ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਦੁਆਰਾ ਜਾਰੀ ਕੀਤਾ ਗਿਆ ਇਕ ਇਕ ਪੈਸਾ ਗ਼ਰੀਬਾਂ ਤਕ ਪਹੁੰਚਦਾ ਹੈ...........
ਜੁਜਵਾ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਦੁਆਰਾ ਜਾਰੀ ਕੀਤਾ ਗਿਆ ਇਕ ਇਕ ਪੈਸਾ ਗ਼ਰੀਬਾਂ ਤਕ ਪਹੁੰਚਦਾ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦਾ ਸੁਪਨਾ ਹੈ ਕਿ 2022 ਤਕ ਹਰ ਭਾਰਤੀ ਨੂੰ ਅਪਣਾ ਮਕਾਨ ਮਿਲੇ ਜਦ ਦੇਸ਼ ਆਜ਼ਾਦੀ ਦੇ 75 ਸਾਲ ਮਨਾ ਰਿਹਾ ਹੋਵੇਗਾ। ਗੁਜਰਾਤ ਦੇ ਇਸ ਪਿੰਡ ਵਿਚ ਰੈਲੀ ਨੂੰ ਸੰਬੋਧਨ ਕਰਦਿਆਂ ਮੋਦੀ ਨੇ ਸਾਬਕਾ ਪ੍ਰਧਾਨ ਮੰਤਰੀ ਰਾਜੀਵ ਗਾਂਧੀ ਦੀ ਮਸ਼ਹੂਰ ਟਿਪਣੀ ਕਿ ਕੇਂਦਰ ਦੁਆਰਾ ਜਾਰੀ ਇਕ ਰੁਪਏ ਦੇ ਸਿਰਫ਼ 15 ਪੈਸੇ ਲਾਭਪਾਤਰੀਆਂ ਤਕ ਪਹੁੰਚਦੇ ਹਨ, ਦਾ ਅਸਿੱਧੇ ਤੌਰ 'ਤੇ ਜ਼ਿਕਰ ਕਰਦਿਆਂ ਕਿਹਾ, 'ਜੇ ਦਿੱਲੀ ਤੋਂ ਇਕ ਰੁਪਇਆ ਜਾਰੀ ਕੀਤਾ ਜਾਂਦਾ ਹੈ
ਤਾਂ ਹੁਣ ਸਾਰੇ 100 ਪੈਸੇ ਗ਼ਰੀਬਾਂ ਤਕ ਪਹੁੰਚਦੇ ਹਨ।' ਮੋਦੀ ਨੇ ਕਿਹਾ ਕਿ ਲੋਕਾਂ ਨੂੰ ਕੇਂਦਰ ਦੀਆਂ ਯੋਜਨਾਵਾਂ ਦਾ ਲਾਹਾ ਲੈਣ ਲਈ ਹੁਣ ਬਾਬੂਆਂ ਨੂੰ ਰਿਸ਼ਵਤ ਦੇਣ ਦੀ ਲੋੜ ਨਹੀਂ ਪੈਂਦੀ। ਉਨ੍ਹਾਂ ਕਿਹਾ ਕਿ 2022 ਤਕ ਹਰ ਪਰਵਾਰ ਨੂੰ ਅਪਣਾ ਮਕਾਨ ਮਿਲਣਾ ਚਾਹੀਦਾ ਹੈ ਜਦ ਦੇਸ਼ ਆਜ਼ਾਦੀ ਦੇ 75 ਸਾਲ ਮਨਾ ਰਿਹਾ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਮਾਰਚ 2019 ਤਕ ਪੈਂਡੂ ਇਲਾਕਿਆਂ ਵਿਚ ਇਕ ਕਰੋੜ ਨਵੇਂ ਪੱਕੇ ਘਰ ਬਣਾਉਣ ਦਾ ਟੀਚਾ ਹੈ ਅਤੇ 2022 ਤਕ ਇਹ ਟੀਚਾ 2.95 ਕਰੋੜ ਦਾ ਹੈ। ਮੋਦੀ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਵਿਚ ਵਿਚੋਲਿਆਂ ਲਈ ਕੋਈ ਥਾਂ ਨਹੀਂ ਹੈ, ਇਸੇ ਲਈ ਗ਼ਰੀਬਾਂ ਦੇ ਘਰ ਬਣ ਰਹੇ ਹਨ ਅਤੇ ਉਨ੍ਹਾਂ ਤਕ ਪੂਰਾ ਪੈਸਾ ਪਹੁੰਚ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਅੰਦਰ ਮਹਿਲਾ ਲਾਭਪਾਤਰੀਆਂ ਨੂੰ ਇਹ ਪੁੱਛਣ ਦਾ ਹੌਸਲਾ ਹੈ ਕਿ ਕੀ ਉਨ੍ਹਾਂ ਨੂੰ ਅਪਣੇ ਘਰ ਲੈਣ ਲਈ ਕਮਿਸ਼ਨ ਜਾਂ ਰਿਸ਼ਵਤ ਦੇਣੀ ਪਈ। ਉਨ੍ਹਾਂ ਕਿਹਾ, 'ਇਸ ਦੇ ਜਵਾਬ ਵਿਚ ਔਰਤਾਂ ਤੇ ਮਾਵਾਂ ਤਸੱਲੀ ਨਾਲ ਕਹਿ ਸਕਦੀਆਂ ਹਨ ਕਿ ਉਨ੍ਹਾਂ ਨੂੰ ਨਿਯਮਾਂ ਮੁਤਾਬਕ ਘਰ ਮਿਲੇ ਅਤੇ ਉਨ੍ਹਾਂ ਨੇ ਇਕ ਰੁਪਇਆ ਵੀ ਰਿਸ਼ਵਤ ਨਹੀਂ ਦਿਤੀ।' ਉਨ੍ਹਾਂ ਕਿਹਾ, 'ਗੁਜਰਾਤ ਨੇ ਮੈਨੂੰ ਬਹੁਤ ਕੁੱਝ ਸਿਖਾਇਆ ਹੈ। ਇਸ ਨੇ ਮੈਨੂੰ ਖ਼ਾਸ ਸਮੇਂ ਅੰਦਰ ਸੁਪਨੇ ਸਾਕਾਰ ਕਰਨੇ ਸਿਖਾਏ ਹਨ। ਉਨ੍ਹਾਂ ਇਹ ਵੀ ਕਿਹਾ ਕਿ ਜੇ 70 ਸਾਲ ਪਹਿਲਾਂ ਸਵੱਛ ਭਾਰਤ ਮਿਸ਼ਨ ਸ਼ੁਰੂ ਹੁੰਦਾ ਤਾਂ ਅੱਜ ਹਾਲਤ ਹੋਰ ਹੋਣੀ ਸੀ। (ਪੀਟੀਆਈ)
