Elon Musk threatens Apple ban over OpenAI integration

Elon Musk News: ਆਈਫੋਨ ਨਿਰਮਾਤਾਵਾਂ ਨੇ ਜਿਵੇਂ ਹੀ ਓਪਨਏਆਈ ਨਾਲ ਸਾਂਝੇਦਾਰੀ ਦਾ ਐਲਾਨ ਕੀਤਾ, ਇਸ ਦੇ ਕੁੱਝ ਘੰਟਿਆਂ ਬਾਅਦ, ਮਸ਼ਹੂਰ ਉਦਯੋਗਪਤੀ ਐਲੋਨ ਮਸਕ ਨੇ ਇਸ 'ਤੇ ਅਪਣੀ ਨਾਰਾਜ਼ਗੀ ਜ਼ਾਹਰ ਕੀਤੀ ਅਤੇ ਅਪਣੀ ਕੰਪਨੀ ਵਿਚ ਐਪਲ ਫੋਨਾਂ ਦੀ ਵਰਤੋਂ 'ਤੇ ਪਾਬੰਦੀ ਲਗਾਉਣ ਦੀ ਧਮਕੀ ਦਿਤੀ। ਮਸਕ ਦਾ ਕਹਿਣਾ ਹੈ ਕਿ ਦੋਵਾਂ ਕੰਪਨੀਆਂ ਵਿਚਾਲੇ ਇਹ ਸਾਂਝੇਦਾਰੀ ਸੁਰੱਖਿਆ ਨਿਯਮਾਂ ਦੀ ਉਲੰਘਣਾ ਹੈ ਅਤੇ ਇਸ ਨੂੰ ਬਿਲਕੁਲ ਵੀ ਬਰਦਾਸ਼ਤ ਨਹੀਂ ਕੀਤਾ ਜਾ ਸਕਦਾ।

ਜ਼ਿਕਰਯੋਗ ਹੈ ਕਿ ਐਪਲ ਦੇ ਸੀਈਓ ਟਿਮ ਕੁੱਕ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ 'ਤੇ ਇਕ ਪੋਸਟ ਕੀਤੀ ਸੀ। ਇਸ ਪੋਸਟ ਵਿਚ, ਕੁੱਕ ਨੇ ਐਪਲ ਡਿਵਾਈਸਿਸ ਵਿਚ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਨੂੰ ਹੋਰ ਬਿਹਤਰ ਬਣਾਉਣ ਲਈ, ਚੈਟਜੀਪੀਟੀ ਬਣਾਉਣ ਵਾਲੀ ਕੰਪਨੀ ਓਪਨਏਆਈ ਨਾਲ ਸਾਂਝੇਦਾਰੀ ਦੀ ਘੋਸ਼ਣਾ ਕੀਤੀ।

ਇਸ ਘੋਸ਼ਣਾ ਦੇ ਕੁੱਝ ਘੰਟਿਆਂ ਬਾਅਦ, ਐਲੋਨ ਮਸਕ ਨੇ ਟਿਮ ਕੁੱਕ ਦੀ ਪੋਸਟ ਦਾ ਜਵਾਬ ਦਿਤਾ ਅਤੇ ਲਿਖਿਆ ਕਿ 'ਐਪਲ ਡਿਵਾਈਸਾਂ ਵਿਚ ਚੈਟਜੀਪੀਟੀ ਦੀ ਲੋੜ ਨਹੀਂ ਹੈ। ਜਾਂ ਤਾਂ ਇਸ ਮਾੜੇ ਸਾਫਟਵੇਅਰ ਨੂੰ ਐਪਲ ਡਿਵਾਈਸਿਸ ਵਿਚ ਜੋੜਨ 'ਤੇ ਪਾਬੰਦੀ ਲਗਾਈ ਜਾਣੀ ਚਾਹੀਦੀ ਹੈ ਜਾਂ ਫਿਰ ਉਹ ਅਪਣੀ ਕੰਪਨੀ ਵਿਚ ਐਪਲ ਡਿਵਾਈਸਾਂ ਦੀ ਵਰਤੋਂ 'ਤੇ ਪਾਬੰਦੀ ਲਗਾ ਦੇਣਗੇ”।

ਜ਼ਿਕਰਯੋਗ ਹੈ ਕਿ ਟੈਕਨਾਲੋਜੀ ਦਿੱਗਜ ਐਪਲ ਨੇ ਸੋਮਵਾਰ ਤੋਂ ਅਪਣੇ ਆਈਫੋਨ, ਆਈਪੈਡ, ਮੈਕ ਆਦਿ 'ਚ ਐਪਲ ਇੰਟੈਲੀਜੈਂਸ ਦੀ ਵਰਤੋਂ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ। ਇਹ ਇਕ ਤਰ੍ਹਾਂ ਦਾ ਨਿੱਜੀ ਖੁਫੀਆ ਸਿਸਟਮ ਦਸਿਆ ਜਾ ਰਿਹਾ ਹੈ। ਕਿਹਾ ਜਾ ਰਿਹਾ ਹੈ ਕਿ ਐਪਲ ਇੰਟੈਲੀਜੈਂਸ ਐਪਲ ਸਿਲੀਕਾਨ ਦੀ ਤਾਕਤ ਨੂੰ ਵਧਾਏਗਾ, ਜਿਸ ਨਾਲ ਲੋਕਾਂ ਨੂੰ ਕਈ ਸਹੂਲਤਾਂ ਮਿਲਣਗੀਆਂ।

ਮਸਕ ਨੇ ਇਕ ਪੋਸਟ 'ਚ ਲਿਖਿਆ ਕਿ ਜੇਕਰ ਓਪਨਏਆਈ ਨੂੰ ਆਪਰੇਟਿੰਗ ਸਿਸਟਮ ਪੱਧਰ 'ਤੇ ਐਪਲ ਡਿਵਾਈਸਿਜ਼ 'ਚ ਏਕੀਕ੍ਰਿਤ ਕੀਤਾ ਗਿਆ ਤਾਂ ਉਹ ਅਪਣੀ ਕੰਪਨੀ 'ਚ ਐਪਲ ਫੋਨਾਂ ਦੀ ਵਰਤੋਂ 'ਤੇ ਪਾਬੰਦੀ ਲਗਾ ਦੇਵੇਗੀ। ਮਸਕ ਨੇ ਸਵਾਲ ਉਠਾਇਆ, 'ਕੀ ਐਪਲ ਵਰਗੀ ਕੰਪਨੀ ਅਪਣੀ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਬਣਾਉਣ ਦੇ ਸਮਰੱਥ ਨਹੀਂ ਹੈ? ਐਪਲ ਨੂੰ ਪਤਾ ਨਹੀਂ ਹੈ ਕਿ ਅਸਲ ਵਿਚ ਕੀ ਹੋ ਰਿਹਾ ਹੈ ਇਕ ਵਾਰ ਐਪਲ ਤੁਹਾਡਾ ਡੇਟਾ ਓਪਨਏਆਈ ਨੂੰ ਦੇਵੇਗੀ ਅਤੇ ਉਹ ਇਸ ਨੂੰ ਵੇਚ ਦੇਣਗੇ’।

(For more Punjabi news apart from Elon Musk threatens Apple ban over OpenAI integration, stay tuned to Rozana Spokesman)