Ajay Devgn's brother Anil Devgan passes away

ਮੁੰਬਈ:  ਬਾਲੀਵੁੱਡ ਅਦਾਕਾਰ ਅਜੇ ਦੇਵਗਨ ਦੇ ਭਰਾ ਅਨਿਲ ਦੇਵਗਨ ਇਸ ਦੁਨੀਆਂ ਨੂੰ ਅਲਵਿਦਾ ਕਹਿ ਗਏ ਹਨ। ਇਸ ਖ਼ਬਰ ਦੀ ਪੁਸ਼ਟੀ ਖੁਦ ਅਜੇ ਦੇਵਗਨ ਨੇ ਕੀਤੀ ਹੈ। ਅਜੇ ਦੇਵਗਨ ਨੇ ਸੋਸ਼ਲ ਮੀਡੀਆ ਜ਼ਰੀਏ ਅਪਣੇ ਭਰਾ ਅਨਿਲ ਦੇਵਗਨ ਦੀ ਤਸਵੀਰ ਨੂੰ ਸਾਂਝੀ ਕਰਦਿਆਂ ਇਕ ਭਾਵੁਕ ਮੈਸੇਜ ਲਿਖਿਆ। ਹਾਲਾਂਕਿ ਇਸ ਪੋਸਟ ਵਿਚ ਅਦਾਕਾਰ ਨੇ ਅਪਣੇ ਭਰਾ ਦੀ ਮੌਤ ਦੇ ਕਾਰਨ ਬਾਰੇ ਕੋਈ ਖੁਲਾਸਾ ਨਹੀਂ ਕੀਤਾ ਹੈ।

ਅਜੇ ਦੇਵਗਨ ਦੇ ਭਰਾ ਦੀ ਮੌਤ ਤੋਂ ਬਾਅਦ ਬਾਲੀਵੁੱਡ ਵਿਚ ਸੋਗ ਦੀ ਲਹਿਰ ਹੈ। ਅਜੇ ਦੇਵਗਨ ਨੇ ਅਪਣੇ ਅਧਿਕਾਰਤ ਫੇਸਬੁੱਕ ਅਤੇ ਟਵਿਟਰ ਅਕਾਊਂਟ ‘ਤੇ ਅਪਣੇ ਭਰਾ ਅਨਿਲ ਦੇਵਗਨ ਦੀ ਤਸਵੀਰ ਸਾਂਝੀ ਕੀਤੀ ਅਤੇ ਲਿਖਿਆ, ‘ਬੀਤੀ ਰਾਤ ਮੈਂ ਅਪਣੇ ਭਰਾ ਨੂੰ ਖੋ ਦਿੱਤਾ। ਉਹਨਾਂ ਦੀ ਅਚਾਨਕ ਮੌਤ ਸਾਡੇ ਪਰਿਵਾਰ ਨੂੰ ਤੋੜ ਰੱਖਣ ਵਾਲੀ ਹੈ। ADFF ਅਤੇ ਮੈਂ ਉਹਨਾਂ ਨੂੰ ਬਹੁਤ ਯਾਦ ਕਰਾਂਗੇ। ਉਹਨਾਂ ਦੀ ਆਤਮਾ ਦੀ ਸ਼ਾਂਤੀ ਲਈ ਪ੍ਰਾਰਥਨਾ ਕਰਨਾ’।

ਇਸ ਤੋਂ ਅੱਗੇ ਅਜੇ ਦੇਵਗਨ ਨੇ ਲਿਖਿਆ, ‘ਇਸ ਮਹਾਂਮਾਰੀ ਕਾਰਨ ਅਸੀਂ ਸ਼ੌਕ ਸਭਾ ਨਹੀਂ ਰੱਖ ਸਕਾਂਗੇ’। ਅਜੇ ਦੇਵਗਨ ਦੀ ਇਸ ਪੋਸਟ ‘ਤੇ ਹਰ ਕੋਈ ਦੁੱਖ ਜ਼ਾਹਿਰ ਕਰ ਰਿਹਾ ਹੈ। ਆਮ ਲੋਕਾਂ ਤੋਂ ਇਲਾਵਾ ਬਾਲੀਵੁੱਡ ਸਿਤਾਰੇ ਵੀ ਅਨਿਲ ਦੇਵਗਨ ਦੇ ਦੇਹਾਂਤ ‘ਤੇ ਦੁੱਖ ਜ਼ਾਹਿਰ ਕਰ ਰਹੇ ਹਨ।

ਅਨਿਲ ਦੇਵਗਨ ਦੀ ਮੌਤ ਬਾਲੀਵੁੱਡ ਜਗਤ ਲਈ ਇਕ ਵੱਡਾ ਝਟਕਾ ਹੈ। ਦੱਸ ਦਈਏ ਕਿ ਅਨਿਲ ਦੇਵਗਨ ਨੇ ਬਾਲੀਵੁੱਡ ਵਿਚ ਕਈ ਮਸ਼ਹੂਰ ਫਿਲਮਾਂ ਦਾ ਨਿਰਦੇਸ਼ਨ ਕੀਤਾ ਹੈ। ਉਹਨਾਂ ਨੇ ਰਾਜੂ ਚਾਚਾ, ਬਲੈਕਮੇਲ ਅਤੇ ਹਾਲ-ਏ-ਦਿਲ ਆਦਿ ਫਿਲਮਾਂ ਦਾ ਨਿਰਦੇਸ਼ਨ ਕੀਤਾ ਹੈ। ਉਹ ਅਜੇ ਦੇਵਗਨ ਦੀ ਫਿਲਮ ‘ਸਨ ਆਫ ਸਰਦਾਰ’ ਦੇ ਕ੍ਰਿਏਟਿਵ ਡਾਇਰੈਕਟਰ ਵੀ ਰਹਿ ਚੁੱਕੇ ਹਨ।