Chingari App

ਨਵੀਂ ਦਿੱਲੀ: ਭਾਰਤ ਸਰਕਾਰ ਵੱਲੋਂ 59 ਚੀਨੀ ਐਪਸ ‘ਤੇ ਪਾਬੰਦੀ ਲਗਾਉਣ ਕਾਰਨ ਭਾਰਤ ਵਿਚ ਬਣੇ ਐਪਸ ਨੂੰ ਸ਼ਾਨਦਾਰ ਮੌਕਾ ਮਿਲਿਆ ਹੈ। ਭਾਰਤੀ ਲੋਕਾਂ ਵਿਚ ਬੇਹੱਦ ਮਸ਼ਹੂਰ ਐਪ ਟਿਕਟਾਕ ‘ਤੇ ਬੈਨ ਲੱਗਣ ਤੋਂ ਬਾਅਦ ਲੋਕ ਭਾਰਤ ਸਰਕਾਰ ਦੇ ਚਿੰਗਾਰੀ ਐਪ ਨੂੰ ਡਾਊਨਲੋਡ ਕਰਨ ਲੱਗੇ ਹਨ।

ਇਸ ਐਪ ਦੀ ਡਾਊਨਲੋਡਿੰਗ ਵਿਚ ਅਚਾਨਕ ਇੰਨਾ ਵੱਡਾ ਇਜ਼ਾਫਾ ਦੇਖਣ ਨੂੰ ਮਿਲਿਆ ਕਿ ਹਰ ਘੰਟੇ ਇਸ ਨੂੰ 1 ਲੱਖ ਲੋਕ ਡਾਊਨਲੋਡ ਕਰ ਰਹੇ ਹਨ। ਚਿੰਗਾਰੀ ਐਪ ਦੇ ਸਹਿ-ਸੰਸਥਾਪਕ ਅਤੇ ਚੀਫ ਪ੍ਰੋਡਕਟ ਅਫਸਰ ਸੁਮਿਤ ਘੋਸ਼ ਨੇ ਕਿਹਾ ਕਿ ਇਸ ਦੀ ਹਰ ਘੰਟੇ ਕਰੀਬ 1 ਲੱਖ ਵਾਰ ਡਾਊਨਲੋਡਿੰਗ ਹੋ ਰਹੀ ਹੈ।

ਲੋਕਾਂ ਵੱਲੋਂ ਵੱਡੀ ਗਿਣਤੀ ਵਿਚ ਇਸ ਐਪ ਨੂੰ ਡਾਊਨਡੋਲ ਕਰਨ ਕਾਰਨ ਮੰਗਲਵਾਰ ਨੂੰ ਚਿੰਗਾਰੀ ਐਪ ਦਾ ਸਰਵਰ ਡਾਊਨ ਹੋ ਗਿਆ ਸੀ। ਇਸ ਤੋਂ ਬਾਅਦ ਸੁਮਿਤ ਘੋਸ਼ ਨੇ ਟਵੀਟ ਕਰ ਕੇ ਲੋਕਾਂ ਨੂੰ ਥੋੜਾ ਸੰਜਮ ਰੱਖਣ ਦੀ ਅਪੀਲ ਕੀਤੀ ਹੈ।

ਸ਼ਾਰਟ ਵੀਡੀਓ ਮੇਕਿੰਗ ਸੇਗਮੈਂਟ ਵਿਚ ਲੀਡਿੰਗ ਚੀਨੀ ਐਪ ਟਿਕਟਾਕ ਦੇ ਵਿਕਲਪ ਦੇ ਰੂਪ ਵਿਚ ਚਿੰਗਾਰੀ ਐਪ ਨੂੰ ਪਿਛਲੇ ਕੁਝ ਦਿਨਾਂ ਵਿਚ ਲੋਕਾਂ ਦਾ ਜ਼ਬਰਦਸਤ ਰਿਸਪਾਂਸ ਅਤੇ ਪ੍ਰਸਿੱਧੀ ਮਿਲੀ ਹੈ। ਟਿਕਟਾਕ ਦੇ ਭਾਰਤੀ ਵਿਕਲਪ ਦੇ ਰੂਪ ਵਿਚ ਚਿੰਗਾਰੀ ਐਪ ਨੂੰ ਛੱਤੀਸਗੜ੍ਹ, ਓਡੀਸ਼ਾ ਅਤੇ ਕਰਨਾਟਕ ਦੇ ਡਵੈਲਪਰਜ਼ ਨੇ ਮਿਲ ਕੇ ਬਣਾਇਆ ਹੈ। ਇਸ ਐਪ ਨੂੰ ਬਣਾਉਣ ਲਈ ਕਰੀਬ 2 ਸਾਲ ਦਾ ਸਮਾਂ ਲੱਗਿਆ।

ਇਸ ਐਪ ਨੂੰ ਭਾਰਤੀ ਲੋਕਾਂ ਦੀ ਲੋੜ ਅਤੇ ਦਿਲਚਸਪੀ ਨੂੰ ਧਿਆਨ ਵਿਚ ਰੱਖਦੇ ਹੋਏ ਬਣਾਇਆ ਗਿਆ ਹੈ। ਇਹ ਐਪ ਨਵੰਬਰ 2018 ਤੋਂ ਗੂਗਲ ਪਲੇ ਸਟੋਰ ‘ਤੇ ਅਧਿਕਾਰਕ ਰੂਪ ਤੋਂ ਮੌਜੂਦ ਸੀ, ਜਿਸ ਨੂੰ ਚੀਨੀ ਸਮਾਨ ਅਤੇ ਸੇਵਾਵਾਂ ਦੇ ਵਿਰੋਧ ਦੇ ਚਲਦਿਆਂ ਹੁਣ ਵੱਡਾ ਫਾਇਦਾ ਹੋ ਰਿਹਾ ਹੈ। ਟਿਕਟਾਕ ਬੈਨ ਹੋਣ ਤੋਂ ਬਾਅਦ ਇਸ ਦੇ ਡਾਊਨਲੋਡ 1 ਕਰੋੜ ਪਹੁੰਚ ਗਏ ਹਨ।