ਗੁੱਸੇ ਨੂੰ ਜੇਕਰ ਕਾਬੂ ਨਾ ਕੀਤੇ ਜਾਵੇ ਤਾਂ ਇਹ ਕੁੱਝ ਵੀ ਕਰਵਾ ਸਕਦਾ ਹੈ। ਗੁੱਸੇ ਵਿਚ ਬੇਕਾਬੂ ਹੋਇਆ ਇਨਸਾਨ ਕਤਲ ਨੂੰ ਅੰਜ਼ਾਮ ਦੇ ਸਕਦਾ ਹੈ। ਅਜਿਹੀ ਹੀ ਘਟਨਾ ...
ਆਬੂਧਾਬੀ : ਗੁੱਸੇ ਨੂੰ ਜੇਕਰ ਕਾਬੂ ਨਾ ਕੀਤੇ ਜਾਵੇ ਤਾਂ ਇਹ ਕੁੱਝ ਵੀ ਕਰਵਾ ਸਕਦਾ ਹੈ। ਗੁੱਸੇ ਵਿਚ ਬੇਕਾਬੂ ਹੋਇਆ ਇਨਸਾਨ ਕਤਲ ਨੂੰ ਅੰਜ਼ਾਮ ਦੇ ਸਕਦਾ ਹੈ। ਅਜਿਹੀ ਹੀ ਘਟਨਾ ਆਬੂਧਾਬੀ ਵਿਚ ਵਾਪਰੀ ਹੈ, ਜਿੱਥੇ ਇਕ ਭਾਰਤੀ ਨੇ ਅਪਣੇ ਸਾਥੀ ਦਾ ਇਸ ਗੱਲੋਂ ਕਤਲ ਕਰ ਦਿਤਾ ਕਿਉਂਕਿ ਉਹ ਫ਼ੋਨ 'ਤੇ ਉਚੀ-ਉਚੀ ਗੱਲ ਕਰ ਰਿਹਾ ਸੀ। 37 ਸਾਲਾਂ ਦਾ ਭਾਰਤੀ ਇਮਾਰਤ ਉਸਾਰੀ ਦੇ ਕੰਮ ਨਾਲ ਜੁੜਿਆ ਹੋਇਆ ਹੈ, ਜਿਸ ਨੇ ਅਪਣੇ ਸਾਥੀ ਨੂੰ ਫ਼ੋਨ 'ਤੇ ਉਚੀ ਗੱਲ ਕਰਨ ਨੂੰ ਲੈ ਕੇ ਹੀ ਕਤਲ ਕਰ ਦਿਤਾ।
Murder
ਉਂਝ ਇਹ ਘਟਨਾ ਬੀਤੇ ਮਾਰਚ ਮਹੀਨੇ ਅਲ ਕਿਊਸਾਇਸ ਇਲਾਕੇ ਵਿਚ ਵਾਪਰੀ ਸੀ ਪਰ ਹੁਣ ਇਸ ਮਾਮਲੇ ਵਿਚ ਅਦਾਲਤ ਨੇ ਮੁਲਜ਼ਮ ਭਾਰਤੀ 'ਤੇ ਦੋਸ਼ ਆਇਦ ਕੀਤੇ ਗਏ ਹਨ। ਅਦਾਲਤ ਵਿਚ ਹੋਈ ਬਹਿਸ ਦੌਰਾਨ ਸਰਕਾਰੀ ਵਕੀਲਾਂ ਨੇ ਮੁਲਜ਼ਮ ਲਈ ਸਖ਼ਤ ਸਜ਼ਾ ਦੀ ਮੰਗ ਕੀਤੀ ਹੈ। ਭਾਰਤੀ ਕਾਮਿਆਂ ਦੇ ਸੁਪਰਵਾਈਜ਼ਰ ਨੇ ਇਸ ਸਬੰਧੀ ਗੱਲਬਾਤ ਕਰਦਿਆਂ ਦਸਿਆ ਕਿ ਜਦੋਂ ਉਸ ਨੂੰ ਇਸ ਘਟਨਾ ਬਾਰੇ ਪਤਾ ਲੱਗਿਆ ਸੀ ਤਾਂ ਉਹ ਤੁਰਤ ਕਮਰੇ ਵਿਚ ਗਿਆ, ਜਿੱਥੇ ਇਕ ਵਿਅਕਤੀ ਬੇਹੋਸ਼ੀ ਦੀ ਹਾਲਤ ਵਿਚ ਪਿਆ ਸੀ। ਉਸ ਦੇ ਪੇਟ 'ਤੇ ਚਾਕੂ ਦਾ ਵੱਡਾ ਜ਼ਖ਼ਮ ਸੀ।
Murder
ਇਕ ਗਵਾਹ ਨੇ ਦਸਿਆ ਕਿ ਉਸ ਨੇ ਇਕ ਭਾਰਤੀ ਨੂੰ ਇਮਾਰਤ ਤੋਂ ਬਾਹਰ ਭੱਜਦਿਆਂ ਦੇਖਿਆ ਸੀ। ਉਸ ਅਨੁਸਾਰ ਉਹ ਸ਼ਰਾਬੀ ਹਾਲਤ ਵਿਚ ਜਾਪ ਰਿਹਾ ਸੀ ਤੇ ਉਸ ਦੀਆਂ ਉਂਗਲਾਂ 'ਚੋਂ ਖ਼ੂਨ ਨਿਕਲ ਰਿਹਾ ਸੀ। ਭਾਵੇਂ ਕਿ ਉਸ ਨੂੰ ਖੂਨ ਨਿਕਲਣ ਦਾ ਕਾਰਨ ਪੁਛਿਆ ਗਿਆ ਪਰ ਇਸ ਦੇ ਬਾਵਜੂਦ ਉਸ ਨੇ ਇਹ ਨਹੀਂ ਦਸਿਆ ਕਿ ਉਸ ਦੇ ਇਹ ਸੱਟ ਕਿਵੇਂ ਲੱਗੀ।
Murder
ਸੀਸੀਟੀਵੀ ਦੀ ਫ਼ੁਟੇਜ ਮੁਤਾਬਕ ਮੁਲਜ਼ਮ ਅਪਣੇ ਕੱਪੜਿਆਂ ਹੇਠਾਂ ਚਾਕੂ ਲੁਕਾ ਰਿਹਾ ਸੀ, ਜਦੋਂ ਉਹ ਰੈਸਟ-ਰੂਮ ਵਿਚ ਦਾਖ਼ਲ ਹੋਇਆ ਸੀ ਤੇ ਇੰਝ ਦਰਸਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ, ਜਿਵੇਂ ਉਸ ਨੇ ਕੁੱਝ ਕੀਤਾ ਹੀ ਨਾ ਹੋਵੇ। ਪੋਸਟਮਾਰਟਮ ਰਿਪੋਰਟ ਵਿਚ ਮ੍ਰਿਤਕ ਦੀ ਮੌਤ ਦਾ ਕਾਰਨ ਚਾਕੂ ਨਾਲ ਹੋਇਆ ਜ਼ਖ਼ਮ ਹੀ ਦਸਿਆ ਗਿਆ ਸੀ। ਅਦਾਲਤ ਹੁਣ ਮੁਲਜ਼ਮ ਵਿਰੁਧ ਦੋਸ਼ ਆਇਦ ਕਰ ਦਿਤੇ ਹਨ ਅਤੇ ਅਗਲੇ ਕੁੱਝ ਦਿਨਾਂ ਵਿਚ ਉਸ ਨੂੰ ਸਜ਼ਾ ਦਾ ਐਲਾਨ ਕਰ ਦਿਤਾ ਜਾਵੇਗਾ।
