ਨੇਪਾਲ ਵਿਚ ਅੱਜ ਖ਼ਤਮ ਹੋਏ ਚੌਥੇ ਬਿਮਸਟੈਕ ਸੰਮੇਲਨ ਤੋਂ ਪਾਸੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਥਾਈਲੈਂਡ, ਮਿਆਮਾਂਰ ਅਤੇ ਭੂਟਾਨ ਦੇ ਆਗੂਆਂ............
ਕਾਠਮੰਡੂ : ਨੇਪਾਲ ਵਿਚ ਅੱਜ ਖ਼ਤਮ ਹੋਏ ਚੌਥੇ ਬਿਮਸਟੈਕ ਸੰਮੇਲਨ ਤੋਂ ਪਾਸੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਥਾਈਲੈਂਡ, ਮਿਆਮਾਂਰ ਅਤੇ ਭੂਟਾਨ ਦੇ ਆਗੂਆਂ ਨਾਲ ਵੱਖੋ-ਵੱਖ ਦੁਵੱਲੀਆਂ ਮੁਲਾਕਾਤਾਂ ਕੀਤੀਆਂ। ਮੋਦੀ ਨੇ ਥਾਈਲੈਂਡ ਦੇ ਪ੍ਰਧਾਨ ਮੰਤਰੀ ਪ੍ਰਯੂਤ ਚਾਨ ਓਚਾ, ਮਿਆਮਾਂ ਦੇ ਰਾਸ਼ਟਰਪਤੀ ਵਿਨ ਮਿੰਤ ਅਤੇ ਭੂਟਾਨ ਦੀ ਅੰਤਰਮ ਸਰਕਾਰ ਦੇ ਮੁੱਖ ਸਲਾਹਕਾਰ ਦਾਸ਼ੋ ਸ਼ੇਰਿੰਗ ਵਾਂਗਚੁਕ ਨਾਲ ਗੱਲਬਾਤ ਕੀਤੀ। ਮੋਦੀ ਨੇ ਟਵਿਟਰ 'ਤੇ ਕਿਹਾ, 'ਪ੍ਰਯੁਤ ਚਾਨ ਓਚਾ ਅਤੇ ਮੇਰੀ ਮੁਲਾਕਾਤ ਚੰਗੀ ਰਹੀ। ਸਾਡਾ ਧਿਆਨ ਸਾਡੇ ਨਾਗਰਿਕਾਂ ਦੇ ਦੁਵੱਲੇ ਲਾਭ ਲਈ ਭਾਰਤ ਤੇ ਥਾਈਲੈਂਡ ਵਿਚਕਾਰ ਤਾਲਮੇਲ ਵਧਾਉਣ ਵਲ ਕੇਂਦਰਤ ਸੀ।'
ਦੋਵੇਂ ਆਗੂ ਚੌਥੇ ਬੰਗਾਲ ਦੀ ਖਾੜੀ ਬਹੁ-ਖੇਤਰੀ ਤਕਨੀਕੀ ਅਤੇ ਆਰਥਕ ਸਹਿਯੋਗ ਪਹਿਲ ਯਾਲੀ ਬਿਮਸਟੈਕ ਸੰਮੇਲਨ ਵਿਚ ਸ਼ਾਮਲ ਹੋਣ ਲਈ ਇਥੇ ਆਏ ਸਨ।
ਪ੍ਰਧਾਨ ਮੰਤਰੀ ਨੇ ਦਸਿਆ, 'ਥਾਈਲੈਂਡ ਦੇ ਪ੍ਰਧਾਨ ਮੰਤਰੀ ਨਾਲ ਗੱਲਬਾਤ ਕਾਫ਼ੀ ਵਧੀਆ ਰਹੀ। ਇਹ ਗੱਲਬਾਤ ਦੁਵੱਲਾ ਤਾਲਮੇਲ ਵਧਾਉਣ ਬਾਰੇ ਸੀ।' ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਰਵੀਸ਼ ਕੁਮਾਰ ਨੇ ਦਸਿਆ ਕਿ ਦੋਹਾਂ ਆਗੂਆਂ ਨੇ ਦੁਵੱਲੇ ਸਬੰਧਾਂ ਨੂੰ ਹੋਰ ਮਜ਼ਬੂਤ ਬਣਾਉਣ ਬਾਰੇ ਚਰਚਾ ਕੀਤੀ।
ਮੋਦੀ ਨੇ ਮਿਆਮਾਂ ਦੇ ਰਾਸ਼ਟਰਪਤੀ ਨਾਲ ਵੀ ਮੁਲਾਕਾਤ ਕੀਤੀ ਅਤੇ ਦੁਵੱਲੇ ਸਬੰਧ ਮਜ਼ਬੂਤ ਕਰਨ ਦੇ ਤਰੀਕਿਆਂ ਬਾਰੇ ਗੱਲਬਾਤ ਕੀਤੀ। ਪ੍ਰਧਾਨ ਮੰਤਰੀ ਦਫ਼ਤਰ ਨੇ ਕਿਹਾ ਕਿ ਦੋਹਾਂ ਆਗੂਆਂ ਨੇ ਭਾਰਤ ਤੇ ਮਿਆਮਾਂ ਵਿਚਕਾਰ ਤਾਲਮੇਲ ਦੀ ਰਫ਼ਤਾਰ ਤੇਜ਼ ਕਰਨ ਬਾਰੇ ਚਰਚਾ ਕੀਤੀ। (ਏਜੰਸੀ)