ਹਾਈ ਕੋਰਟ ਦੇ ਫ਼ੈਸਲੇ ਨਾਲ ਹੋਰ ਪੀੜਤਾਂ ਤੇ ਉਨ੍ਹਾਂ ਦੇ ਵਕੀਲਾਂ ਨੂੰ ਵੀ ਆਸ ਬੱਝੀ, ਪਰ ਟਾਈਟਲਰ ਦੇ ਵਕੀਲਾਂ ਦਾ ਦਾਅਵਾ ਕਿ ਉਸ ਵਿਰੁਧ ਕੋਈ ਮਾਮਲਾ ਹੀ ਨਹੀਂ ਬਣਦਾ.......
ਨਵੀਂ ਦਿੱਲੀ : ਸਿੱਖ ਕਤਲੇਆਮ ਮਾਮਲੇ ਵਿਚ ਕਾਂਗਰਸ ਦੇ ਸਾਬਕਾ ਨੇਤਾ ਸੱਜਣ ਕੁਮਾਰ ਨੂੰ ਦੋਸ਼ੀ ਠਹਿਰਾਏ ਜਾਣ ਤੋਂ ਬਾਅਦ ਪੀੜਤਾਂ ਦੀ ਪੈਰਵੀਂ ਕਰਨ ਵਾਲੇ ਵਕੀਲਾਂ ਨੂੰ ਜਗਦੀਸ਼ ਟਾਈਟਲਰ ਵਿਰੁਧ ਮਾਮਲੇ ਵਿਚ 'ਦਿਲਚਸਪ ਮੋੜ' ਆਉਣ ਦੀ ਉਮੀਦ ਹੈ ਜਿਨ੍ਹਾਂ ਨੂੰ ਸੀਬੀਆਈ ਕਲੀਨਚਿਟ ਦੇ ਚੁਕੀ ਹੈ। ਇਨ੍ਹਾਂ ਵਕੀਲਾਂ ਦਾ ਕਹਿਣਾ ਹੈ ਕਿ ਟਾਈਟਲਰ ਵਿਰੁਧ ਇਨਸਾਫ਼ ਦਾ ਪਹੀਆ ਘੁੰਮਣ ਲੱਗਿਆ ਹੈ ਅਤੇ ਵਿਵਾਦਤ ਕਾਰੋਬਾਰੀ ਅਭਿਸ਼ੇਕ ਵਰਮਾ 'ਤੇ ਝੂਠ ਫੜਨ ਵਾਲੀ ਜਾਂਚ ਦੀ ਰੀਪੋਰਟ ਦਾ ਇੰਤਜ਼ਾਰ ਕਰ ਰਹੇ ਹਨ।
ਵਰਮਾ ਗਵਾਹ ਦੇ ਤੌਰ 'ਤੇ ਟਾਈਟਲਰ ਵਿਰੁਧ ਮਾਮਲੇ ਦਾ ਸਮਰਥਨ ਕਰਨਾ ਚਾਹੁੰਦੇ ਹਨ। ਟਾਈਟਲਰ ਵਿਰੁਧ ਮਾਮਲੇ ਵਿਚ ਸਿੱਖ ਕਤਲੇਆਮ ਪੀੜਤਾਂ ਦੀ ਪੈਰਵੀਂ ਕਰਨ ਵਾਲੇ ਐਚ.ਐਸ. ਫੂਲਕਾ ਅਤੇ ਵਕੀਲ ਕਾਮਨਾ ਵੋਹਰਾ ਨੇ ਕਿਹਾ ਕਿ ਜਿਸ ਤਰ੍ਹਾਂ ਦਿੱਲੀ ਹਾਈ ਕੋਰਟ ਨੇ ਸਿੱਖ ਕਤਲੇਆਮ ਮਾਮਲੇ ਵਿਚ ਸੱਜਣ ਕੁਮਾਰ ਨੂੰ ਦੋਸ਼ੀ ਠਹਿਰਾਇਆ ਹੈ, ਉਮੀਦ ਹੈ ਕਿ ਉਨ੍ਹਾਂ ਨੂੰ ਵੀ ਇਨਸਾਫ਼ ਮਿਲੇਗਾ। ਫੂਲਕਾ ਨੇ ਕਿਹਾ ਕਿ ਸਿੱਖ ਕਤਲੇਆਮ ਦੇ ਦੂਜੇ ਮਾਮਲੇ ਵਿਚ ਸੱਜਣ ਕੁਮਾਰ ਦੀ ਸਜ਼ਾ ਤੋਂ ਬਾਅਦ ਉਨ੍ਹਾਂ ਦੀਆਂ ਉਮੀਦਾਂ ਹੋਰ ਵੱਧ ਗਈਆਂ ਹਨ।
H. S. Phoolka
ਉਨ੍ਹਾਂ ਕਿਹਾ,''ਇਹ ਸਾਡੇ ਲਈ ਇਕ ਜ਼ਬਰਦਸਤ ਉਪਲਬੱਧੀ ਹੈ। ਇਸ ਫ਼ੈਸਲੇ ਨੇ ਦੂਜੇ ਲੋਕਾਂ ਵਿਰੁਧ ਸਾਡੇ ਮਾਮਲੇ ਨੂੰ ਜ਼ਿਆਦਾ ਮਜ਼ਬੂਤ ਬਣਾ ਦਿਤਾ ਹੈ।''ਵਕੀਲ ਕਾਮਨਾ ਵੋਹਰਾ ਨੇ ਭਾਸ਼ਾ ਨੂੰ ਕਿਹਾ,''ਹੁਣ (ਟਾਈਟਲਰ ਦੇ) ਮਾਮਲੇ ਵਿਚ ਥੋੜ੍ਹਾ ਦਿਲਚਸਪ ਮੌੜ ਆ ਸਕਦਾ ਹੈ।'' ਕਾਂਗਰਸ ਨੇਤਾ ਟਾਈਟਲਰ ਨੇ ਸਿੱਖ ਕਤਲੇਆਮ ਵਿਚ ਅਪਣੀ ਭੂਮਿਕਾ ਤੋਂ ਹਮੇਸ਼ਾ ਇਨਕਾਰ ਕੀਤਾ ਹੈ। ਸੀਬੀਆਈ ਉਨ੍ਹਾਂ ਨੂੰ ਤਿੰਨ ਵਾਰ ਕਲੀਨਚਿਟ ਦੇ ਚੁਕੀ ਹੈ ਪ੍ਰੰਤੂ ਅਦਾਲਤ ਨੇ ਮਾਮਲਾ ਬੰਦ ਕਰਨ ਦੀ ਰੀਪੋਰਟ ਸਵੀਕਾਰ ਕਰਨ ਤੋਂ ਇਨਕਾਰ ਕਰ ਦਿਤਾ ਸੀ ਅਤੇ ਏਜੰਸੀ ਨੂੰ ਅੱਗੇ ਮਾਮਲੇ ਦੀ ਜਾਂਚ ਕਰਨ ਅਤੇ ਸਥਿਤੀ ਰੀਪੋਰਟ ਸੌਂਪਣ ਦਾ ਨਿਰਦੇਸ਼ ਦਿਤਾ ਸੀ।
ਵਰਮਾ ਦਾ ਲਾਈ ਡਿਟੇਕਟਰ ਟੈਸਟ ਹੋ ਚੁਕਿਆ ਹੈ ਅਤੇ ਕਾਂਗਰਸ ਨੇਤਾ ਨੇ ਇਸ ਤੋਂ ਇਨਕਾਰ ਕਰ ਦਿਤਾ ਸੀ। ਵਰਮਾ ਨੇ ਦਾਅਵਾ ਕੀਤਾ ਸੀ ਕਿ ਟਾਈਟਲਰ ਨੇ ਪੁਲਬੰਗਸ਼ ਮਾਮਲੇ ਨਾਲ ਜੁੜੇ ਘਟਨਾਕ੍ਰਮ ਦੇ ਬਾਰੇ ਵਿਚ ਉਸ ਨੂੰ ਦਸਿਆ ਸੀ। ਫ਼ਿਲਹਾਲ ਟਾਈਟਲਰ ਦੇ ਵਕੀਲ ਅਰੁਣਾਭ ਚੌਧਰੀ ਨੇ ਕਿਹਾ ਕਿ ਕਾਂਗਰਸ ਨੇਤਾ ਵਿਰੁਧ ਕੋਈ ਮਾਮਲਾ ਨਹੀਂ ਹੈ ਅਤੇ ਸੀਬੀਆਈ ਮਾਮਲੇ ਦੀ ਪੂਰੀ ਜਾਂਚ ਤੋਂ ਬਾਅਦ ਤਿੰਨ ਵਾਰ ਕਲੋਜਰ ਰੀਪੋਰਟ ਦੇ ਚੁਕੀ ਹੈ।
Kamna Vohra
ਉਨ੍ਹਾਂ ਕਿਹਾ,''ਐਡੀਸ਼ਨਲ ਮੁੱਖ ਮੈਟ੍ਰੋਪੋਲਿਟਨ ਜੱਜ ਨੇ ਮਾਮਲੇ ਵਿਚ ਅੱਗੇ ਜਾਂਚ ਦੇ ਨਿਰਦੇਸ਼ ਦਿਤੇ ਸੀ। ਸਾਨੂੰ ਨਹੀਂ ਪਤਾ ਕੀ ਚਲ ਰਿਹਾ ਹੈ। ਉਨ੍ਹਾਂ ਵਿਰੁਧ ਕੋਈ ਮਾਮਲਾ ਨਹੀਂ ਹੈ। ਸੀਬੀਆਈ ਨੇ ਕਿਹਾ ਹੈ ਕਿ ਟਾਈਟਲਰ ਵਿਰੁਧ ਕੋਈ ਭਰੋਸੇਯੋਗ ਗਵਾਹ ਨਹੀਂ ਹੈ। ਸੀਬੀਆਈ ਨੇ ਮਾਮਲੇ ਦੀ ਪੂਰੀ ਜਾਂਚ ਪੜਤਾਲ ਕੀਤੀ ਹੈ।'' (ਪੀ.ਟੀ.ਆਈ)
