ਪਬਜੀ ਮੋਬਾਇਲ ਅਤੇ ਇਸ ਦੇ ਨਵੇਂ ਵਰਜ਼ਨ ‘ਗੇਮ ਫਾਰ ਪੀਸ’ ਦੇ ਕਾਰਨ ਚੀਨ ਦੇ ਇੰਟਰਨੈਟ ਪਾਵਰ ਹਾਊਸ ਟੇਨਸੈਂਟ ਦਾ ਰੈਵੇਨਿਉ ਮਈ ਵਿਚ ਇਕ ਦਿਨ 48 ਲੱਖ ਡਾਲਰ ਦਰਜ ਕੀਤਾ ਗਿਆ। ਇਸ ਦੇ ਨਾਲ ਹੀ ਇਹ ਦੁਨੀਆ ਦੀ ਸਭ ਤੋਂ ਜ਼ਿਆਦਾ ਕਮਾਈ ਕਰਨ ਵਾਲਾ ਐਪ ਬਣ ਗਿਆ ਹੈ। ਮੋਬਾਇਲ ਐਪ ਇੰਟੈਲੀਜੈਂਸ ਕੰਪਨੀ ਸੈਂਸਰ ਟਾਵਰ ਦੀ ਰਿਪੋਰਟ ਵਿਚ ਇਹ ਜਾਣਕਾਰੀ ਦਿੱਤੀ ਗਈ ਹੈ।

ਅਨੁਮਾਨ ਮੁਤਾਬਿਕ ਦੋਵੇਂ ਵਰਜ਼ਨ ਮਿਲਾ ਕੇ ਮਈ ਵਿਚ ਕੁੱਲ 14.6 ਕਰੋੜ ਡਾਲਰ ਦੀ ਕਮਾਈ ਕੀਤੀ ਗਈ, ਜੋ ਕਿ ਅਪ੍ਰੈਲ ਮਹੀਨੇ ਵਿਚ ਹੋਈ 65 ਕਰੋੜ ਡਾਲਰ ਦੀ ਕਮਾਈ ਦੀ ਤੁਲਨਾ ਵਿਚ 126 ਫੀਸਦੀ ਜ਼ਿਆਦਾ ਹੈ। ਇਸ ਤੋਂ ਪਹਿਲਾਂ ਅਪ੍ਰੈਲ ਵਿਚ ਹੁਣ ਤੱਕ ਦੀ ਸਭ ਤੋਂ ਜ਼ਿਆਦਾ ਕਮਾਈ ਹੋਈ ਸੀ। ਪਬਜੀ ਮੋਬਾਇਲ, ਗੇਮ ਫਾਰ ਪੀਸ ਨਾਲ ਮਿਲ ਕੇ ਹੋਏ ਕੁਲ ਰੈਵੇਨਿਉ ਤੋਂ ਲਗਭਗ 10.1 ਕਰੋੜ ਡਾਲਰ ਦਾ ਰੈਵੇਨਿਉ ਐਪਲ ਦੇ ਸਟੋਰ ਤੋਂ ਪ੍ਰਾਪਤ ਹੋਇਆ, ਜਦਕਿ ਗੂਗਲ ਦੇ ਪਲੇਟਫਾਰਮ ਤੋਂ ਕੁੱਲ 4.53 ਕਰੋੜ ਡਾਲਰ ਦਾ ਰੈਵੇਨਿਉ ਪ੍ਰਾਪਤ ਹੋਇਆ ਹੈ।

ਸੈਂਸਰ ਟਾਵਰ ਦੇ ਮੋਬਾਇਲ ਇਨਸਾਈਟਸ ਦੇ ਮੁਖੀ ਰੈਂਡੀ ਨੇਲਸਨ ਨੇ ਬਲਾਗ ਪੋਸਟ ਵਿਚ ਲਿਖਿਆ ਕਿ ਪਬਜੀ ਮੋਬਾਇਲ ਦੇ ਦੋਵੇਂ ਵਰਜ਼ਨਾਂ ਨਾਲ ਹੋਣ ਵਾਲੀ ਕਮਾਈ ਨੂੰ ਇਕੱਠੇ ਮਿਲਾਉਣ ਨਾਲ ਇਹ ਦੂਜੇ ਸਥਾਨ ‘ਤੇ ਰਹਿਣ ਵਾਲੀ ਗੇਮ ਆਨਰ ਆਫ ਕਿੰਗਜ਼ ਤੋਂ 17 ਫੀਸਦੀ ਜ਼ਿਆਦਾ ਹੈ, ਜਿਸ ਨੇ ਕਰੀਬ 12.5 ਕਰੋੜ ਡਾਲਰ ਦੀ ਕਮਾਈ ਕੀਤੀ। ਇਹ ਗੇਮ ਵੀ ਟੈਂਨਸੈਂਟ ਦੀ ਹੀ ਹੈ। ਨੇਲਸਨ ਨੇ ਲਿਖਿਆ ਹੈ ਕਿ ਐਪ ਸਟੋਰ ਅਤੇ ਗੂਗਲ ਪਲੇਅ ਯੂਜ਼ਰਸ ਨੇ ਪਿਛਲੇ ਮਹੀਨੇ ਪਬਜੀ ਦੇ ਦੋਵੇਂ ਮੋਬਾਇਲ ਵਰਜ਼ਨਾਂ ‘ਤੇ ਔਸਤਨ 48 ਲੱਖ ਡਾਲਰ ਰੋਜ਼ਾਨਾ ਖਰਚ ਕੀਤੇ।