ਹੁਣ ਜੋ ਕੋਵਿਡ ਨਾਲ ਹੋਇਆ ਹੈ, ਉਸ ਨੇ ਨਾ ਸਿਰਫ਼ ਸਾਡੀ ਸਿਹਤ ਤੇ ਅਸਰ ਪਾਇਆ ਹੈ, ਬਲਕਿ ਸਾਡੀ ਸੋਚ ਤੇ ਵੀ ਅਸਰ ਪਾਇਆ ਹੈ।
ਸ਼ਿਵ ਸੈਨਾ ਦੇ ਰਸਾਲੇ ‘ਸਾਮਨਾ’ ਦੀ ਸੰਪਾਦਕੀ ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਉਤੇ ਅਪਣੀ ਦੇਸ਼ ਦੀਆਂ ਸਿਹਤ ਸਹੂਲਤਾਂ ਬਾਰੇ ਚਿੰਤਾ ਕਰਨ ਨਾਲੋਂ ਜ਼ਿਆਦਾ ਭਾਜਪਾ ਦੀ ਛਵੀ ਬਾਰੇ ਚਿੰਤਾ ਕਰਨ ਦਾ ਦੋਸ਼ ਲਾਇਆ ਗਿਆ ਹੈ। ‘ਸਾਮਨਾ’ ਮੁਤਾਬਕ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਗ੍ਰਹਿ ਮੰਤਰੀ ਤੇ ਕੁੱਝ ਖ਼ਾਸਮ ਖ਼ਾਸ ਮੰਤਰੀਆਂ ਨਾਲ ਮੁਲਾਕਾਤ ਕੀਤੀ ਜਿਸ ਵਿਚ ਉਤਰ ਪ੍ਰਦੇਸ਼ ਦੀਆਂ ਚੋਣਾਂ ਬਾਰੇ ਚਿੰਤਾ ਪ੍ਰਗਟ ਕੀਤੀ ਗਈ ਤੇ ਇਹ ਜਾਣਨ ਦੀ ਕੋਸ਼ਿਸ਼ ਕੀਤੀ ਗਈ ਕਿ ਗ਼ਲਤੀ ਕਿਥੇ ਹੋਈ ਹੈ?
PM Modi
ਇਸ ਬਾਰੇ ਪਹਿਲਾਂ ਵੀ ਖ਼ਬਰ ਆਈ ਸੀ ਜਿਸ ਨੂੰ ਸਰਕਾਰ ਵਲੋਂ ਨਕਾਰ ਦਿਤਾ ਗਿਆ। ਜੇਕਰ ਅਜਿਹਾ ਕੋਈ ਮੰਥਨ ਹੋਇਆ ਵੀ ਹੈ ਜਿਸ ਵਿਚ ਵਿਚਾਰਿਆ ਗਿਆ ਕਿ ਕੋਵਿਡ ਕਾਲ ਵਿਚ ਸਰਕਾਰ ਦੀ ਨਾਕਾਮੀ ਨੂੰ ਕਿਸ ਤਰ੍ਹਾਂ ਸੁਧਾਰਿਆ ਜਾਵੇ ਤਾਂ ਇਸ ਵਿਚ ਗ਼ਲਤ ਤਾਂ ਕੁੱਝ ਨਹੀਂ ਸੀ। ਜੇ ਇਸ ਵਿਚ ਉਤਰ ਪ੍ਰਦੇਸ਼ ਦੀਆਂ ਚੋਣਾਂ ਕਾਰਨ ਹੀ ਸਰਕਾਰ ਹਰਕਤ ਵਿਚ ਆਈ ਹੈ ਤਾਂ ਕੋਈ ਹੈਰਾਨੀ ਦੀ ਗੱਲ ਵੀ ਨਹੀਂ। ਸਾਡੇ ਭਾਰਤੀ ਸਿਸਟਮ ਵਿਚ ਸਿਆਸਤਦਾਨ ਨੂੰ ਵੋਟਾਂ ਵੇਲੇ ਹੀ ਹੋਸ਼ ਆਉਂਦੀ ਹੈ।
Rahul Gandhi
ਰਾਹੁਲ ਗਾਂਧੀ ਵਲ ਹੀ ਵੇਖੋ, ਜਦ ਵੋਟਾਂ ਪੈਣੀਆਂ ਸੀ ਤਾਂ ਅਸਾਮ ਦੇ ਬਾਗ਼ਾਂ ਵਿਚ ਚਾਹ ਚੁਗਦੇ ਹੋਏ ਗਾਂਧੀ ਭੈਣ-ਭਰਾ ਨਜ਼ਰ ਆ ਰਹੇ ਸਨ ਤੇ ਅੱਜ ਜਦ ਪੰਜਾਬ ਵਿਚ ਕਾਂਗਰਸ ਦਾ ਇਕ ਬਚਦਾ ਕਿਲ੍ਹਾ ਵੀ ਕਈਆਂ ਨੂੰ ਢਹਿੰਦਾ ਨਜ਼ਰ ਆ ਰਿਹਾ ਹੈ ਤਾਂ ਰਾਹੁਲ-ਪ੍ਰਿਯੰਕਾ ਕੋਲ ਪੰਜਾਬ ਲਈ ਸਮਾਂ ਹੀ ਕੋਈ ਨਹੀਂ। ਪੰਜਾਬ ਦੇ ਕਾਂਗਰਸੀ ਆਗੂ ਤਾਂ ਖੁਲ੍ਹ ਕੇ ਆਖ ਰਹੇ ਹਨ ਕਿ 2022 ਦੀਆਂ ਚੋਣਾਂ ਨੇੜੇ ਹਨ ਤੇ ਉਨ੍ਹਾਂ ਨੇ ਵੋਟਾਂ ਮੰਗਣ ਲਈ ਲੋਕਾਂ ਕੋਲ ਜਾਣਾ ਹੈ। ਸੋ ਉਹ ਸਰਕਾਰ ਦੇ ਸਾਢੇ ਚਾਰ ਸਾਲ ਪਹਿਲਾਂ ਕੀਤੇ ਵਾਅਦੇ ਯਾਦ ਕਰਵਾਉਣ ਲੱਗ ਪਏ ਹਨ।
Punjab Congress
ਕੇਂਦਰ ਸਰਕਾਰ ਨੂੰ ਵੀ ਹੁਣ ਕੋਵਿਡ-19 ਵਿਚ ਅਪਣੀ ਛਵੀ ਸੁਧਾਰਨ ਦੀ ਚਿੰਤਾ ਹੋਣ ਲੱਗ ਪਈ ਹੈ। ਪੰਜਾਬ ਸਰਕਾਰ ਨੇ ਨਵੀਂ ਐਸ.ਆਈ.ਟੀ. ਬਣਾ ਦਿਤੀ ਹੈ ਤੇ ਇਸੇ ਤਰ੍ਹਾਂ ਸਾਰੇ ਹੀ ਸਿਆਸਤਦਾਨ, ਕੁੱਝ ਨਾ ਕੁੱਝ ਕਰ ਕੇ ਅਪਣੀ ਛਵੀ ਸੁਧਾਰਨ ਦੇ ਆਹਰੇ ਲੱਗ ਗਏ ਹਨ। ਪਰ ਕੀ ਗ਼ਲਤੀ ਸਿਰਫ਼ ਉਨ੍ਹਾਂ ਦੀ ਹੀ ਹੈ? ਬਤੌਰ ਵੋਟਰ ਤੁਸੀਂ ਵੀ ਅਪਣੀ ਵੋਟ ਪਾਉਣ ਦੀ ਪ੍ਰਕਿਰਿਆ ਨੂੰ ਗ਼ੌਰ ਨਾਲ ਟਟੋਲੋ।
Captain Amarinder Singh
ਤੁਸੀਂ ਵੀ ਇਸ ਗੱਲ ਦੇ ਆਦੀ ਹੋ ਗਏ ਹੋ ਕਿ ਸਰਕਾਰ ਤਾਂ ਆਖ਼ਰੀ ਅਥਵਾ ਚੌਥੇ ਸਾਲ ਵਿਚ ਹੀ ਅਪਣੇ ਕੰਮਾਂ ਦੀ ਰਫ਼ਤਾਰ ਤੇਜ਼ ਕਰਦੀ ਹੀ ਹੈ ਤੇ ਵੋਟਰ ਵੀ ਝੱਟ ਏਨੇ ਨਾਲ ਹੀ ਜਾਂ ਮੁਫ਼ਤ ਜਾਂ ਸਸਤੀਆਂ ਚੀਜ਼ਾਂ ਲੇ ਕੇ ਹੀ ਖ਼ੁਸ਼ ਹੋ ਜਾਂਦਾ ਹੈ। ਇਹ ਛੋਟੀਆਂ ਛੋਟੀਆਂ ‘ਮਿਹਰਬਾਨੀਆਂ’ ਹੀ ਉਸ ਨੂੰ ਤ੍ਰਿਪਤ ਕਰ ਦੇਂਦੀਆਂ ਹਨ। ਕੋਈ ਕਹੇਗਾ ਚਲੋ! ਇਸ ਸਿਆਸਤਦਾਨ ਨੇ ਮੇਰੇ ਘਰ ਦੇ ਬਾਹਰ ਸੜਕ ਬਣਾ ਦਿਤੀ ਜਾਂ ਇਸ ਨੇ ਮੇਰੀ ਫ਼ਾਈਲ ਪਾਸ ਕਰਵਾ ਦਿਤੀ ਜਾਂ ਮੇਰੇ ਉਤੇ ਚਲਦੇ ਕੇਸ ਨੂੰ ਬੰਦ ਕਰ ਦਿਤਾ ਜਾਂ ਸਰਕਾਰੀ ਨੌਕਰੀ ਦਿਵਾ ਦਿਤੀ, ਸੋ ਇਨ੍ਹਾਂ ਨੂੰ ਹੀ ਵੋਟ ਪਾ ਦਿਉ। ਸਿਆਸਤਦਾਨ ਵੀ ਵੋਟਰ ਦੀ ਇਸ ਮਾਨਸਿਕਤਾ ਨੂੰ ਵੇਖ ਪਰਖ ਕੇ ਹੀ ਅਪਣੀ ਚੋਣ ਰਣਨੀਤੀ ਤਿਆਰ ਕਰਦਾ ਹੈ।
Corona Virus
ਹੁਣ ਜੋ ਕੋਵਿਡ ਨਾਲ ਹੋਇਆ ਹੈ, ਉਸ ਨੇ ਨਾ ਸਿਰਫ਼ ਸਾਡੀ ਸਿਹਤ ਤੇ ਅਸਰ ਪਾਇਆ ਹੈ, ਬਲਕਿ ਸਾਡੀ ਸੋਚ ਤੇ ਵੀ ਅਸਰ ਪਾਇਆ ਹੈ। ਜੇ ਇਹ ਦੂਜੀ ਲਹਿਰ ਨਾ ਆਉਂਦੀ ਤਾਂ ਕੀ ਭਾਰਤ ਕਦੇ ਸੋਚਦਾ ਵੀ ਕਿ ਸਾਡੀਆਂ ਸਿਹਤ ਸਹੂਲਤਾਂ ਵਿਚ ਸੁਧਾਰ ਲਿਆਉਣ ਦੀ ਲੋੜ ਵੀ ਹੈ? ਦੂਜੀ ਲਹਿਰ ਤੋਂ ਬਿਨਾਂ, ਆਮ ਸ਼ਹਿਰੀ ਨੂੰ ਐਂਬੂਲੈਂਸ ਦੀ ਘਾਟ ਦਾ ਅਸਰ ਮਹਿਸੂਸ ਹੀ ਨਾ ਹੁੰਦਾ। ਅੱਜ ਦੇਸ਼ ਵਿਚ ਹਰ ਕੋਈ ਸੋਚ ਰਿਹਾ ਹੈ ਕਿ ਜੇ ਇਨ੍ਹਾਂ ਸਮਾਰਟ ਸ਼ਹਿਰਾਂ ਵਿਚ ਸਾਡਾ ਇਹ ਹਾਲ ਹੈ, ਤਾਂ ਫਿਰ ਵਿਕਾਸ ਕਿਥੇ ਹੋ ਰਿਹਾ ਹੈ?
Corona case
ਅੱਜ ਕਈ ਲੋਕ ਨਰਾਜ਼ ਹੋ ਰਹੇ ਹਨ ਕਿ ਵਿਦੇਸ਼ੀ ਮੀਡੀਆ ਭਾਰਤ ਦੀ ਛਵੀ ਵਿਗਾੜ ਰਿਹਾ ਹੈ, ਪਰ ਜੇ ਉਹ ਤੁਹਾਡੀਆਂ ਸਿਹਤ ਸਹੂਲਤਾਂ ਤੇ ਤੁਹਾਡੇ ਸਿਆਸਤਦਾਨਾਂ ਦਾ ਸੱਚ ਨਾ ਪੇਸ਼ ਕਰੇ ਤਾਂ ਕੀ ਬਦਲਾਅ ਆ ਜਾਵੇਗਾ? ਜੇ ਅੱਜ ਵਿਦੇਸ਼ੀ ਮੀਡੀਆ ਅਤੇ ਸੋਸ਼ਲ ਮੀਡੀਆ ਤੇ ਬੈਠੇ ਪੱਤਰਕਾਰ ਵਾਹ-ਵਾਹ ਕਰ ਕੇ ਸਰਕਾਰਾਂ ਨੂੰ ਖ਼ੁਸ਼ ਕਰਦੇ ਰਹਿਣਗੇ ਤਾਂ ਕੀ ਸਰਕਾਰ ਮੰਥਨ ਵੀ ਕਰੇਗੀ? ਬੰਗਾਲ ਚੋਣਾਂ ਵਿਚ ਜੇ ਭਾਜਪਾ ਨੂੰ ਹਾਰ ਹੋਈ ਹੈ, ਉਹ ਸਿਰਫ਼ ਮੀਡੀਆ ਕਾਰਨ ਨਹੀਂ ਬਲਕਿ ਉਹ ਉਸ ਜ਼ਮੀਨੀ ਸੱਚ ਕਾਰਨ ਹੋਈ ਜਿਸ ਦਾ ਪ੍ਰਚਾਰ ਮੀਡੀਆ ਨੇ ਕੀਤਾ। ਅਸਲੀਅਤ ਇਹ ਹੈ ਕਿ ਆਮ ਭਾਰਤੀ ਨਾ ਸਿਰਫ਼ ਕੋਵਿਡ ਤੋਂ ਬਲਕਿ ਸਰਕਾਰ ਦੀ ਤਾਨਾਸ਼ਹੀ ਤੋਂ ਵੀ ਥੱਕ ਚੁੱਕਾ ਹੈ।
Farmers
ਲੋਕਾਂ ਵਿਚ ਕਿਸਾਨਾਂ ਪ੍ਰਤੀ ਹਮਦਰਦੀ ਵੀ ਹੈ ਤੇ ਕਾਲੇ ਕਾਨੂੰਨਾਂ ਤੋਂ ਡਰ ਵੀ ਹੈ। ਨੋਟਬੰਦੀ, ਜੀ.ਐਸ.ਟੀ., ਧਾਰਾ 370, ਸੀ.ਏ.ਏ. ਤੇ ਹੁਣ ਖੇਤੀ ਕਾਨੂੰਨਾਂ ਤੋਂ ਸਾਫ਼ ਹੈ ਕਿ ਸਰਕਾਰ ਦਾ ਤਾਨਾਸ਼ਾਹੀ ਰਵਈਆ ਵਧਦਾ ਹੀ ਜਾ ਰਿਹਾ ਹੈ ਕਿਉਂਕਿ ਪਹਿਲਾਂ ਸਾਰੇ ਕਾਨੂੰਨ ਸਿਰ ਝੁਕਾਅ ਕੇ ਮੰਨੇ ਜਾਂਦੇ ਰਹੇ ਤੇ ਸਰਕਾਰ ਅੱਗੇ ਚਲਦੀ ਗਈ। ਕਿਸਾਨਾਂ ਦੇ ਹੌਸਲੇ ਨਾਲ ਚੋਣਾਂ ਦੇ ਨਤੀਜੇ ਵੀ ਬਦਲੇ ਤੇ ਹੁਣ ਆਮ ਭਾਰਤੀ ਅਪਣੀ ਆਵਾਜ਼ ਚੁਕ ਰਿਹਾ ਹੈ। ਸਿਆਸਤਦਾਨ ਨਵੇਂ ਨਹੀਂ ਚਾਹੀਦੇ, ਬਲਕਿ ਸੋਚ ਨਵੀਂ ਚਾਹੀਦੀ ਹੈ। ਲੋਕਾਂ ਨੂੰ ਅਪਣੇ ਚੁਣੇ ਜਾਣ ਵਾਲੇ ਪ੍ਰਤੀਨਿਧਾਂ ਨੂੰ ਪਰਖਣ ਵਾਲੀ ਸੋਚ ਬਦਲਣੀ ਪਵੇਗੀ। ਤਾਂ ਫਿਰ ਸਿਆਸਤਦਾਨਾਂ ਦਾ ਮੰਥਨ ਵੀ ਵੋਟਾਂ ਵਾਸਤੇ ਨਹੀਂ ਬਲਕਿ ਸਹੀ ਰਾਜ ਪ੍ਰਬੰਧ ਦੇਣ ਵਾਸਤੇ ਹੋਣਾ ਸ਼ੁਰੂ ਹੋ ਜਾਵੇਗਾ। -ਨਿਮਰਤ ਕੌਰ
