ਇਥੇ ਤਾਂ ਇਕ ਪੁਲਿਸ ਅਫ਼ਸਰ ਦੀ ਗੁਪਤ ਰੀਪੋਰਟ ਹੀ ਰੇਲ ਗੱਡੀ ਨੂੰ ਪਟੜੀ ਤੋਂ ਹੇਠਾਂ ਲਾਹ ਸਕਦੀ ਹੈ
ਅੱਜ ਲੋੜ ਇਸ ਗੱਲ ਦੀ ਹੈ ਕਿ ਨਸ਼ਾ ਤਸਕਰਾਂ ਦੀ ਪਹੁੰਚ ਸਾਡੇ ਸਿਆਸੀ ਲੋਕਾਂ ਤੇ ਅਫ਼ਸਰਸ਼ਾਹੀ ਤਕ ਨਾ ਹੋਵੇ ਤੇ ਨਿਰਪੱਖ ਤੇ ਤੇਜ਼ ਜਾਂਚ ਨਾਲ ਹੀ ਇਹ ਯਕੀਨੀ ਬਣਾਇਆ ਜਾ ਸਕਦਾ ਹੈ। ਜੇ ਕੋਈ ਇਸ ਵਿਚ ਸ਼ਾਮਲ ਸਾਬਤ ਹੁੰਦਾ ਹੈ ਤਾਂ ਸਜ਼ਾ ਏ ਮੌਤ ਤੋਂ ਘੱਟ ਨਾ ਮੰਗੋ ਤੇ ਇਹ ਨਾ ਵੇਖੋ ਕਿ ਉਹ ਕਿਸ ਪ੍ਰਵਾਰ ਤੋਂ ਹੈ। ਅੱਜ ਪਹਿਲੀ ਵਾਰ ਮੁੱਖ ਮੰਤਰੀ ਤੇ ਗ੍ਰਹਿ ਮੰਤਰੀ ਨੇ ਇਸ ਮਾਮਲੇ ਨੂੰ ਹੱਥ ਪਾਉਣ ਦਾ ਯਤਨ ਕੀਤਾ ਹੈ ਤੇ ਸਰਕਾਰ ਬਦਲ ਵੀ ਜਾਵੇ ਤਾਂ ਵੀ ਇਹ ਸੋਚ ਨਹੀਂ ਬਦਲਣੀ ਚਾਹੀਦੀ।
sukhjinder randhawa deputy cm
ਜਗਦੀਸ਼ ਭੋਲਾ ਵਲੋਂ ਬਿਕਰਮ ਸਿੰਘ ਮਜੀਠੀਆ ਦੇ ਨਾਮ ਨੂੰ ਨਸ਼ਾ ਤਸਕਰੀ ਨਾਲ ਜੋੜਨ ਦੇ ਸਾਢੇ ਪੰਜ ਸਾਲ ਬਾਅਦ ਉਨ੍ਹਾਂ ਵਿਰੁਧ ਪਰਚਾ ਦਰਜ ਹੋਇਆ ਹੈ ਜਿਹੜਾ ਮਾਮਲਾ ਇਕ ਸਿੱਧੀ ਤਫ਼ਤੀਸ਼ ਦਾ ਮਾਮਲਾ ਸੀ, ਉਸ ਨੂੰ ਇਕ ਸਿਆਸੀ ਲੜਾਈ ਬਣਾਇਆ ਗਿਆ। ਬਿਕਰਮ ਸਿੰਘ ਮਜੀਠੀਆ ਨੂੰ ਪਿਛਲੇ ਕੁੱਝ ਸਾਲਾਂ ਵਿਚ ਪੰਜਾਬ ਵਿਚ ਚਿੱਟੇ ਦੇ ਵਪਾਰ ਦਾ ਚਿਹਰਾ ਬਣਾਇਆ ਗਿਆ ਜੋ ਸਿਆਸੀ ਪਾਰਟੀਆਂ ਦੀ ਚੋਣ ਮੁਹਿੰਮ ਦਾ ਅਹਿਮ ਮੁੱਦਾ ਬਣ ਗਿਆ।
Bikram Singh Majithia
ਇਕ ਪਾਸੇ ਬਿਕਰਮ ਸਿੰਘ ਮਜੀਠੀਆ ਵਿਧਾਨ ਸਭਾ ਵਿਚ ਰੋ ਪਏ ਤੇ ਦੂਜੇ ਪਾਸੇ ਹਜ਼ਾਰਾਂ ਪ੍ਰਵਾਰ ਅਪਣੇ ਜੀਆਂ ਨੂੰ ਨਸ਼ੇ ਵਿਚ ਮਰਦੇ ਵੇਖ ਕੁਰਲਾਉਣ ਲੱਗ ਪਏ। ਸਕੂਨ ਕਿਤੇ ਵੀ ਨਹੀਂ ਪਰ ਕਾਰਨ ਕੀ ਹੈ? ਕੀ ਬਿਕਰਮ ਸਿੰਘ ਮਜੀਠੀਆ ਵਿਰੁਧ ਪਰਚਾ ਦਰਜ ਕਰਨ ਮਗਰੋਂ ਪੰਜਾਬ ਵਿਚੋਂ ਨਸ਼ਾ ਗ਼ਾਇਬ ਹੋ ਜਾਵੇਗਾ? ਕੀ ਇਸ ਕੇਸ ਨੂੰ ਵੇਖ ਕੇ ਬਾਕੀ ਸਿਆਸਤਦਾਨ ਤੇ ਅਫ਼ਸਰਸ਼ਾਹੀ ਵਾਲੇ ਇਸ ਵਪਾਰ ਦਾ ਹਿੱਸਾ ਬਣਨ ਤੋਂ ਪਿਛੇ ਹਟ ਜਾਣਗੇ? ਨਹੀਂ ਕਿਉਂਕਿ ਇਸ ਕੇਸ ਨੇ ਵਿਖਾ ਦਿਤਾ ਹੈ ਕਿ ਸਿਸਟਮ ਨੂੰ ਤੋੜਿਆ ਕਿਵੇਂ ਜਾ ਸਕਦਾ ਹੈ।
drugs
ਅੱਜ ਪਰਚਾ ਦਰਜ ਹੋਣ ਤੋਂ ਬਾਅਦ ਵੀ ਅਦਾਲਤ ਤੋਂ ਰਾਹਤ ਮਿਲ ਸਕਦੀ ਹੈ ਕਿਉਂਕਿ ਡੀ.ਜੀ.ਪੀ. ਅਸਥਾਨਾ ਨੇ ਅਜਿਹੀਆਂ ਟਿਪਣੀਆਂ ਅਪਣੀ ਰੀਪੋਰਟ ਵਿਚ ਲਿਖ ਛਡੀਆਂ ਹਨ ਜੋ ਜਾਂਚ ਦੇ ਰਸਤੇ ਵਿਚ ਔਕੜਾਂ ਬਣ ਸਕਦੀਆਂ ਹਨ। ਅੱਜ ਇਕ ਅਜਿਹੀ ਸਰਕਾਰ ਬੈਠੀ ਹੈ ਜੋ ਮਾਮਲੇ ਦੀ ਤੈਅ ਤਕ ਪਹੁੰਚਣ ਦੀ ਨੀਅਤ ਧਾਰੀ ਬੈਠੀ ਹੈ ਪਰ ਸਿਆਸੀ ਖੇਡਾਂ ਵਿਚ ਇਹ ਜਾਂਚ ਵੀ ਰੁਲ ਸਕਦੀ ਹੈ ਜਿਵੇਂ ਬਰਗਾੜੀ ਗੋਲੀ ਕਾਂਡ ਦੀ ਜਾਂਚ ਰੋਲੀ ਗਈ। ਉਸ ਜਾਂਚ ਵਿਚ ਵੀ ਇਕ ਇਮਾਨਦਾਰ ਅਫ਼ਸਰ ਸੀ ਪਰ ਕੁੱਝ ਨਹੀਂ ਹੋ ਸਕਿਆ।
majithia
ਸਿਆਸੀ ਤੇ ਕਾਨੂੰਨੀ ਦਾਅ ਪੇਚਾਂ ਨੂੰ ਉਲਝਾਉਣ ਵਾਸਤੇ ਅਜਿਹੇ ਸ਼ਾਤਰ ਦਿਮਾਗ਼ ਖ਼ਰੀਦੇ ਜਾਂਦੇ ਹਨ ਜੋ ਨਿਆਂ ਨੂੰ ਉਲਝਾਉਣਾ ਜਾਣਦੇ ਹਨ। ਪਰ ਇਹ ਮੁੱਦਾ ਬੜਾ ਸੰਗੀਨ ਹੈ, ਨਾ ਸਿਰਫ਼ ਪੰਜਾਬ ਵਾਸਤੇ ਬਲਕਿ ਪੂਰੇ ਦੇਸ਼ ਵਾਸਤੇ ਵੀ। ਜਿਸ ਰਾਤ ਪੰਜਾਬ ਵਿਚ ਇਹ ਪਰਚਾ ਦਰਜ ਹੋਇਆ, ਗੁਜਰਾਤ ਵਿਚ 3000 ਕਿਲੋ ਅਫ਼ੀਮ ਜਿਸ ਦੀ ਕੀਮਤ 21,000 ਕਰੋੜ ਹੈ, ਫੜੀ ਗਈ। ਅੱਜ ਸਾਡੇ ਦੇਸ਼ ਵਿਚ ਸੱਭ ਤੋਂ ਵੱਡਾ ਤਬਕਾ ਨੌਜਵਾਨਾਂ ਦਾ ਹੈ ਜੋ ਬੜੀਆਂ ਔਕੜਾਂ ਝੱਲ ਰਿਹਾ ਹੈ, ਡਾਢਾ ਨਿਰਾਸ਼ ਹੈ ਤੇ ਰੋਜ਼ਗਾਰ ਪ੍ਰਾਪਤ ਕਰਨ ਲਈ ਧੱਕੇ ਖਾ ਰਿਹਾ ਹੈ।
drugs
ਉਨ੍ਹਾਂ ਦੀ ਨਿਰਾਸ਼ਾ ਹੀ ਨਸ਼ਾ ਨਸ਼ਕਰਾਂ ਵਾਸਤੇ ਇਕ ਵਧੀਆ ਮੌਕਾ ਮੇਲ ਬਣ ਜਾਂਦੀ ਹੈ ਤੇ ਨਸ਼ਾ ਤਸਕਰੀ ਵਿਚ 5 ਰੁਪਏ ਦੀ ਲਾਗਤ, 5 ਹਜ਼ਾਰ ਦੀ ਆਮਦਨ ਲਿਆ ਹੱਥ ਫੜਾਉਂਦੀ ਹੈ ਤੇ ਇਸ ਪੈਸੇ ਨਾਲ ਉਹ ਕਿਸੇ ਨੂੰ ਵੀ ਖ਼ਰੀਦ ਸਕਦੇ ਹਨ। ਗੁਜਰਾਤ ਵਿਚ ਅਡਾਨੀ ਦੇ ਅਫ਼ਸਰ ਜ਼ਰੂਰ ਇਸ ਦਾ ਹਿੱਸਾ ਹੋਣਗੇ ਜਿਵੇਂ ਪੰਜਾਬ ਦੇ ਬਾਰਡਰਾਂ ਤੇ ਬੈਠੇ ਜਵਾਨ ਵੀ ਕਈ ਵਾਰ ਇਸ ਵਪਾਰ ਦਾ ਹਿੱਸਾ ਬਣ ਜਾਂਦੇ ਹਨ। ਸਿਆਸਤਦਾਨ ਵੀ ਵੋਟਾਂ ਖ਼ਰੀਦਣ ਦੇ ਲਾਲਚ ਕਾਰਨ ਹੀ ਇਸ ਪੈਸੇ ਦੇ ਕਾਰੋਬਾਰੀਆਂ (ਤਸਕਰਾਂ) ਦੇ ਰਖਵਾਲੇ ਬਣ ਜਾਂਦੇ ਹਨ।
ਨਸ਼ੇ ਦਾ ਖ਼ਤਰਾ ਸੱਭ ਵਾਸਤੇ ਇਕੋ ਜਿਹਾ ਹੈ। ਉਹ ਸਿਆਸਤਦਾਨਾਂ, ਫ਼ੌਜੀ, ਪੁਲਿਸ ਅਫ਼ਸਰਾਂ ਦੇ ਘਰਾਂ ਵਿਚ ਵੀ ਤਬਾਹੀ ਮਚਾ ਸਕਦਾ ਹੈ। ਸ਼ਾਹਰੁਖ਼ ਖ਼ਾਨ ਦੇ ਬੇਟੇ ਨੂੰ 20 ਗ੍ਰਾਮ ਅਫ਼ੀਮ ਦੇ ਸ਼ੱਕ ਵਿਚ ਹੀ ਹਫ਼ਤਿਆਂ ਤਕ ਜੇਲ ਵਿਚ ਬੰਦ ਰਹਿਣਾ ਪਿਆ ਪਰ ਜਿਨ੍ਹਾਂ ਦੇ ਨਾਮ ਤਸਕਰੀ ਦੇ ਬਾਦਸ਼ਾਹ ਕਰ ਕੇ ਗੂੰਜਦੇ ਰਹਿੰਦੇ ਹਨ, ਉਹ ਅਜਿਹੇ ਪਰਚੇ ਦਰਜ ਕਰਨ ਨੂੰ ਸਿਆਸੀ ਦੁਸ਼ਮਣੀ ਆਖਦੇ ਹਨ।
Bikram Singh Majithia
ਜੇ ਬਿਕਰਮ ਮਜੀਠੀਆ ਅਪਣੇ ਆਪ ਨੂੰ ਬੇਕਸੂਰ ਸਮਝਦੇ ਹਨ ਤਾਂ ਉਨ੍ਹਾਂ ਨੇ ਉਸੇ ਦਿਨ ਅਪਣੇ ਆਪ ਨੂੰ ਜਾਂਚ ਲਈ ਪੇਸ਼ ਕਰ ਦੇਣਾ ਚਾਹੀਦਾ ਸੀ। ਅੱਜ ਵੀ ਉਨ੍ਹਾਂ ਦੇ ਲਾਪਤਾ ਹੋਣ ਕਾਰਨ ਉਨ੍ਹਾਂ ਤੇ ਲੱਗੇ ਇਲਜ਼ਾਮ ਲੋਕਾਂ ਨੂੰ ਸਹੀ ਲੱਗਣ ਲੱਗ ਪੈਣਗੇ। ਅਕਾਲੀ ਦਲ ਵਲੋਂ ਬਦਲੇ ਦੀ ਕਾਰਵਾਈ ਆਖ ਕੇ ਅਪਣੀ ਅਦਾਲਤੀ ਕਾਰਵਾਈ ਦਾ ਰਸਤਾ ਤਲਾਸ਼ਿਆ ਗਿਆ ਹੈ ਜਦਕਿ ਸੱਚਾ ਇਨਸਾਨ ਜਾਂਚ ਕਰਵਾ ਕੇ ਅਪਣੇ ਉਤੋਂ ਹਰ ਦਾਗ਼ ਉਤਾਰ ਦੇਣ ਲਈ ਕਾਹਲਾ ਪਿਆ ਹੁੰਦਾ ਹੈ।
CM Charanjit singh channi
ਅੱਜ ਲੋੜ ਇਸ ਗੱਲ ਦੀ ਹੈ ਕਿ ਨਸ਼ਾ ਤਸਕਰਾਂ ਦੀ ਪਹੁੰਚ ਸਾਡੇ ਸਿਆਸੀ ਲੋਕਾਂ ਤੇ ਅਫ਼ਸਰਸ਼ਾਹੀ ਤਕ ਨਾ ਹੋਵੇ ਤੇ ਨਿਰਪੱਖ ਤੇ ਤੇਜ਼ ਜਾਂਚ ਨਾਲ ਹੀ ਇਹ ਯਕੀਨੀ ਬਣਾਇਆ ਜਾ ਸਕਦਾ ਹੈ। ਜੇ ਕੋਈ ਇਸ ਵਿਚ ਸ਼ਾਮਲ ਸਾਬਤ ਹੁੰਦਾ ਹੈ ਤਾਂ ਉਸ ਲਈ ਸਜ਼ਾ ਏ ਮੌਤ ਤੋਂ ਘੱਟ ਨਾ ਮੰਗੋ ਤੇ ਇਹ ਨਾ ਵੇਖੋ ਕਿ ਉਹ ਕਿਸ ਪ੍ਰਵਾਰ ਤੋਂ ਹੈ। ਅੱਜ ਪਹਿਲੀ ਵਾਰ ਮੁੱਖ ਮੰਤਰੀ ਤੇ ਗ੍ਰਹਿ ਮੰਤਰੀ ਨੇ ਇਸ ਮਾਮਲੇ ਨੂੰ ਹੱਥ ਪਾਉਣ ਦਾ ਯਤਨ ਕੀਤਾ ਹੈ ਤੇ ਸਰਕਾਰ ਬਦਲ ਵੀ ਜਾਵੇ ਤਾਂ ਵੀ ਇਹ ਸੋਚ ਨਹੀਂ ਬਦਲਣੀ ਚਾਹੀਦੀ।
-ਨਿਮਰਤ ਕੌਰ
