ਵਿਸਫ਼ੋਟਕਾਂ ਨਾਲ ਭਰੀ ਜੈਕੇਟ ਪਹਿਨ ਕੇ ਤਸਵੀਰ ਪੋਸਟ ਕੀਤੀ, ਟਵਿਟਰ 'ਤੇ ਉੱਡਿਆ ਮਜ਼ਾਕ
ਇਸਲਾਮਾਬਾਦ : ਪਾਕਿਸਤਾਨੀ ਗਾਇਕਾ ਰਾਬੀ ਪੀਰਜ਼ਾਦਾ ਨੇ ਇਕ ਵਾਰ ਫਿਰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵਿਰੁਧ ਅਪਮਾਨਜਨਕ ਸ਼ਬਦ ਵਰਤਦਿਆਂ ਧਮਕੀ ਦਿੱਤੀ ਹੈ। ਰਾਬੀ ਨੇ ਟਵਿਟਰ 'ਤੇ ਇਕ ਤਸਵੀਰ ਪੋਸਟ ਕੀਤੀ ਹੈ। ਇਸ 'ਚ ਉਹ ਫ਼ਿਦਾਈਨ ਹਮਲਾਵਰਾਂ ਜਿਹੀ ਜੈਕੇਟ ਪਹਿਨੇ ਨਜ਼ਰ ਆ ਰਹੀ ਹੈ। ਕੁਝ ਦਿਨ ਪਹਿਲਾਂ ਇਸ ਗਾਇਕਾ ਨੇ ਆਪਣੇ ਘਰ ਦੀ ਇਕ ਵੀਡੀਓ ਸ਼ੇਅਰ ਕੀਤੀ ਸੀ। ਜਿਸ 'ਚ ਉਹ ਹੱਥ 'ਚ ਸੱਪਾਂ ਨੂੰ ਲੈ ਕੇ ਭਾਰਤ ਨੂੰ ਧਮਕੀ ਦਿੰਦੀ ਨਜ਼ਰ ਆਈ ਸੀ। ਇਸ ਮਗਰੋਂ ਪਾਕਿਸਤਾਨ ਦੇ ਜੰਗਲਾਤ ਮੰਤਰਾਲਾ ਨੇ ਉਸ ਵਿਰੁਧ ਮਾਮਲਾ ਦਰਜ ਕਰਵਾਇਆ ਸੀ। ਬਾਅਦ 'ਚ ਰਾਬੀ ਵਿਰੁਧ ਗ੍ਰਿਫ਼ਤਾਰੀ ਵਾਰੰਟ ਵੀ ਜਾਰੀ ਹੋਇਆ ਸੀ।
ਰਾਬੀ ਨੇ ਮੋਦੀ ਨੂੰ ਧਮਕੀ ਵਾਲੀ ਪੋਸਟ 'ਚ ਫ਼ਿਦਾਈਨ ਹਮਲਾਵਰਾਂ ਜਿਹੀ ਜੈਕੇਟ ਪਹਿਨੀ ਹੋਈ ਹੈ। ਇਸ ਤਸਵੀਰ ਦੀ ਕੈਪਸ਼ਨ 'ਚ ਉਸ ਦੇ ਅਪਮਾਨਜਨਕ ਸ਼ਬਦਾਵਲੀ ਦੀ ਵਰਤੋਂ ਕੀਤੀ। ਇਸ ਦੇ ਨਾਲ ਹੀ ਉਸ ਨੇ ਹੈਸ਼ਟੈਗ - ਕਸ਼ਮੀਰ ਦੀ ਬੇਟੀ ਵੀ ਲਿਖਿਆ ਹੈ ਅਤੇ ਮੋਦੀ ਨੂੰ ਜਾਨੋਂ ਮਾਰਨ ਦੀ ਧਮਕੀ ਦਿੱਤੀ ਹੈ। ਕੁਝ ਦਿਨ ਪਹਿਲਾਂ ਉਸ ਨੇ ਅਜਗਰ, ਮਗਰਮੱਛ ਆਦਿ ਜੰਗਲੀ ਜਾਨਵਰਾਂ ਨਾਲ ਇਕ ਸੈਲਫ਼ੀ ਲਈ ਸੀ ਅਤੇ ਉਸ ਨੂੰ ਟਵਿਟਰ 'ਤੇ ਸ਼ੇਅਰ ਕਰਦਿਆਂ ਲਿਖਿਆ ਸੀ ਕਿ ਭਾਰਤ ਨੂੰ ਇਨ੍ਹਾਂ ਰਾਹੀਂ ਜੰਨਤ ਨਸੀਬ ਕਰਾਵਾਂਗੀ।
ਰਾਬੀ ਦੀ ਇਸ ਹਰਕਤ 'ਤੇ ਯੂਜਰ ਕਾਫ਼ੀ ਨਾਰਾਜ਼ ਹਨ। ਇਕ ਯੂਜਰ ਨੇ ਪੁੱਛਿਆ - "ਰਾਬੀ, ਕੀ ਇਹ ਪਾਕਿਸਤਾਨ ਦਾ ਕੌਮੀ ਪੋਸ਼ਾਕ ਮਤਲਬ ਨੈਸ਼ਨਲ ਡਰੈੱਸ ਹੈ।" ਇਕ ਹੋਰ ਯੂਜਰ ਨੇ ਕੁਮੈਂਟ ਕੀਤਾ, "ਪਾਕਿਸਤਾਨ ਦੀ ਨੈਸ਼ਨਲ ਡਰੈਸ 'ਚ ਤੁਸੀ ਬਹੁਤ ਖੂਬਸੂਰਤ ਨਜ਼ਰ ਆ ਰਹੇ ਹੋ।"
ਇਸ ਯੂਜਰ ਨੇ ਟਵੀਟ ਕੀਤਾ, "ਰਾਬੀ ਖੁਦ ਨੂੰ ਕਰਾਚੀ ਫ਼ੈਸ਼ਨ ਵੀਕ ਲਈ ਤਿਆਰ ਕਰ ਰਹੀ ਹੈ।"