ਐਂਜਲੀਨਾ ਜੋਲੀ ਮੁਤਾਬਕ ਉਹ ਅਜਿਹੇ ਪੜਾਅ 'ਤੇ ਹਨ ਜਿਥੇ ਉਹ ਬਹੁਤ ਦਿਲਚਸਪ ਤਰੀਕੇ ਨਾਲ ਸਰਕਾਰ ਅਤੇ ਫ਼ੌਜ ਦੇ ਵਿਚਕਾਰ ਕੰਮ ਕਰ ਸਕਦੇ ਹਨ।
ਲੰਡਨ : ਹਾਲੀਵੁੱਡ ਦੀ ਦੁਨੀਆਂ ਵਿਚ ਅਪਣੀ ਅਦਾਕਾਰੀ ਦਾ ਸਿੱਕਾ ਮਨਵਾਉਣ ਵਾਲੀ ਆਸਕਰ ਵਿਜੇਤਾ ਐਂਜਲੀਨਾ ਜੋਲੀ ਨੇ ਗੱਲਬਾਤ ਦੌਰਾਨ ਅਪਣੇ ਰਾਜਨੀਤੀ ਵਿਚ ਕਦਮ ਰੱਖਣ ਦੇ ਸੰਕੇਤ ਦਿਤੇ ਹਨ। ਐਂਜਲੀਨਾ ਜੋਲੀ ਸਮਾਜ ਭਲਾਈ ਦੇ ਕੰਮ ਕਰਦੇ ਰਹੇ ਹਨ। ਐਂਜਲੀਨਾ ਨੇ ਦੱਸਿਆ ਕਿ ਜੇਕਰ ਮੇਰੇ ਵਿਚ ਰਾਜਨੀਤੀ ਦਾ ਹੁਨਰ ਹੋਵੇਗਾ ਤਾਂ ਮੈਂ ਇਸ ਕੰਮ ਲਈ ਬਹੁਤ ਹੱਦ ਤੱਕ ਤਿਆਰ ਹਾਂ। ਐਂਜਲੀਨਾ ਦਾ ਕਹਿਣਾ ਹੈ ਕਿ ਉਹਨਾਂ ਦੇ ਲਈ ਸਰਕਾਰਾਂ ਅਤੇ ਫ਼ੌਜ ਦੇ ਨਾਲ ਕੰਮ ਕਰਨਾ ਔਖਾ ਨਹੀਂ ਹੈ। ਯੂਐਨ ਦੇ ਮਿਸ਼ਨਾਂ ਵਿਚ ਕੰਮ ਕਰਨ ਤੋਂ ਬਾਅਦ ਉਹਨਾਂ ਨੂੰ ਤੁਜ਼ਰਬਾ ਹੋ ਗਿਆ ਹੈ।
ਉਹਨਾਂ ਨੂੰ ਹੁਣ ਇਸ ਗੱਲ ਦੀ ਪਰਖ ਹੋ ਗਈ ਹੈ ਕਿ ਇਹ ਸਾਰੇ ਕੰਮ ਕਿਵੇਂ ਕਰਦੇ ਹਨ। ਐਂਜਲੀਨਾ ਮੁਤਾਬਕ ਉਹ ਅਜਿਹੇ ਪੜਾਅ 'ਤੇ ਹਨ ਜਿਥੇ ਉਹ ਬਹੁਤ ਦਿਲਚਸਪ ਤਰੀਕੇ ਨਾਲ ਸਰਕਾਰ ਅਤੇ ਫ਼ੌਜ ਦੇ ਵਿਚਕਾਰ ਕੰਮ ਕਰ ਸਕਦੇ ਹਨ। ਉਹਨਾਂ ਨੂੰ ਇਸ ਵਿਚ ਕੋਈ ਪਰੇਸ਼ਾਨੀ ਨਹੀਂ ਹੋਵੇਗੀ। ਉਹਨਾਂ ਕਿਹਾ ਕਿ ਸੱਚ ਕਹਾਂ ਤਾਂ ਜੇਕਰ 20 ਸਾਲ ਪਹਿਲਾਂ ਮੈਨੂੰ ਇਹ ਸਵਾਲ ਪੁੱਛਿਆ ਜਾਂਦਾ ਤਾਂ ਮੈਂ ਸ਼ਾਇਦ ਹੱਸ ਦਿੰਦੀ। ਮੈਨੂੰ ਅਸਲ ਵਿਚ ਪਤਾ ਨਹੀਂ, ਮੈਂ ਹਮੇਸ਼ਾਂ ਕਿਹਾ ਹੈ ਕਿ ਮੈਂ ਉਥੇ ਜਾਵਾਂਗੀ ਜਿਥੇ ਮੇਰੀ ਲੋੜ ਹੈ। ਮੈਨੂੰ ਨਹੀਂ ਪਤਾ ਕਿ ਮੈਂ ਰਾਜਨੀਤੀ ਲਈ ਠੀਕ ਹਾਂ ਜਾਂ ਨਹੀਂ,
ਪਰ ਮੈਂ ਮਜ਼ਾਕ ਵਿਚ ਇਹ ਵੀ ਕਿਹਾ ਹੈ ਕਿ ਮੈਂ ਕਿਸੇ ਵੀ ਤਰ੍ਹਾਂ ਦੀ ਚੁਣੌਤੀ ਲਈ ਤਿਆਰ ਹਾਂ। ਐਂਜਲੀਨਾ ਜੋਲੀ ਸੰਯੁਕਤ ਰਾਸ਼ਟਰ ਵਿਚ ਸ਼ਰਣਾਰਥੀਆਂ ਲਈ ਕੰਮ ਕਰਦੀ ਰਹੇ ਹਨ। ਉਹ ਸ਼ਰਣਾਰਥੀਆਂ ਲਈ ਬਣੀ ਏਜੰਸੀ ਨਾਲ ਜੁੜੀ ਅਤੇ 2001 ਤੋਂ ਬਾਅਦ ਹੁਣ ਤੱਕ ਲਗਭਗ 60 ਤੋਂ ਵੱਧ ਮਿਸ਼ਨਾਂ ਵਿਚ ਅਪਣਾ ਯੋਗਦਾਨ ਦੇ ਚੁਕੇ ਹਨ। ਐਂਜਲੀਨਾ ਨੇ ਕਿਹਾ ਕਿ ਹੁਣ ਮੈਂ ਯੁਐਨ ਦੀ ਏਜੰਸੀ ਲਈ ਕੰਮ ਕਰ ਰਹੀ ਹਾਂ। ਲੋੜਮੰਦਾਂ ਦੇ ਲਈ ਸਿੱਧੇ ਤੌਰ 'ਤੇ ਕੰਮ ਕਰਨ ਲਈ ਇਸ ਤੋਂ ਵਧੀਆ ਮੰਚ ਹੋਰ ਨਹੀਂ ਹੋ ਸਕਦਾ।