜੇ ਸਾਹਮਣੇ ਆਏ ਸਨ| ਆਸਟਰੇਲੀਆ-ਦੱਖ਼ਣ ਅਫਰੀਕਾ ਲੜੀ ਨੂੰ ਧਿਆਨ ਵਿਚ ਰੱਖਦੇ ਹੋਏ ਬਾਲ ਟੈੰਪਰਿੰਗ ਅਤੇ ਮੈਚ ਦੇ ਦੌਰਾਨ ਖ਼ਰਾਬ ਵਿਹਾਰ ਲਈ ਹੁਣੇ ਦਿੱਤੀ ਜਾ ਰਹੀ ਸਜ਼ਾ ਨੂੰ ਆਈਸੀਸੀ ਤੋਂ ਹੋਰ ਸਖ਼ਤ ਕਰਨ ਦੀ ਸਿਫਾਰਿਸ਼ ਕੀਤੀ ਗਈ ਸੀ|
ਬਾਲ ਟੈੰਪਰਿੰਗ ਮਾਮਲੇ ਵਿਚ ਆਈਸੀਸੀ ਨੇ ਆਸਟਰੇਲੀਆਈ ਕਪਤਾਨ ਸਟੀਵ ਸਮਿਥ ਉਤੇ ਇਕ ਮੈਚ ਦੀ ਪਾਬੰਦੀ ਲਗਾਈ ਸੀ| ਕੈਮਰੂਨ ਬੇਨਕ੍ਰਾਫਟ ਉਤੇ ਮੈਚ ਫੀਸ ਦਾ 75 ਫੀਸਦੀ ਜ਼ੁਰਮਾਨਾ ਲਗਾਇਆ ਗਿਆ ਸੀ| ਡੇਵਿਡ ਵਾਰਨਰ ਨੂੰ ਕੋਈ ਸਜ਼ਾ ਨਹੀਂ ਮਿਲੀ ਸੀ| ਆਈਸੀਸੀ ਕ੍ਰਿਕੇਟ ਕਮੇਟੀ ਵਿਚ ਬਤੋਰ ਪ੍ਰਧਾਨ ਸਾਬਕਾ ਭਾਰਤੀ ਕਪਤਾਨ ਅਨਿਲ ਕੁੰਬਲੇ ਤੋਂ ਇਲਾਵਾ ਐਂਡਰੂ ਸਟਰਾਸ, ਮਾਹੇਲਾ ਜੈਵਰਧਨੇ, ਰਾਹੁਲ ਦ੍ਰਵਿੜ, ਨਿਊਜ਼ੀਲੈਂਡ ਕ੍ਰਿਕੇਟ ਦੇ ਮੁੱਖ ਕਾਰਜਕਾਰੀ ਡੇਵਿਡ ਵਾਈਟ, ਅੰਪਾਇਰ ਰਿਚਰਡ ਕੇਟੇਲਬੋਰੋਗ, ਆਈਸੀਸੀ ਮੈਚ ਰੈਫ਼ਰੀ ਪ੍ਰਮੁੱਖ ਰੰਜਨ ਮਦੁਗਲੇ, ਸ਼ਾਨ ਪੋਲਾਕ ਅਤੇ ਕਲੇਰੀ ਕੋਨੋਰ ਸ਼ਾਮਿਲ ਹਨ|
ਕ੍ਰਿਕਟ ਦੀ ਦੁਨੀਆਂ ਵਿਚ ਹੋਣ ਵਾਲੇ ਹਰ ਮੈਚ ਤੋਂ ਪਹਿਲਾਂ ਟਾਸ ਦੇ ਜਰੀਏ ਸਿੱਕਾ ਉਛਾਲ ਕੇ ਇਹ ਤੈਅ ਕੀਤਾ ਜਾਂਦਾ ਹੈ ਕਿ ਕਿਹੜੀ ਟੀਮ ਪਹਿਲਾਂ ਬੱਲੇਬਾਜ਼ੀ ਜਾਂ ਗੇਂਦਬਾਜ਼ੀ ਕਰੇਗੀ| ਇਹ ਟੈਸਟ ਕ੍ਰਿਕਟ ਵਿਚ 141 ਸਾਲ ਪੁਰਾਣੀ ਪਰੰਪਰਾ ਹੈ| ਟੈਸਟ ਕ੍ਰਿਕਟ ਦੀ ਸ਼ੁਰੁਆਤ ਸਾਲ 1877 ਵਿਚ ਆਸਟਰੇਲੀਆ ਅਤੇ ਇੰਗਲੈਂਡ ਦੇ ਵਿਚ ਮੈਲਬਰਨ ਦੇ ਐਮਸੀਜੀ ਗਰਾਊਂਡ ਵਿਚ ਹੋਏ ਮੈਚ ਤੋਂ ਹੋਈ ਸੀ| ਉਦੋਂ ਤੋਂ ਮੈਚ ਤੋਂ ਪਹਿਲਾਂ ਸਿੱਕੇ ਨੂੰ ਉਛਾਲ ਕੇ ਇਹ ਤੈਅ ਕੀਤਾ ਜਾਂਦਾ ਹੈ ਕਿ ਕਿਹੜੀ ਟੀਮ ਪਹਿਲਾਂ ਬੱਲੇਬਾਜ਼ੀ ਕਰੇਗੀ ਅਤੇ ਕਿਹੜੀ ਟੀਮ ਪਹਿਲਾਂ ਫੀਲਡਿੰਗ ਕਰੇਗੀ|
ਨੌਂ ਟੀਮਾਂ ਦੀ ਭਾਗੀਦਾਰੀ ਵਾਲੀ ਆਈਸੀਸੀ ਟੈਸਟ ਚੈਂਪੀਅਨਸ਼ਿਪ ਵਿਚ ਮੇਜ਼ਬਾਨ ਟੀਮਾਂ ਆਪਣੇ ਪਸੰਦ ਦੀ ਪਿਚ ਬਣਾ ਕੇ ਫਾਇਦਾ ਨਾ ਚੁੱਕਣ, ਇਸ ਦੇ ਲਈ ਟਾਸ ਖ਼ਤਮ ਕਰਣ ਦੀ ਗੱਲ ਚਲ ਰਹੀ ਸੀ| ਅਜਿਹਾ ਹੋਣ ਉਤੇ ਮਹਿਮਾਨ ਟੀਮ ਨੂੰ ਇਹ ਹੱਕ ਮਿਲਦਾ ਕਿ ਉਹ ਪਹਿਲਾਂ ਬੱਲੇਬਾਜ਼ੀ ਕਰਨਾ ਚਾਹੁੰਦੀ ਹੈ ਜਾਂ ਬਾਲਿੰਗ ਪਰ ਆਈਸੀਸੀ ਕਮੇਟੀ ਇਸ ਸਿੱਟੇ ਉਤੇ ਪਹੁੰਚੀ ਕਿ ਟਾਸ ਹਮੇਸ਼ਾ ਤੋਂ ਕ੍ਰਿਕੇਟ ਦਾ ਅਨਿੱਖੜਵਾਂ ਹਿੱਸਾ ਰਿਹਾ ਹੈ ਅਤੇ ਇਸਨੂੰ ਖਤਮ ਕਰਨਾ ਠੀਕ ਨਹੀਂ ਹੋਵੇਗਾ| (ਏਜੰਸੀ)