ਕੋਰੋਨਾ ਮਹਾਂਮਾਰੀ ਨਾਲ ਨਜਿੱਠਣ ਲਈ ਕਈ ਦੇਸ਼ਾਂ ਵਿਚ ਲਾਗੂ ਕੀਤੇ ਗਏ ਲੌਕਡਾਊਨ ਕਾਰਨ ਲੋਕਾਂ ਵਿਚ ਭਾਵਾਤਮਕ ਤਣਾਅ, ਆਰਥਕ ਪਰੇਸ਼ਾਨੀ ਅਤੇ ਮੋਟਾਪਾ ਵਧਣ ਦਾ ਖਤਰਾ ਵਧ ਗਿਆ ਹੈ।
ਲੰਡਨ: ਕੋਰੋਨਾ ਮਹਾਂਮਾਰੀ ਨਾਲ ਨਜਿੱਠਣ ਲਈ ਕਈ ਦੇਸ਼ਾਂ ਵਿਚ ਲਾਗੂ ਕੀਤੇ ਗਏ ਲੌਕਡਾਊਨ ਕਾਰਨ ਲੋਕਾਂ ਵਿਚ ਭਾਵਾਤਮਕ ਤਣਾਅ, ਆਰਥਕ ਪਰੇਸ਼ਾਨੀ ਅਤੇ ਮੋਟਾਪਾ ਵਧਣ ਦਾ ਖਤਰਾ ਵਧ ਗਿਆ ਹੈ। ਖ਼ਾਸਤੌਰ ‘ਤੇ ਸਮਾਜ ਵਿਚ ਮੋਟਾਪਾ ਵਧਣ ਦੀ ਦਰ ਵਿਸਫੋਟਕ ਰੂਪ ਲੈ ਸਕਦੀ ਹੈ। ਨੇਚਰ ਰਿਵਿਊ ਐਂਡੋਕਰੀਨੋਲੋਜੀ ਨਾਮਕ ਜਰਨਲ ਵਿਚ ਪ੍ਰਕਾਸ਼ਿਤ ਇਕ ਅਧਿਐਨ ਵਿਚ ਇਹ ਦਾਅਵਾ ਕੀਤਾ ਗਿਆ ਹੈ।
Obesity
ਇਸ ਵਿਚ ਕਿਹਾ ਗਿਆ ਹੈ ਕਿ ਇਸ ਤਰ੍ਹਾਂ ਦੇ ਬੁਰੇ ਪ੍ਰਭਾਵਾਂ ਤੋਂ ਨਜਿੱਠਣ ਲਈ ਸਮਾਜਕ-ਆਰਥਕ ਸੁਰੱਖਿਆ ਪ੍ਰਬੰਧਾਂ ਅਤੇ ਸਮਾਜਕ ਸਹਿਯੋਗ ਦੀ ਲੋੜ ਹੈ। ਡੈਨਮਾਰਕ ਸਥਿਤ ਕੋਪਨਹੇਗਨ ਯੂਨੀਵਰਸਿਟੀ ਦੇ ਵਿਗਿਆਨੀਆਂ ਸਮੇਤ ਹੋਰ ਖੋਜਕਰਤਾਵਾਂ ਦਾ ਕਹਿਣਾ ਹੈ ਕਿ ਕੋਰੋਨਾ ਕਾਰਨ ਪੂਰੇ ਸਮਾਜ ਨੂੰ ਲੌਕਡਾਊਨ ਕਰਨ ਨਾਲ ਮਨੋਵਿਗਿਆਨਕ ਅਸੁਰੱਖਿਆ ਦੀ ਭਾਵਨਾ ਪੈਦਾ ਹੁੰਦੀ ਹੈ ਜਿਸ ਨਾਲ ਮੋਟਾਪਾ ਵਧਦਾ ਹੈ।
Lockdown
ਇਸ ਵਿਚ ਸੁਝਾਅ ਦਿੱਤਾ ਹੈ ਕਿ ਜਨਤਾ ਨੂੰ ਸਿਹਤਮੰਦ ਅਤੇ ਕੋਰੋਨਾ ਵਾਇਰਸ ਤੋਂ ਸੁਰੱਖਿਅਤ ਰੱਖਣ ਲਈ ਸੁਧਾਰਕ ਉਪਾਅ ਦੀ ਜਰੂਰਤ ਹੈ। ਇਸ ਦੇ ਲਈ ਮੋਟਾਪਾ ਖੋਜ ਵਿਚ ਨਿਵੇਸ਼ ਦੀ ਲੋੜ ਹੈ, ਜੋ ਅਜਿਹੇ ਉਪਾਅ ਲੱਭਣ ਵਿਚ ਸਹਾਇਤਾ ਕਰੇਗੀ। ਅਧਿਐਨ ਦੇ ਸਹਿ-ਲੇਖਕ ਕ੍ਰਿਸਟੋਫਰ ਕਲੇਮੇਨਸਨ ਨੇ ਕਿਹਾ - ਸਾਨੂੰ ਚਿੰਤਾ ਹੈ ਕਿ ਨੀਤੀ ਨਿਰਮਾਤਾ ਪੂਰੀ ਤਰ੍ਹਾਂ ਇਹ ਨਹੀਂ ਸਮਝ ਰਹੇ ਕਿ ਲੌਕਡਾਊਨ ਅਤੇ ਕਾਰੋਬਾਰ ਬੰਦ ਹੋਣ ਵਰਗੀਆਂ ਰਣਨੀਤੀਆਂ ਮੋਟਾਪੇ ਦਾ ਕਾਰਨ ਬਣ ਸਕਦੀਆਂ ਹਨ।
Obesity
ਸੀਮਤ ਆਮਦਨੀ ਵਾਲੇ ਲੋਕ ਵਧੇਰੇ ਕਰਦੇ ਹਨ ਭੋਜਨ
ਖੋਜਕਰਤਾਵਾਂ ਅਨੁਸਾਰ ਸੀਮਤ ਆਰਥਕ ਸਰੋਤਾਂ ਵਾਲੇ ਲੋਕਾਂ ਵਿਚ ਬਹੁਤ ਊਰਜਾ ਨਾਲ ਭਰਪੂਰ ਭੋਜਨ ਖਾਣ ਦੀ ਜ਼ਿਆਦਾ ਸੰਭਾਵਨਾ ਰਹਿੰਦੀ ਹੈ। ਇਹ ਲੋਕ ਅਪਣੀ ਜ਼ਰੂਰਤ ਤੋਂ ਵੱਧ ਖਾਦੇ ਹਨ। ਡੇਨਮਾਰਕ ਦੀ ਅਰਹਸ ਯੂਨੀਵਰਸਿਟੀ ਦੇ ਸਹਿ-ਲੇਖਕ ਮਾਈਕਲ ਬੈਂਗ ਪੀਟਰਸਨ ਨੇ ਕਿਹਾ - ਇਹ ਸੰਭਾਵਨਾ ਹੈ ਕਿ ਜ਼ਿਆਦਾ ਲੋਕ ਨੌਕਰੀ ਗੁਆਉਣ ਅਤੇ ਆਰਥਕ ਮੁਸ਼ਕਲ ਹੋਣ ‘ਤੇ ਵਧੇਰੇ ਖਾਣਾ ਸ਼ੁਰੂ ਕਰ ਸਕਦੇ ਹਨ।
Work From Home
ਵਰਕ ਫਰਾਮ ਹੋਮ ਨਾਲ ਵੀ ਮੋਟਾਪੇ ਦਾ ਖਤਰਾ
ਵਿਗਿਆਨੀਆਂ ਨੇ ਕਿਹਾ ਕਿ ਸਮਾਜਕ ਤੌਰ ‘ਤੇ ਇਕੱਲੇਪਣ ਦੀ ਭਾਵਨਾ ਜ਼ਿਆਦਾ ਭੋਜਨ ਕਰਨ ਦੀ ਆਦਤ ਬਣਾਉਂਦੀ ਹੈ। ਇਸ ਨਾਲ ਵਰਕ ਫਰਾਮ ਹੋਮ ਕਾਰਨ ਸਰੀਰਕ ਗਤੀਵਿਧੀਆਂ ਵਿਚ ਕਮੀ ਕਾਰਨ ਮੋਟਾਪਾ ਵਧਣ ਦੀ ਸੰਭਾਵਨਾ ਹੋਰ ਵਧ ਜਾਂਦੀ ਹੈ। ਖੋਜਕਰਤਾਵਾਂ ਨੇ ਦੱਸਿਆ ਕਿ ਵਿਅਕਤੀ ਦੇ ਕੰਮ ਕਰਨ ਦੀ ਸ਼੍ਰੇਣੀ ਅਤੇ ਉਸ ਦੀ ਦਿਮਾਗੀ ਸਿਹਤ ਦਾ ਮੋਟਾਪੇ ਨਾਲ ਸਿੱਧਾ ਸਬੰਧ ਹੈ।
