WhatsApp

ਨਵੀਂ ਦਿੱਲੀ: ਵਟਸਐਪ ਅਪਣੇ ਯੂਜ਼ਰ ਲਈ ਹਰ ਰੋਜ਼ ਨਵੇਂ-ਨਵੇਂ ਫੀਚਰ ਲੈ ਕੇ ਆਉਂਦਾ ਰਹਿੰਦਾ ਹੈ। ਇਸ ਦੌਰਾਨ ਅਪਣੇ ਨਵੇਂ ਫੀਚਰ ਵਿਚ ਵਟਸਐਪ ਯੂਜ਼ਰਸ ਲਈ ਰਾਹਤ ਲੈ ਕੇ ਆਇਆ ਹੈ। ਦਰਅਸਲ ਅੱਜ ਦੇ ਦੌਰ ਵਿਚ ਵਟਸਐਪ ਸੰਚਾਰ ਦਾ ਸਭ ਤੋਂ ਚੰਗਾ ਮਾਧਿਅਮ ਮੰਨਿਆ ਜਾਂਦਾ ਹੈ ਅਤੇ ਇਸੇ ਕਾਰਨ ਇਸ ਦਾ ਸਾਈਜ਼ ਵਧਦਾ ਜਾ ਰਿਹਾ ਹੈ।

ਸਾਈਜ਼ ਵਧਿਆ ਹੋਣ ਕਾਰਨ ਜੇਕਰ ਕਿਸੇ ਦੀ ਪੁਰਾਣੀ ਗੱਲਬਾਤ ਦੇਖਣੀ ਹੋਵੇ ਤਾਂ ਕਾਫੀ ਮੁਸ਼ਕਿਲ ਆਉਂਦੀ ਹੈ। ਅਜਿਹੀਆਂ ਮੁਸ਼ਕਲਾਂ ਨੂੰ ਖਤਮ ਕਰਨ ਲਈ ਵਟਸਐਪ ਜਲਦ ਇਕ ਨਵਾਂ ਫੀਚਰ ਲੈ ਕੇ ਆ ਰਿਹਾ ਹੈ। ਜੇਕਰ ਤੁਸੀਂ ਕਿਸੇ ਖਾਸ ਦਿਨ ‘ਤੇ ਭੇਜੇ ਗਏ ਜਾਂ ਪ੍ਰਾਪਤ ਮੈਸੇਜ ਨੂੰ ਲੱਭਣਾ ਚਾਹੁੰਦੇ ਹੋ ਤਾਂ ਇਸ ਫੀਚਰ ਦੀ ਮਦਦ ਨਾਲ ਤੁਸੀਂ ਤਰੀਕ ਦੇ ਜ਼ਰੀਏ ਯਾਨੀ Search by date ਨਾਲ ਅਸਾਨੀ ਨਾਲ ਮੈਸੇਜ ਲੱਭ ਸਕੋਗੇ।

ਮੀਡੀਆ ਰਿਪੋਰਟ ਅਨੁਸਾਰ ਇਹ ਫੀਚਰ ਫਿਲਹਾਲ ਵਿਕਾਸ ਅਧੀਨ ਹੈ, ਇਸ ‘ਤੇ ਟੈਸਟਿੰਗ ਜਾਰੀ ਹੈ ਪਰ ਇਹ ਜਲਦ ਹੀ ਆ ਜਾਵੇਗਾ। ਇਸ ਫੀਚਰ ਨੂੰ ਸਭ ਤੋਂ ਪਹਿਲਾਂ iPhone ਵਿਚ ਵਰਤਿਆ ਜਾ ਸਕੇਗਾ, ਉਸ ਤੋਂ ਬਾਅਦ ਇਹ ਐਂਡਰਾਇਡ ਵਰਜ਼ਨ ਲਈ ਵੀ ਜਾਰੀ ਕੀਤਾ ਜਾਵੇਗਾ।

ਵਟਸਐਪ ‘ਤੇ ਇਕ ਕੈਲੰਡਰ ਆਈਕਨ ਨੂੰ ਜੋੜਿਆ ਜਾ ਰਿਹਾ ਹੈ, ਇਸ ਦੇ ਆਉਣ ਤੋਂ ਬਾਅਦ ਯੂਜ਼ਰ ਨੂੰ ਵਟਸਐਪ ‘ਤੇ ਕੈਲੰਡਰ ਆਈਕਨ ਦਿਖਾਈ ਦੇਵੇਗਾ। ਜਦੋਂ ਤੁਸੀਂ ਕੈਲੰਡਰ ਆਈਕਨ ‘ਤੇ ਟੈਪ ਕਰੋਗੇ ਤਾਂ ਵਟਸਐਪ ‘ਤੇ ਇਕ ਤਰੀਕ ਪਿੱਕਰ ਦਿਖਾਈ ਦੇਵੇਗਾ। ਇੱਥੇ ਤੁਸੀਂ ਅਪਣੇ ਹਿਸਾਬ ਨਾਲ ਤਰੀਕ ਸਲੈਕਟ ਕਰਕੇ ਮੈਸੇਜ ਦੇਖ ਸਕਦੇ ਹੋ।