ਮੈਂ ਬੇਸ਼ੱਕ ਅਪਾਹਜ ਹਾਂ ਪਰ ਮੇਰੀ ਹਿੰਮਤ ਅਪਾਹਜ ਨਹੀਂ
ਚੰਡੀਗੜ੍ਹ: ਇਨਸਾਨ ਬੇਸ਼ੱਕ ਅਪਾਹਜ ਹੋਵੇ ਪਰ ਉਸ ਦੀ ਸੋਚ ਅਪਾਹਜ ਨਹੀਂ ਹੋਣੀ ਚਾਹੀਦੀ। ਜੇਕਰ ਇਨਸਾਨ ਦੀ ਸੋਚ ਗੰਦੀ ਹੈ ਤਾਂ ਉਸ ਦਾ ਨਰੋਆ ਸਰੀਰ ਵੀ ਵਿਅਰਥ ਹੈ ਪਰ ਜੇਕਰ ਸੋਚ ਮਹਾਨ ਹੋਵੇ ਤਾਂ ਉਹ ਸਰੀਰ ਅਨਮੋਲ ਹੈ। ਅੱਜ ਤੁਹਾਨੂੰ ਦੱਸਣ ਜਾ ਰਹੇ ਹਾਂ ਇਕ ਅਜਿਹੇ ਸ਼ਖ਼ਸ ਦੇ ਬਾਰੇ ਜਿਸ ਦੀ ਸੋਚ ਅਤੇ ਦੁਨੀਆਂ ਦੇ ਰੰਗਾਂ ਨੂੰ ਵੇਖਣ ਦਾ ਨਜ਼ਰੀਆ ਬਹੁਤ ਵੱਖਰਾ ਹੈ ਤੇ ਜਿਸ ਦੇ ਬਾਰੇ ਸੁਣ ਕੇ ਤੁਸੀਂ ਵੀ ਹੈਰਾਨ ਰਹਿ ਜਾਓਗੇ।
Kulwant Singh
ਗੱਲ ਕਰਾਂਗੇ ਲੁਧਿਆਣਾ ਦੇ ਨਿਵਾਸੀ ਕੁਲਵੰਤ ਸਿੰਘ ਵਿੱਕੀ ਦੀ, ਜੋ ਖ਼ੁਦ ਸਰੀਰਕ ਪੱਖੋਂ ਅਪਾਹਜ ਹੈ। ਪਿਤਾ ਦੀ ਮੌਤ ਹੋਣ ਤੋਂ ਬਾਅਦ ਪਰਵਾਰ ਦਾ ਸਾਰਾ ਭਾਰ ਉਸ ਦੇ ਤੇ ਉਸ ਦੇ ਭਰਾ ਦੇ ਮੋਢਿਆਂ ’ਤੇ ਆ ਗਿਆ। ਉਹ ਅਪਣੇ ਭਰਾ ਦੇ ਨਾਲ ਮਿਲ ਕੇ ਪਰਵਾਰ ਦਾ ਗੁਜ਼ਾਰਾ ਚਲਾਉਂਦਾ ਹੈ। ਕੁਲਵੰਤ ਸਿੰਘ ਸੜਕਾਂ ਉਤੇ ਪੈਦਲ ਚੱਲ ਕੇ ਬੱਚਿਆਂ ਦੇ ਖਿਡੌਣੇ ਵੇਚਣ ਦਾ ਕੰਮ ਕਰਦਾ ਹੈ ਤੇ ਉਹ ਕਦੇ ਲੁਧਿਆਣਾ ਅਤੇ ਕਦੇ ਚੰਡੀਗੜ੍ਹ ਵਿਚ ਸੜਕਾਂ ਉਤੇ ਸਮਾਨ ਵੇਚਦਾ ਹੈ।
Kulwant Singh
ਕੁਲਵੰਤ ਸਿੰਘ ਦੀ ‘ਸਪੋਕਸਮੈਨ ਟੀਵੀ’ ਵਲੋਂ ਕੀਤੀ ਗਈ ਇਕ ਖ਼ਾਸ ਇੰਟਰਵਿਊ ਦੌਰਾਨ ਉਸ ਨੇ ਦੱਸਿਆ ਕਿ ਉਸ ਦੇ ਲਈ ਅਪਣੀ ਸਿੱਖੀ ਤੋਂ ਉੱਪਰ ਕੁਝ ਵੀ ਨਹੀਂ ਹੈ ਤੇ ਉਹ ਜਿਉਂਦੇ ਜੀਅ ਅਪਣੀ ਸਿੱਖੀ ਨੂੰ ਦਾਗ ਨਹੀਂ ਲਗਾ ਸਕਦਾ। ਉਨ੍ਹਾਂ ਨੇ ਕਿਹਾ ਕਿ ਉਹ ਬੇਸ਼ੱਕ ਅਪਾਹਜ ਹੈ ਪਰ ਉਸ ਨੇ ਕਦੇ ਵੀ ਹਿੰਮਤ ਨਹੀਂ ਛੱਡੀ। ਉਹ ਭੀਖ ਮੰਗਣ ਨਾਲੋਂ ਮਿਹਨਤ ਦੀ ਰੋਟੀ ਵਿਚ ਵਿਸ਼ਵਾਸ ਰੱਖਦਾ ਹੈ।
Kulwant Singh
ਅਪਣੇ ਰੋਜ਼ਾਨਾ ਦੀ ਜ਼ਿੰਦਗੀ ਵਿਚ ਆਉਣ ਵਾਲੀਆਂ ਚੁਣੌਤੀਆਂ ਬਾਰੇ ਦੱਸਦੇ ਹੋਏ ਕੁਲਵੰਤ ਨੇ ਦੱਸਿਆ ਕਿ ਉਸ ਨੂੰ ਕਈ ਵਾਰ ਲੋਕਾਂ ਵਲੋਂ ਅਤੇ ਪੁਲਿਸ ਵਲੋਂ ਅਜਿਹਾ ਕਰਨ ਤੋਂ ਰੋਕਿਆ ਗਿਆ ਪਰ ਉਸ ਨੇ ਕਦੇ ਵੀ ਹਾਰ ਨਹੀਂ ਕਬੂਲੀ। ਉਹ ਅਪਣੇ ਪਰਵਾਰ ਦਾ ਗੁਜ਼ਾਰਾ ਚਲਾਉਣ ਲਈ ਕਿਸੇ ਅੱਗੇ ਹੱਥ ਨਹੀਂ ਫੈਲਾ ਸਕਦਾ। ਇਸ ਲਈ ਉਹ ਮਿਹਨਤ ਕਰਕੇ ਖੁਸ਼ ਹੈ।
Kulwant Singh on Spokesman tv
ਇਹ ਸੀ ਇਕ ਅਜਿਹੇ ਸ਼ਖ਼ਸ ਦੀ ਕਹਾਣੀ ਜੋ ਕਈਆਂ ਲਈ ਗਰੀਬ ਹੈ ਤੇ ਕਈਆਂ ਲਈ ਅਪਾਹਜ ਪਰ ਅਸਲ ਵਿਚ ਕੁਲਵੰਤ ਸਿੰਘ ਨਾ ਤਾਂ ਗਰੀਬ ਹੈ ਤੇ ਨਾ ਹੀ ਅਪਾਹਜ ਕਿਉਂਕਿ ਸਭ ਤੋਂ ਕੀਮਤੀ ਚੀਜ਼ਾਂ ਹਿੰਮਤ, ਜਜ਼ਬਾ ਤੇ ਜਨੂੰਨ ਹਨ ਜੋ ਕੁਲਵੰਤ ਸਿੰਘ ਕੋਲ ਹਨ।
